|
|
PoMA |
Dʼe U͡ol ɨraːktaːgɨ olorbuta.
|
|
|
|
Ulkatɨgar Umnahɨt paːsɨnajdaːk.
|
|
|
|
Umnahɨt paːsɨnaj bu ɨraːktaːgɨga üleleːn harsi͡erdaːŋŋɨ karaŋattan ki͡ehe karaŋaga di͡eri biːr lu͡osku burduk ihin üleliːr ebit.
|
|
|
|
Manan iːtten olorollor.
|
|
|
|
Umnahɨt paːsɨnaj biːr kɨːs ogoloːk.
|
|
|
|
Dʼe biːrde U͡ol ɨraːktaːgɨ diːr: "Kaja dʼe, Umnahɨt paːsɨnaj, töhö öjdöːk kihi töröːn tönünnüŋ?
|
|
|
|
Taːburunna taːj, minnʼigesten minnʼiges tu͡oguj?
|
|
|
|
Harsi͡erda kelen togus čaːska haŋaraːr.
|
|
|
|
Onu taːjbatakkɨna ɨjɨːr maspar moːjdoːk baskɨn bɨhɨ͡am.
|
|
|
|
Umnahɨt paːsɨnaj togo da öjö kɨ͡ajbat, minnʼiges ahɨ bileːkteːbet, ɨraːktaːgɨ aha barɨta minnʼiges kurduk gini͡eke.
|
|
|
|
Dʼi͡etiger kelen ɨtana olordo.
|
|
|
|
Kɨːha ɨjɨtar: "Kaja, agaː, togo ɨtaːtɨn?"
|
|
|
|
"Dʼe, togojum, hɨldʼɨbɨtɨm hɨččak, olorbutum uhuga.
|
|
|
|
U͡ol ɨraːktaːgɨ taːburuːn bi͡erde.
|
|
|
|
Taːjbatakpɨna moːjdoːk baspɨn bɨhɨ͡ak bu͡olla."
|
|
|
|
"Tugu taːttarar ol?"
|
|
|
|
""Minnʼigesten minnʼiges tu͡oguj" diːr", di͡ebit.
|
|
|
|
"Eː, agaː, tuhata hu͡okka togo ɨtɨːgɨn.
|
|
|
|
Utujaːktaː, hɨnnʼan.
|
|
|
|
"Minnʼigesten minnʼigehi biler hirim biːr", di͡er.
|
|
|
|
"Harsi͡erdaːŋŋɨ karaŋattan ki͡eheːŋŋi karaŋaga di͡eri üleleːn, en haːkkɨn-kirgin ɨraːstaːn, biːr lu͡osku burdugu iltekpine, emeːksinim bu͡or golomo dʼi͡etin otunnagɨna, munnum hɨlɨjar.
|
|
|
|
Ol burdukkaːnɨnan toloŋku͡o oŋordoguna, ahaːbakka da utujabɨn.
|
|
|
|
Onon minnʼigesten minnʼiges utujar uː bu͡olu͡oktaːk", di͡er.
|
|
|
|
Kini onton da ordugu bilere bu͡olu͡o du͡o", di͡ebit kɨːha.
|
|
|
|
Ogonnʼor utujan kaːlla.
|
|
|
|
Harsi͡erda erde turan togus čaːska ɨraːktɨːgɨga tijer.
|
|
|
|
U͡ol ɨraːktaːgɨ ɨjɨtar: "Kaja, taːjdɨŋ du͡o?"
|
|
|
|
"Eː, taːjarga talɨ gɨnnɨm.
|
|
|
|
Höbö duː, hɨːhata duː", diːr.
|
|
|
|
"Dʼe tuguj?"
|
|
|
|
"Harsi͡erdaːŋŋɨ karaŋattan ki͡eheːŋŋi karaŋaga di͡eri üleleːn, en haːkkɨn-kirgin ɨraːstaːn, biːr lu͡osku burdugu iltekpine, emeːksinim bu͡or golomo dʼi͡etin otunnagɨna, munnum hɨlɨjar.
|
|
|
|
Ol burdukkaːnɨnan toloŋku͡o oŋordoguna, ahaːbakka da utujabɨn.
|
|
|
|
Onon minnʼigesten minnʼiges utujar uː bu͡olu͡oktaːk."
|
|
|
|
U͡ol ɨraːktaːgɨ diːr: "Oː dʼe, öjdöːk kihigin ebit.
|
|
|
|
Kajdak inen-batan hɨtagɨn?
|
|
|
|
Össü͡ö taːj, orto dojduga türgenten türgen tu͡ok baːrɨj?
|
|
|
|
Harsi͡erda taːjbatakkɨna, moːjdoːk baskɨn bɨhabɨn."
|
|
|
|
Ogonnʼor tugu da tobulbat.
|
|
|
|
Tijen ɨtana olordoguna, kɨːha ɨjɨtar.
|
|
|
|
Ogonnʼor innʼe-innʼe diːr.
|
|
|
|
"Tu͡ok tuhata hu͡okka ɨtɨːgɨn, utuj.
|
|
|
|
Harsi͡erda eteːr "türgenten türgen" di͡er, "kuhagan buru͡olaːk bu͡or golomobuttan taksa kötön, karakpɨn kastɨrɨta hoton oduːlaːn kördökpüne, kallaːn di͡ek kantajdakpɨna— kallaːn huluhun karagɨm aːga körör, hir di͡ek kördökpüne— hir otun-mahɨn aːga köröbün.
|
|
|
|
Karagɨm ɨlarɨgar kahan da tiːjbeppin.
|
|
|
|
Onon türgenten türgen kihi körüːte", di͡er.
|
|
|
|
Onton ordugu kini bilere bu͡olu͡o du͡o", diːr kɨːs.
|
|
|
|
Ogonnʼor utujan kaːlla.
|
|
|
|
Harsi͡erde turan ɨraːktaːgɨtɨgar bardaga.
|
|
|
|
U͡ol ɨraːktaːgɨ ɨjɨtar: "Kaja taːjdɨŋ du͡o?"
|
|
|
|
"Eː, taːjarga talɨ gɨnnɨm.
|
|
|
|
Höbö duː, hɨːhata duː", diːr.
|
|
|
|
"Kuhagan buru͡olaːk bu͡or golomobuttan taksa kötön, karakpɨn kastɨrɨta hoton oduːlanan kördökpüne, kallaːn di͡ek kantajdakpɨna— kallaːn huluhun karagɨm aːga körör, hir di͡ek kördökpüne— hir otun-mahɨn aːga köröbün.
|
|
|
|
Karagɨm ɨlarɨgar kahan da tijbeppin.
|
|
|
|
Onon türgenten türgen kihi körüːte ebit", diːr.
|
|
|
|
U͡ol ɨraːktaːgɨ högör: "Oː, ogonnʼor, dʼe öjdöːk kihigin ebit.
|
|
|
|
Dʼe tu͡ok da üs tögülleːk", taksan irgek koru͡obanɨ tutan bi͡erer.
|
|
|
|
"Manɨ harsi͡erda törötön tugutun batɨhɨnnaran egeleːr.
|
|
|
|
Kaja u͡oruktatɨn komujan egeleːjegin", di͡ebit U͡ol ɨraːktaːgɨ.
|
|
|
|
Ogonnʼor erejdeːk irgek koru͡obatɨn hi͡eten tijen ɨtɨː olordo.
|
|
|
|
Kɨːha ɨjɨtta: "Kaja, agaː, togo ɨtaːtɨŋ?"
|
|
|
|
"Kaja, irgek koru͡obanɨ bi͡erde, törötön egel diːr, irgek koru͡oba kantɨnan töröːččünüj, kuːgu?"
|
|
|
|
"Eː, irgek koru͡oba kantan törü͡öj?
|
|
|
|
Kata astammɨppɨt.
|
|
|
|
Taksaŋŋɨn ölörböktöː, etin hi͡ekpit", diːr kɨːs.
|
|
|
|
Ogonnʼor irgek koru͡obatɨn ölörön keːher, dʼe manɨ hi͡ektere.
|
|
|
|
Kɨːha utakaːga koru͡oba tunnʼagɨn, tugulun komujan bi͡erde agatɨgar: ""Dʼe iti kara tunʼaga— inʼete, tugula— tubuta" di͡en baraːn ɨraːktaːgɨn ostu͡olugar ogo oːnnʼuːrun kurduk huburutalaːn keːheːr.
|
|
|
|
"Irgek koru͡obattan törüːr agaj hirin bu bullum", di͡er.
|
|
|
|
Onton ordugu da kini bilere bu͡olu͡o du͡o?
|
|
|
|
Dʼe oččogo mohujan ɨjɨtɨ͡a: "Bejeŋ öjgünen gɨmmatɨŋ bu͡olu͡o.
|
|
|
|
Itičče öjdöːgüŋ bu͡ollar min iːkpin-haːkpɨn ɨraːstɨː iŋen-batan hɨtɨ͡a hu͡ok etiŋ.
|
|
|
|
Kim ü͡öreter", di͡ege.
|
|
|
|
Onno kisteːjegin", diːr kɨːha.
|
|
|
|
""Kuhagan kɨːs ogoloːkpun, ol ü͡öreteːktiːr", di͡er."
|
|
|
|
Ogonnʼor harsi͡erda barar.
|
|
|
|
U͡ol ɨraːktaːgɨ ɨjɨtar: "Kaja taːjdɨŋ du͡o?"
|
|
|
|
Ogonnʼor koru͡oba tunʼagɨn, tugulun ostu͡olga ogo oːnnʼuːrun kurduk huburutalaːn keːher.
|
|
|
|
"Irgek koru͡obattan törüːr agaj hirin bu bullum", diːr.
|
|
|
|
Ɨraːktaːgɨ: "Bejeŋ öjgünen gɨmmatɨŋ bu͡olu͡o.
|
|
|
|
Itičče öjdöːguŋ bu͡ollar min iːkpin-haːkpɨn ɨraːstɨː iŋen-batan hɨtɨ͡a hu͡ok etiŋ.
|
|
|
|
Kim ü͡öreter", diːr.
|
|
|
|
"Kuhagan kɨːs ogoloːkpun, ol ü͡öreteːktiːr", diːr ogonnʼor.
|
|
|
|
U͡ol ɨraːktaːgɨ: "Kɨːhɨŋ öjdöːk kɨːs töröːbüt", diːr.
|
|
|
|
Timir kokoroːgu, tügege kajagastaːgɨ bi͡erer.
|
|
|
|
"Manɨ hamaːn ɨːttɨn", diːr.
|
|
|
|
"Onu hamaːbatagɨna, ikki͡enŋitin töbögütün bɨhɨ͡am", diːr.
|
|
|
|
Ogonnʼor kokoroːgu ildʼe barbɨta ɨtɨː-ɨtɨː.
|
|
|
|
Kɨːs: "Kaja, agaː, tu͡oguŋ kokoroːgoj", diːr.
|
|
|
|
"Kaja-kuː, dʼe ölörör küne kelle.
|
|
|
|
"Bu kokoroːgu hamaːn ɨːttɨn", diːr.
|
|
|
|
"Bunu hamaːbatagɨna, ikki͡enŋitin töbögütün bɨhɨ͡am", diːr."
|
|
|
|
Kɨːs diːr: "Ilt tötterü, dʼaktar kihi hamɨ͡am, er kihi kokoroːgu čorčokoːt kördük ti͡eren ɨːttɨn."
|
|
|
|
Ogonnʼor ildʼen bi͡erer.
|
|
|
|
Uːol ɨraːktaːgɨ högör.
|
|
|
|
Ogonnʼoru ɨːtar.
|
|
|
|
"Bejem kɨːskɨn körö barɨ͡am", diːr.
|
|
|
|
U͡ol ɨraːktaːgɨ, kɨːhɨ köröːt, bagarar, dʼaktar ɨlar.
|
|
|
|
Töhönü-kaččanɨ olorbuttara bu͡olla.
|
|
|
|
Dʼaktardammɨtɨttan U͡ol ɨraːktaːgɨ kuːkula kurduk olorčok bu͡olla, barɨtɨn dʼaktara hubeliːr, bɨhaːrar.
|
|
|
|
U͡ol ɨraːktaːgɨ tɨllanar: "Dogoː, bu biːr dojduga ikki ɨraːktaːgɨ bu͡olarbɨt tabɨllɨbat.
|
|
|
|
Bihigi araksɨ͡ak."
|
|
|
|
Dʼaktara: "Dʼe araksɨ͡ak duː", diːr.
|
|
|
|
U͡ol ɨraːktaːgɨ: "Tu͡ok bagalaːk hirgin barɨtɨn ɨl", diːr.
|
|
|
|
Dʼaktar höbüleher.
|
|
|
|
Araksar tüːnnere-keː bu͡olar.
|
|
|
|
Ere utujan kaːlar.
|
|
|
|
Dʼaktar erin hu͡organnarɨ, tellekteri agatɨn bu͡or golomo dʼi͡etiger kötögön ildʼer.
|
|
|
|
U͡ol ɨraːktaːgɨ harsi͡erda uhuktan hohujar, tɨːllan körbüte baha-ataga golomo mahɨgar kebiller.
|
|
|
|
"Kaja-keː, bu kanna baːrbɨtɨj?
|
|
|
|
Togo kelbitimij?"
|
|
|
|
Dʼaktarɨn kebi͡eleːn uhugunnarar.
|
|
|
|
Dʼaktara: "Kaja dogoː, min egelbitim", diːr.
|
|
|
|
"Togo egelbikkinij?"
|
|
|
|
"Tɨːj, bejegin bagardɨm da bejegin egellim.
|
|
|
|
Tu͡ogu bagarargɨn ɨlaːr di͡ebitiŋ diː", diːr dʼaktar.
|
|
|
|
U͡ol ɨraːktaːgɨ kɨ͡ajan arakpata.
|
|
|
|
Dʼe dʼaktara diːr: "Oččo öjdöːk kihi bu͡olbatak ebikkin.
|
|
|
|
Dʼoŋŋun hübeleːn bejeŋ olor.
|
|
|
|
Min könnörü küseːjke bu͡olan oloru͡om."
|
|
|
|
Umnahɨt paːsɨnaj kɨːhɨn ütü͡ötünen hi͡erkile taːs dʼi͡ege olordogo, bu͡or golomotton araksan uhuguttan.
|
|
|
|
Bajan-tajan olordoktoro dʼe.
|
|
|
|
Elete.
|