This visualization was generated on 15.11.2021 with Corpus Services.

KAI İlɨmpa imaqota.
Täpɨn muqɨn nɔːkɨr ijat ɛːppa.
Aːrat iːjeiːtɨ šöttɨ nɨnɨ qənnɔːtɨn.
Koralɨmɨla surɨlʼlʼa qännɔːtɨn.
İmaqota pɛlʼikɔːlɨk qaːla.
Ukkur čʼeːlɨ čʼeːlatta.
“Šitämteːlʼi qarɨt qaːrnɨlʼ čʼeːlʼin omtak.
Qoš qai mɨta mɔːtan okon mɨrqɨntɨ mɔːtan qaj mɨrqɨntɨ.
Ukkur čʼontoːqɨn mɔːnmɨ miːtɨ qəːn ɔːlʼčʼiqulʼamnɨ.
Mɔːnmɨ qəːntɨt qətaliqolamna.
Innä čʼap mantäjak mɔːntɨ qajet qoš loːqäčʼɛnta.
Mɔːnmɨ montɨ nammɨ pɛlʼät tɔːqqɨmpatɨ.
Ukkur čʼontoːqɨt loːsɨ mɔːttɨ qontɨšɛlʼčʼa (qontɨšeiŋa).
Loːsɨ qaj ɛːa qaj ɛːsa?
Təttɨ čʼiːtɨ qaj mottɨt.
Toːlʼ pɛlʼakmɨt nʼännɨ čʼiːqɨlʼtɛlʼčʼa ijanɨ koptoːntɨ ıllä omta.
Nännɨ na omtɨčʼeːnta.
Puːlʼemtɨ patčʼirɛːŋɨt puːlʼemtə kət tɨšetqo meːlʼčʼit.
Tɛːttɨ šekkɨ meːlʼčʼit.
Ɨntaːlʼtɨ lakap patqɨlɛlʼčʼitɨ čʼımɨlʼ qotko, čʼımɨlʼ qotko meːlʼčʼiŋɨt (/meːŋɨt).
A čʼeːlʼiŋtätɨlʼ mɔːttɨ pɛlʼalʼ nɔːnɨ lʼimpep pelʼätolʼ tuː mešalnɨt.
Na tuːntɨsä tutqälʼɔːlnɨt meːŋɨtɨ.
Na tuːntɨsä tuːtäːsitɨ.
Nʼännä qəlʼlʼä nılʼčʼik na kəttɨŋɨt:“ Kutɨlʼ ijamɨ šiːlat ɛːŋija?”
İmaqotamtɨ nılʼčʼik soqɨnʼnʼit:“ Kutɨlʼ ijamɨ sʼilat eŋa?”
Ponä tarelʼa nɨna qənnäja moqɨnä.
Nɨnɨ imaqota šittɨ qaj kušaj čʼeːlʼa čʼeːlʼata.
Nɨnɨ üːtɨt märqɨ ijamɨ moqonä na tüːntä.
“İːjöː, tat qaj tɛnɨmɨntal?
Qarɨnɨlʼ čʼeːlʼɨ kuttar omtak tɛː qəlʼlʼa puːlʼe poqɨt mɔːtaqɨt qos qaj märqɨnta.
Ukkur tät čʼontoːqɨt mɔːnmɨ qəntɨt ɔːlʼčʼiqolamna.
Mɔːnmɨ qəːntɨ qoːtalʼiːqolamna.
Inna čʼap mantäjap pot qəːš lʼi qaje ɛːsa mɔːnmɨ qəntɨt tɔːqqɨmpatɨ.
Ɛh ukkur čʼontoːqɨt poqɨnä mɔːttə nılʼčʼop qontɨšein.
Qup toːttɨ qaji ɛːsa, qaj muːčʼirɨmpa, qaj pisɨnʼnʼa.
Toːlʼ pɛlaŋmɨt nʼänna qəlʼlʼa ıllä omtɨčʼeːsa.
Seːpɨlʼak omta puːlʼɨmtɨ pačʼerɛːlʼa köt tišetqo meːlʼčʼiŋɨt.
Ɨntälʼtɨ lʼaka patqɨlʼɛːŋɨtɨ, čʼımɨlʼ kotqo čʼoqqolʼɛːŋɨtɨ.
Čʼeːlʼɨntätɨlʼ pɛlʼäqɨntɨ qonna qɨmmalʼtɨlʼä lımpɨt tuː mešalnɨt.
Tıšamtɨ nassa tutqälʼɔːlnɨt.
Tutqälʼɔːlla nık kətɨnɨt.
“Kutɨlʼ ɛːjme iːjalʼɨ (silat) ortɨ ɛːmme šik nʼöːtɨŋije.
Ortɨ čʼaŋkɨmä ɨkɨ šik nʼöːtɨŋɨje”.
Mɔːttɨ šerlä nık kətɨsɨt.
İːjatɨ amɨrɛːlʼa ɨlʼlʼä qonta.
Toptɨlʼ qarɨt ɨnnä məːta amɨrɛːlʼa taqtalʼtɨlʼä lʼosät wättɨ ši qonnɨ.
(Omta =) nʼänna qənɨtɨ.
İmaqota na čʼeːlʼɨ čʼeːlata.
Üːtɨt ɨlʼlʼe lɨpqɨmɔːnna, čʼontoqɨlʼ ijatä tüŋa.
Čʼontoːqɨlʼ ijatə moqonä na tüːntä, amɨrlʼä na omnɨnta.
“İːjöː, tat qas qaj tɛnɨmɨntalʼ?
Tɛː qəssɨlɨt šitɨmtälɨlʼ čʼeːlɨ qarɨt kutar omtak.
Ukkɨr tət čʼontoːqɨt miːti mol mɔːtaqɨt qos qaj wärqɨnta.
Qəː, qəː!
Ukkɨr tät čʼontoːqɨt mɔːnmɨ miːti mol qəːntät ɔːlʼčʼiqantalʼtimpa.
Ɨnnä čʼap mantak qos qajet qəš mɔːnmɨ qəntɨt tɔːqqɨmpatɨ.
Nɨnɨ mɔːttɨ nılʼčʼop qontɨšɛːnta.
Montɨ muːčʼirɨmpa pisɨrɨmpa.
Toːlʼ pɛlʼaqtɨ čʼiqɨlʼtɛːlʼä omtɨčʼeːnta.
Seːpɨlak omta puːlɨmtɨ patčʼirɛːlʼä kət tišetqo meːlʼčʼiŋɨt.
Ɨntälʼtɨ patqɨlɛːlä čʼımɨlʼ qotqo meːlʼčʼiŋɨt.
Čʼeːlʼtätɨlʼ pɛlʼäqtɨ nɔːnɨ lımpɨt tuː mišalnɨt, tuː mišallä tišemtɨ nasä tuːtqälʼɔːlʼnät.
Seːpɨrɨptäqɨntɨ kutɨlʼ iːjalʼe ortä ɛːptäqɨntɨ, šip nʼöːtɨŋɨje.
Ortɨ čʼäŋɨmä, ɨkɨ šik nʼöːtɨŋɨje.
Loːsɨ nı kətɨŋɨt.
İːjatɨ qaj kətɛntɨtɨ.
Qaj kətɨsɨt?
Šäkka.
Toptɨlʼ qarɨt məːša taqtaltɨlʼä loːsɨp nʼöːlʼä qəntɨŋɨt.
Nɨnɨ šittalʼ imaqota čʼeːlʼata üːtontɨ qənna poːs kɨpa ijatɨ tüːŋa.
İjatɨ porqɨlʼ, peːmɨtɨ toː tıːtɛːlʼa ıllä na omnɨnta.
“İːjöː, tat qos qaj tɛnɨmɨntalʼ?
Tɨmtɨ lʼoːsɨ na tüːnta.
Šittälʼ qarɨt mɨta omtak, mɔːtaqɨt qos qaj märqɨnta.
Ukkur čʼontoːqɨt mɔːnmɨ qəntɨt qəːtalʼilʼčʼɛnta.
Ɨnnä čʼap mantɨrnak qos qajet qəš mɔːnmɨ qəntɨt ɨpqɨlpatɨ.
Lʼoːsɨ ira mɨta qontɨšɛːŋa.
Poːqɨnɨ mɔːttɨ tolʼ pɛlʼäqtɨ omtɨčʼeːlʼa puːlɨmtɨ patčʼirɛːŋɨta, köt tiše meːlʼčʼiŋɨt.
Ɨntälʼtɨ patqɨlɛːlʼä čʼımɨlʼ qotqo loːqɨrɛːŋɨtɨ.
Čʼeːlʼintätɨlʼ mɔːtɨ pɛlʼäqɨnɨ lımpɨt tolʼ tuːp mišalnɨtɨ, tišelʼ toqtɨ nasä tutqälʼɔːlnɨtɨ, nɨnɨ ponä tarɨlʼä.
“İjalɨ kun eŋa?
İːjalɨ silata (ortɨ) ɛmmä šik nʼöːtɨŋɨje.
Ortɨ čʼäŋɨmmä, ɨkɨ šik nʼöːtɨŋɨje”.
Nık kətɨsɨt”.
İːjatɨ əːtɨtɨ čʼäŋka, ıllä qonta.
Toptɨlʼ qarɨt ınnä na mäšintɨ, amɨrɔːlna, omtɨčʼeːnta.
Lʼoːsɨ ira kuttar omtɨsa täm aj nılʼčʼik omtɨčʼeːnta.
Puːlʼɨtɨ pačʼirɛːlʼa qɨpijatɨ aj köt tišä meːlʼčʼitɨ.
Ɨntelʼtɨ patqɨlɛːlʼa täp aj čʼımɨlʼ qotko meːlʼčʼitɨ.
Nɨnɨ šittälʼ čʼelʼtɨ ɛːtɨlʼ mɔːtɨ pɛlʼäktɨ qorrɨmɔːllä.
Täm aj lʼımpät pelʼätoːlʼ tuːp mišalʼnɨt.
Tɨšemtɨ nasa tuːtälʼčʼit.
Kutar qos ponä tara na köt tıšamtɨ mišalʼlʼa nɨnä qəssa.
Toː qənna lʼos mättɨ šuː.
Nɨnɨ iːja nʼöːlʼa na qənnɨtɨtɨ, na nʼöːntɨt.
Lʼoːsɨ mɨta nılʼčʼik qənnɨmpa, nılʼčʼik qənnɨmpa mit olʼa surɨt tuː qorrɛːmpat.
Tintena timnʼäqı üːkɨllʼä qənpɔːtɨt, nʼänäqɨt (/nʼänät) qoːräsä šäqɨmpɔːtɨt, lʼoːsɨ mɨta qaj qolʼqat (/qoːrɨt ɔːmtɨt) olɨt pɔːrɨqɨt šäːkɨmpa.
Nɨnä na qəntanäː.
Tɨmnʼäqımi mɨta aj qorasä šäqɨmpɔːtɨt nɨnɨ qənpɔːtɨt.
Nɨna tülʼčʼa.
Loːsɨ montɨ kɨpɨlʼa tiːtäkat pɔːrɨqɨt nɨmtɨ šäqqɨmpa aj nɨmtɨ šäqqɨmpa.
Nɨnɨ na qənta, na qənta.
Ukkɨr čʼontoːqɨt aj šäkɨmpɔːtɨt aj qoräsä šäːkɨmpɔːtɨt.
Nɨnɨ na qənta.
Loːsɨn mɔːttɨ čʼap tulɨnʼnʼä.
Qajes montɨ tɨmnʼaqımɨ kutar tüːmpɔːtɨt?
Tolʼčʼilʼ tɔːktɨ kutar totta nılʼčʼik totta.
Sɨrɨ tɔːtɨk iːmpatɨ poːqät mättɨ ni qaj čʼäŋka.
Mɔːttɨ čʼap šeːrnak mɨta nılʼčʼi šitɨ suːrɨpqı sɔːrɨmɨnta, sailʼ ɔːqtɨ miːtɨ tü čʼɔːppa.
Na qumɨp lɨntɨt toːpɨt čʼiːrɨ qotta čʼap orqɨlnɔːqij.
Šitɨ lɨntɨt čʼarɨ qätɨŋɨtɨ tarɨ täqɨmpɔːtɨt nɨnɨ mɔːttɨ šerna.
Loːsɨ iːra mompa pisɨrɨmpa, muːčʼirɨmpa.
Mompa qum šintä märɛːja.
Qum šintä nılʼčʼik kətɨt.
Nɨnɨ šittälʼ lʼos ira ponä läpätɔːlna pitčʼe tultit.
Pitčʼet tuːšip muntɨk ammäit.
Pitčʼa tušim amnɨtɨ.
Ukkur čʼontoːqɨt qup na montɨ ütšilʼa təːka.
Loːs nalʼa mompa munɨmtɨ tutɨrɨt.
Ukkur tət čʼontoːqɨt qɔːtɨ mɨta:“ Pitčʼat moqal tutɔːlläp”.
Pitčʼat moqal tutɔːlnet miːti mɨta ütälʼ qalap ütɨŋɨt.
Pitčʼa muntɨk ammeit.
Nɨnɨ šeːqɔːtɨt.
Toːptɨlʼ qarɨt ɨnnä məːša pona tanta päqqɨt šutɨlʼ lakap tultɨtɨ.
Peːqqɨt šutɨlʼ lʼaka muːširɨtɨ, muːširɨtɨ.
Muːširɨlä ontɨkine küːmɨlʼ lətɨ tıːtɨtɨ toːna mäčʼimtɨ iːjanɨk tıːtɨtɨ.
Mompa na päqɨt kumɨlʼ lakap tutɨŋɨtɨ i sɔːntɨŋɨtɨ.
Ukkɨr tət čʼontoːqɨt ijap čʼap čʼatɨŋɨt mɔːtät maːkqɨp tarɨ matqɨmpa.
Uːquːquː!
Tintena iralʼ imalʼ tıːmonɨ nɔːnɨ putɨlmɔːllä tintena qənɨŋnɨ sajep qaː čʼap muːčʼitap?
Nɨnɨ timnʼatɨ paqtɨlʼä qara mišalnɨt.
Təp aj tutɨrnɨt, tutɨrnɨt.
Čʼatɨŋɨt tɨnä toː loːsirat qɔːt kɨmɨt matkɛːja.
Täp ilʼčʼamtɨ čʼattɨsɨt qɔːt kɨmɨn.
İlʼčʼatɨ mɨta:“ Uquuu nelʼčʼɛntak pöːtɛntak”.
Tintena iːja nılʼčʼik kəttɨŋɨt.
“Nʼiːrɨlʼ tıːmona tɔːpɨqɨnɨ qəːnirana sajep qaː čʼap muːčʼitap aaaaa!”
Leːpä toːlla tintäna päqqɨt lolʼ lakap toː sappɨšeiŋɨtɨ (toː tıːtɛːŋɨtɨ).
Nɨnɨ seːpɨlak muːčʼirɨlʼa pisallä pona pakta.
Nalʼatä nılʼčʼik na kətɨntɨt.
“To nɨmtɨ tɨtɨt porä ippɨnta.
Tat tɨːnɨ pona na tannɛnantɨ qət čʼunčʼoqɨt čʼatɨ matqɨmpa.
Namɨp äːsäp čʼoqɔːlpatɨ.
Tat na čʼatɨ mišallä paqtäš!
Na tɨtɨt pɔːrɨ lʼaka čʼatɨsa našak qəːrätɨ, našak qəːrätɨ”.
Əːtɨmɨntɨ iːmantɨ nɔːna ponä čʼap paqtä məttɨtɨ toː qɨnnɨmpa.
Čʼatɨ lakap miːšɔːllä nɨːmɨt toː na paqtɨnta nʼöːlʼa qəntɨtɨ.
Nɨː tüŋa:“ Kučʼa qattüja?”
Na ippɨtɨlʼ tɨtɨp pɔːrɨ lakap čʼatɨsä qərɨŋɨt, qərɨŋɨt.
Nɨnɨ tiːntäna na ija moqɨnä kuralʼna amɨrsamtɨ orqɨlnɨt kostɨrlʼamta (amɨrsat, amɨrsat).
Kostrʼulʼantɨ əttɛːŋa.
Los-ira mɔːttɨ patqɨllä tona mɨp qättɨmpat, tam mɨp qättɨmpat ni kun aj čʼäŋka.
Čʼi qəttɨmpat, kostrʼulʼam qəttɨmpat:“ Me aša kətɛntɔːmɨt.
Təpɨn amtɨlʼ soma apsɨp meː amnɔːmɨt aša kətɛntimɨt”.
Nɨnɨ toːnam qättɨmpat mɔːtqɨt, tamɨm qättɨmpat, ni kut čʼäː, ni kut čʼäː.
Čʼap mantɛːja mɔːt ɨlɔːqɨt tap omta.
Loːsɨ mučʼilʼimpɨlʼe pisɨlʼe pona paqta.
Na paqtɨnta tap okoškat qanɨkɨt səːtɨ nɨːna taŋaltɛːnta.
Nɨː ıllä alʼčʼa salʼtontɨ.
Tat na saltɨp na čʼatontɨ lakasä naša qəːrätɨ, qəːrätɨ, mol oːlʼot üːqɨlʼelʼčʼɛnta.
A əːlet üːkɨlʼelʼčʼɛnta.
Pona paqtɨlʼe na čʼatɨntɨ lakap mišallä qənna, okoška na oqät…
Saltɨp qərɨŋɨt, qərɨŋɨt.
Los-ira nɨːnto nɨːnɨto oːlöt üːqɨlʼelʼčʼa, aj oːlöt toː üːqɨlʼelʼčʼa.
Mɔːttɨ kurolʼna tɨntena loːsɨt nalʼän nɔːna mɨka toː mešalnɨt.
Loːsɨ ira mɔːttɨ patqɨlna to tümtɨ čʼap mottɨtɨ, to tammɨt čʼap mottɨtɨ, (puršimɔːtıːja).
Ni kut čʼä, ni kut čʼä.
Puršimɔːtıːja.
Loːs nalʼä mɨkamtɨ qarre čʼokolɛːŋɨtɨ.
“İlʼčʼa, tat qaj peːŋal?
Mat tɨmtä tap omtäk”.
Loːsɨ ira pisɨnʼnʼa, loːsɨ ira täkkelʼa mannɨmpat.
Nɨna pona paqta nɨnɨ ponä läpätɔːlna.
Qət mɔːtan ɔːqɨt mɨta po na matqɨmpa, nɨːŋɨlʼe ottelʼčʼa.
Tap čʼatɨ lakasa naša qərät, naša qərät.
Nɨːnɨ ınnä oːlöt üːkɨlʼelʼčʼɛnta.
Nɨnɨ tantɨlʼe əːtɨmɨntɨ, naša qərɛːtɨ, naša qərɛːtɨ.
Nɨːnetɨ əːlʼöt na üːkɨlʼelʼčʼɛnta, mɔːttɨ šeːrlʼa na pisɨrmɔːtija.
Täjto ɛsɨmpa nɨnɨ šittälʼi mɨnta pisɨrmɔːntɨ.
Šäqqɨnta.
Toptɨlʼ qarɨt innä mäšilʼe čʼoip na ütɨntɨt.
Čʼoj na ütɛntɨt, amɨrejnta, amɨrlʼe qɨːqɨllʼe täːto ɛsälɔːlpa.
Pona paqtat seːp moːrɨ qup qaj qaːtampa.
Lʼamɨk ɛːntanə ooo.
Okkɨr tät čʼantoːqɨt tüːlʼčʼenta čʼıːmɨlʼ lʼiːpɨp qoːtältɨmpatɨ.
Täp tänɨrlʼe nık kətɨt:“ Čʼıːmɨp qaj kun qolʼčʼimpat?
Qɔːt man mannɨmpɨsam ɛːna”.
Tep aj ponä läpätɔːlna.
Qəəə montɨ toːt čʼɔːtɨ qaj kuralʼna.
Loːsɨ ira qaj toː čʼɔːtɨ qonɨčʼa načʼe na qənta.
Nəəə; čʼap qoŋɨtɨ tüː tap čʼiːqqɨmɔːtpa.
Mɔːttɨ čʼap šeːrna, montɨ nilʼčʼilʼ loːsɨlʼ imɨlʼa omta.
Ollɨtɨ olla čʼıŋkɨt tuː pinpa.
Olla sɨrɨ.
Ɨnna sɔːlɨmtɨ na čʼäːp orqɨlnɨt na qumɨp pačʼalqo.
Sɔːlɨmtɨ na čʼäp orqɨltɨt.
Tintena qup loːsɨlʼ imat sɔːlɨp toː mišallä čʼare pačʼalnɨtɨ, loːsɨlʼ imap illä qəttɛjet.
Nɨnɨ loːsɨlʼ imaqotap čʼıːmɨsä ɔː ši säqɨnnɨt, säqɨnnɨt.
Čʼıːmɨtɨ mišallʼe moqonä tatɛjet.
Moqɨna tüŋa čʼıːmɨlʼ lıːpɨp qoːtaptɨmpatɨ.
Nɨnɨ qup šip moːtajen, qup šip moːtajen.
Nɨnɨ nılʼčʼik ɛsalɔːtɨn loːsɨn.
Seːpɨlak eŋa loːsɨlʼ imaqotanɨk mɔːttɨ qənnɔːtɨn.
Nɨnɨ čʼap qənnɔːtɨn.
Loːsɨlʼ imaqota čʼumɨlʼ lösa ılla qumpa.
Nʼajip amɛːlʼa polla illa.
Loːsɨlʼ mɔːt čʼap tüːŋɔːtɨn čʼuːrɨlʼa omtijɔːtɨn.
Teːta ɛsɨmpɨlʼa omta.
Lɨpqɨmɔːtaja.
Nunʼak čʼeːlʼiŋelʼa pona paqta.
Nälʼätɨ nɨlʼčʼik kətɨŋɨtɨ.
“Nɨnɨ ponä paqtɨptäqɨntɨ mɔːtan ɔːqtɨ čʼapqaš tottɨŋɨlit.
Tan mɨta pona paqtɨptäqɨntɨ.
Poːsa qättalʼnɨlʼit”.
Nɨnɨ mɔːttɨ šeːrla nılʼčʼik kətɨŋɨtɨ, qup šiŋ na moːtäjenta.
Nɨnɨ moqonä tüːlʼe čʼıːmɨlʼ lʼiːpɨp qoːtäptɨmpatɨ, qoːtäptɨmpatɨ.
Mompa qumɨt šintɨ märeja.
Nılʼčʼik ɛsälɔːlpa loːs ira sepelak ɛːlʼa sämnälʼä moːttattätɨ.
Qəː, qəː čʼap qənna tintena ämäp (amamɨ) laŋat oqɨllɨsa tokkɨmɔːlla quŋa.
Laŋat moqal lä poːllɛːlʼe quŋa.
Loːsɨ ira moqɨnä tümpa čʼuːreːptɨmpa, čʼuːreːptɨmpa.
Lɨpkomɔːtɨimpa.
Nu čʼelʼiŋɛːlʼa, pona paqta, ponä läpätɔːlna.
Nälʼatä nılʼčʼik na kətɨt.
“Pona paqtɨlʼe täp čʼapqoš na tottɛntɨtɨ.
Tat pona tantɨptäqɨntɨ posä qätalʼtɨ.
Muntɨk rakšältättɨ”.
Nɨnɨ loːsɨ ira mɔːttɨ šeːrlʼä puːlʼa, täp pona tanta.
Muntɨk posa qätalʼnɨt.
Loːsɨt čʼapqoš muntɨk rakšaltɨtɨ.
Mɔːttɨ šerna.
Mɨta, qum šintɨ märeja, qum šintɨ märeja.
Nilʼtʼiŋ ɛsa.
Säːppɨlʼak ontä läpätɔːlna mɔːttɨ šerna.
Poqonɨ mɔːttɨ qontɨšeŋa čʼapqošit loːsɨt muntɨk patčʼalpatɨ.
Nʼuːqoqɨntɨ muntɨk matqɨmpa.
Mɔːttɨ alʼčʼa čʼapqošilʼ tolʼ tıːrɨ.
Tintena iːja paqtɨlʼe nüːqɨntɨ nɔːnɨ toː nɨtalɔːlnɨt, maːčʼo qatɔːlnɨt.
Nɨtalʼa maːčʼo qatɔːlnɨt.
Loːs ira tɨmtɨ täːto ɛsɨkolʼčʼimpa.
İppɨkolʼčʼimpa.
Nɨnɨ šɛːqɨntɔːtɨt.
Toptɨlʼ qarɨt innä wäšelʼä ira pičʼitɨ sɛlɨmpatɨ: čʼuqɨlit, kačʼilit.
Pičʼim na sɛlɨintɨt.
“Toː tɨmtɨ amɨrsalʼ qäː ippɨnta, na qäːqɨnɨt qəntej”.
Əːtɨmɨntä na qäːqɨntɨ na qəntɔːqı.
İlʼčʼatɨ ɨnnät mattɛːttɨ omtɨlʼ qumɨt qətpɔːrɨtɨ.
Ɨlqɨnɨ kotqɨlʼlʼe koraltɨtɨ.
Ukkɨr čʼontoːqɨt niːlʼ ɛsa.
“Qətsanä, šintɨ qurɨlʼak ünɨsä”.
(Qətsat=) Ünɨlʼ tämtɨtɨ, tintena iːjap niːk qurrejitɨ olʼa šeːqɨ lʼaka.
“Kusa, qətsat, ɨpqäːlʼaš!”
Qətsattɨ čʼam ɨpqälʼolʼna, olʼa tämtɨ lʼipɨ tıšqälʼimpɔːtɨt, muntɨk toː seppɛːnta (seppelɔːlɨptɔːt) teːmtɨ lʼiːpɨ.
“Kusa, ilʼčʼa, mat tämtɨp kunä qontap?
Mat tämtop čʼäŋka.
Qos qajqɨt eŋa čʼəːsɨ optɨlʼ tämtɨlamɨ”.
Nasa kurreŋit, na optɨlʼ tämtɨlʼasä.
Loːsɨ irap nasa kurreit:“ Kusa, ilʼčʼa, ɨpqälʼaš!”
Loːsɨ ira čʼap ɨpaŋɨtɨ miːtɨ kotɨk qənäta, toː ütteŋito loːs irap.
Moqonä paqta.
Moqonä paqtɛlʼe loːs irat nälʼasa ılle qonteja.
Ukkɨr čʼontoːqɨt qəəəə pit čʼontɨlʼ qotäqɨt qornɨlʼ pit mompa qɨr, qɨr.
Tintäna qät saltɨ lakap muqɨltıːre toːtɨrɨtɨ moqonä.
Qapija čʼarɨp qäːt kontɨ lakap na qoqɨlmɨntɨtɨ.
Mompa qɨr.
Ponä lepetɔːlna.
Tam aj qajet ketɨ ira qajet ketɨ ɛsa?
Paŋɨsä mɨsä nilleːlʼa maːtɛːlɔːlnɨt, maːtɛːlä, silaltet toː maːtɛːlä tallaltit, tɛːmnɨntɨ lıːpɨ, mɔːttɨ iːtetɨ (čʼattetɨ).
Loːs ira kɨka qəjentɨ lıːpɨ mɔːttɨ üːkɨlʼeŋɨt.
Qaj šäqɨmpa (qontɨmpa) qaj kutar pittempa.
Toptɨlʼ qaret ɨnnä mäša ija kulʼtɨmpa:“ Əsɨmɨt qɔːtə šinɨt qätta”.
Tänɨtɨ nık kolʼumpa.
Ukkur tät čʼontoːqɨt šöttɨ qənpa na ija.
Qaj mɨta?
Na ija šöttɨ na qənta.
Nəəə!
Na qənta nəəə.
Ukkur tät čʼontoːqɨt ɨːrɨk miːti nık ɛsɨnta.
“Qɔːtɨ loːs našik mtenta.
Loːsɨ ira šik nʼöŋa.
Kučʼe qatɛntak?”
Säː šitqo ɛšilä pontɨ sɨqɨleŋa.
Tɨntalʼ na loːs irra nʼenʼimɔːnna moqonät nɨmtɨ qälimpɨptät.
Täp mompa:“ Kulʼ šelʼqup qəːtɨp aj kuːna qontɨŋɨt?
Tat pɛltimenan (tat pɛlitɨmpal)?
Kuli šelqup qəːtɨp aj kuːna qontɨŋɨt?”
Nälʼantɨkine nılʼ toːta.
Tintena ija suːrqıːp mɔːttɨ miːšalʼnɨt.
Suːrqıːt qoːp čʼöšsä (čʼošsä) qamtälnɨt loːs ira ɨkɨ üntinimtɨje.
Ɨkɨ üntɨšeŋimtijeːtit na čʼöšsä qamtälnɨt.
Nälʼamtɨ nık soqɨnʼnʼet.
“Täm moʒet kanakɨntɨ surɨlʼa üːtɛntɨtɨ.
Na ija na surɨlʼat qättalʼlʼä tallalʼtɨlʼa ponäsä üːtɨlʼäl”.
Əsɨtɨ nılʼ əːtɨrkutɨ nälʼamtɨ.
Ətɨmɨntɨ na qumɨt surɨqij mɔːttɨ sarrejietɨ.
Loːsɨ nɨnɨ pija na mitɨmɨntɨtɨ.
Pontɨ sɨːqɨlelʼa.
Okkɨr čʼontoːqɨt pop na matteŋɨt, pom mattaltentetɨ, qos qäntɨt.
Čʼatkɨsä mattältentit kultälʼna.
To surɨlʼap čʼap üːtɨmpatɨ.
Surɨlʼat čʼap qənnɔːqɨj mɔːttɨ čʼap alʼčʼikunet.
Tɨntena loːsɨt nälʼa qättällä tallalʼtɨlʼä aj šinet üːta.
“Kučʼe qatɛntak qɔːtɨ mɨta lɔːsɨ šik amta”.
Pijap üːtɛːtä, pija qəlʼlʼa loːsɨt mɔːtɨt pɔːrontɨ omtija.
Pija namɨša laŋkalna loːsɨt nälʼa qos kutɨlʼ mɔːtɨt qontartɨ patqɨlna ont aj aš tɛnɨmɨt.
Qos kutɨlʼ mɔːt qontortɨ tıšqɨmɔːnna nɨrkɨmɔːlla.
Tintena suːrɨk ijat mɔːtte alčʼɔːtɨt, tına surutqı qoːqɨlʼ čʼošip muntɨk ammejɔːtɨt.
Suːrqı čʼap kəlʼčʼɔːtɨt: qaj jeːsʼa mompa tintena nʼüšimɨt loːsɨ ira ompä amtɨt.
Olla säq kəːsɨlʼ tɛːmtɨ rakšimɔːnna, tıntɨna suːrqij nɨnɨ paqtɔːtɨt säpɨteŋɨtɨ.
Paqtɨlʼe na qənmɨntɔːtɨt na qənnɨntɔː qəəəə.
Ukkɨr čʼontoːqɨt mompa mat košinamɨt.
Tüŋa na tümpa.
Tümɨ nɔːt ɔːlʼčʼɛnta.
Qolʼčʼintɨt montɨ tintena suːrqımɨ qontɨšɛːntɔːtɨt.
Mompa: puraaa!
Mol aplʼäj mol aplʼäj molə aplʼäj molə aplʼäj.
Na suːrqıp nɨː kuraltimpatɨ.
Suːrqı tüːŋɔːtɨt tɨntɨna loːsɨ irap šitɨ miːšalnɔːqɨj.
Loːsɨ irap končʼaeŋɨtɨ qəttɛːŋɨtɨ.
Nɨnɨ moqonä tüːlʼe loːs nälʼatkinä toːta, tat mɨta qajitqo niːk orɨšantɨ?
Ras mompa mat aːsap niːlʼ šik əːtɨsa, mat kučʼe qatɛntak?
Nɨnɨ loːsɨt nälʼasa moqonä əːmɨntɨ mɔːttɨ tüːlʼe na ilɨmpɔːtɨt.
Morɨtɨ najɛnta koncatɨ.