This visualization was generated on 15.11.2021 with Corpus Services.

BMS Twegɨla.
Araga pajaganse elɨmbaq šedeɣ.
Iːt aj neːt epɨndaɣə šedəjaq tabɨštjannan.
Tabɨštjak Tomnɨ qwangu kɨgelɨmba.
A neːɣant tiːzʼešpaɣ: “Neː, Tomna qwanǯaj.
Topqɨndo tʼeɣə nʼäj tatänǯaj, qawpik tawenǯaj.
Konaŋ warkɨk, tʼimnʼam karaumbet, kutʼetnak čʼanǯikuŋ ponä.”
Araganmɨq qwannaq.
Akoškan ɨlond nʼanʼat omdɨlǯimbat nʼuʒont paːron kɨba timnʼam.
Onǯ ponä kuralba i natʼelʼ sanǯerlʼe qwatɨmba, tʼemnʼam a olǯembat.
Twekala tölʼebe omnämbaːden.
Kɨbajčʼekam tun ɨland omdɨlǯimbat i tun ɨloɣɨn omdelʼǯelʼe qwannɨmbat.
Tömba nalɣupka, tömba i tʼemnʼät tʼäŋgua.
Tautʼet i totʼet kuralgumba, i tʼemnʼat kutʼennaj tʼaŋgua.
Parkumbat, parkumbat, tʼemnʼat kutenas parʒukua.
Nʼorʒ kuralba i tʼanʼgua kutʼenaj.
Kundakɨn twegala wašeǯemblʼe čʼaːʒat, seːq poːl santaŋɨn taɣesʼaːt.
“Nawerno tweːkala ma tʼemnʼäm kwandat,” – tarbɨmba naɣuka i kuralba tweːklam metɨrgu.
Kurpa, kurpa nalɣupka.
Kolʼǯʼimbat, šoɣor natʼen.
“Šoɣor, šoɣor, katlʼel, kutʼet twegula qwannat.”
“Mananɨ seːɣɨ nʼaim abəlʼel, našat katlʼews.”
Nadäka čʼeːnčʼa: “Man azʼewnan seːɣ nʼaj az audʼenǯa.”
Aj kundaŋ kuranna.
Kundaŋ kuralʼešpa nalguka.
Mannɨmbat, muge amnanda.
“Muge, muge, kutʼet tweːgɨla čʼaːǯat.”
“Mananɨ tʼeusaim aːpɨlʼel, našat katlʼeps.”
“Manan asäwnan swaː čʼoːpɨrla as aːmukwaw,” – nadäka kadɨmbat.
Aj kuralʼešpa kundalak (kundaɣla).
Kuralʼešpa i konǯernɨt, qolton kweːŋgna.
“Qolto, qolto, katlʼel, kutʼet tweːgɨla qwannat?”
“Manan üdem ötlʼel, našan katlʼeps.”
“Manan azewnan smʼatanam az öːdokwaw.”
I kuranna.
Kundɨŋ, kundɨŋ kurpa.
Kur kogzemba.
Tʼökolgu kɨgɨmba kurɨm i larɨmbaj.
I soːɣondʼzʼa: “Kur, kur, kutʼet tweːgɨla čʼaːǯatɨn?”
Kur watɨm ukaʒimba (tiːʒimba) tabani.
Nalguka watowɨn kuralʼešpa.
Mannɨmba, kɨba madoka okɨr tobon amda.
Amda i pöroŋ kojwadišpa.
Maːdokan pönʼegesse amda, lɨ tobɨt.
Pönʼegesse tarseja wes, okɨr tümb teut, sailat polqaj, (kak pönegessenan).
Tʼemnʼat skamʼjan paːran amda, akoškaon mannɨmba, laptuškaze saːnǯirna.
Akoškan tolakaŋ tömba i akoškaun mannɨmba.
Mešalbat tʼemnʼamdə, kuralba maːtqɨnt.
A pönʼegesse tweːklam parʒimbat, üːdembat nʼölʼe.
Nalgupka kuralʼešpa, a tweːgɨla meːderɨšpaːt.
“Kutʼet qaːdɨlaŋ?”
Qoldont meːdɨmpa pɨr kɨn ilond.
“Qold, mašim kutarem kajlʼent.”
Qold kätišpat: “Manan üdem ötlʼel, našaqɨn qajlʼemɨ meːlʼews.”
Ötɨmbat nalgupka üdɨm.
Qold kɨn ɨlond ozimbat.
Twegɨla okɨrtiːn mendɨzimbaːtɨn.
Kɨn ɨlondo čʼaːrɨmba i kuralba.
Twekɨla tabɨm kolʼdʼzʼimbadɨn aj nʼörɨmbatɨn tabɨm.
Qaj meːgu na nalgukane?
Mukent medɨdʼzimba: “Tʼeu, cʼeu muge, kutʼedem oziglʼent mašim.”
“Man tʼeu saim amnal, našaqɨn oziːglaks.”
Tʼeusai ambat.
Molalase čʼaɣʒimbat nadäkam muge.
Twekala okɨrtiːŋ menɨmbatɨn.
Teun mulalanto čʼarɨmpa i kuralba maːtqɨnt.
Tweːgala aj kolʼzʼimbat, aj tabɨm nʼödɨmbatɨn.
Sawsem metrešpatɨn i tulantse oloun tʼebulas monnat.
Kojekak medɨmba šoɣort.
“Šoɣor, kutʼedem oziglʼent mašim.”
“Ma seːɣ nʼaim ablʼel, našan oziglaks.”
Nadäkka seːɣ nʼaim ambat i šoɣorčʼ patpa.
Okortiːŋ tweːgla mendɨsimbaten.
Nalguka šoɣorɣandoː čʼannɨmba, aj kušaj duša eppa i našaŋ kurpa.
Nalʼgupka kuralʼešpa.
I čʼaurumba tistaŋ.
Wandɨt säqaj wes, wandɨt qaːmtɨmba.
Kubalat tʼeuze wes kozɨlbat.
Säɣɨ nʼäin kusoŋ aːkɨnt wes patpatɨn.
Twegɨla aj kolʼdʼimbaden nalgukkam, aj nʼörombatɨn.
Meːtrimbatan, tuːlantse wandoun monnat.
To i mannɨmbat, što tʼemnʼamtɨ meʒalʼǯenǯat odoɣɨndoː.
Mat uš plʼiskan.
Maːthɨn medešpa.
Mathɨn nalguka taːxzimba, maːdam tʼeŋ rudalǯimba, okoškalam čʼaɣʒimbat.
Twekɨla maːtɨmt koiːrɨmbat.
Twekula parkɨmbadɨn.
Üpsembat pönagessäni timnʼakalɨk.
Araga pajagase tömbaq.
Kɨbačʼeka maːtqɨn eja, elɨŋ eja.
Teːɣ nʼäjm i qaupikam membaɣ nädäkani.