This visualization was generated on 15.11.2021 with Corpus Services.

KNS İsɛčʼär ilɨmpa ukkɨr ɔːmtɨjqo.
Ɔmtɨjqoːn mɨqɨn ɛppa nɔːkɨr näjatɨ.
Ɔmtɨjqo näjaiːmtɨ ponä sɔːntɨrqa aša üːtɨmmɨmpat.
Meːltɨtqa mərɨmpat mɔːtqɨntɨ.
Ukkɨpar nɔːkɨrtɨn tülä əsɨntɨnɨk (čʼıːtɔːtɨn) tomnɔːtɨn:“ Meːšɨnɨt ponä üːtäšɨk sɔːntɨrqɨnɨtqa”.
“A kɨssa, kekkɨsä kuntɨ ɨkɨ sɔːntɨrnɨlɨn”,– tomnɨt ɔːmtɨjqo.
Ontɨ soltatiːmtɨ qərɨmpat, nɨltɨraltɨmpat pürɨk kojalaltɨlä, nɨːnɨ na soltatɨt puːtantɨ nɔːtɨ näjaiːmtɨ üːtɨmpat sɔːntɨrqɨntɨtqa.
Ukoːt qapija sajiːmtɨ muntɨk saralpat.
Nɨːnɨ qaj kuntɨ sɔːntɨrpɔːtɨn, qaj čʼäːŋkɨ, ukkɨr poːsɨ kɨpa nätäk nık kəlʼčʼa:“ Ɔːmɨnʼeːiːmɨ aj čʼäːŋkɔːtɨn”.
Sajɨntɨ nɔːnɨ čʼəp qampıjam toː taršaltɨnɨt, pɛlɨkɔːlɨk mərka.
Čʼäːŋka ämtä nʼiŋkaiːtɨ, ämtä soltatiːtɨ.
Mənɨj, qumkɨtɨj qəːttoːqɨn nɨmtɨ qälɨmpa.
Qältɨrɨmpa, qältɨrɨmpa.
Nɨːnɨ čʼəːtɨmpat loːsɨm.
“Qaj peːntal tam qəːttoːqɨn”,– loːsɨ nık (kətɨŋɨt) soqɨnʼčʼa nätänɨk.
“Man sɔːntɨrsak nʼıŋkaiːnɨsä,– tomnɨt nätäk loːsɨnɨk,– nɨːnɨ puːn muntɨk ürrɛːčʼɨsɔːtɨn”.
“Tan massä qənnantɨ,– tomnɨt loːsɨ,– ɛnnantɨ man imanoːqa”.
Loːsɨ qənnɨmpat mɔːtqɨntɨ nätäm.
Mɔːttɨ ɛppa kɨt pɔːrɨj toːqɨn.
Na toːn ɨsatkɨqɨn markɨ, na markoːqɨn mɔːttɨ nɨmtɨ ɛppa.
Loːsɨ na nätäsä kuntɨ ilɨmpa nɨː tülä.
Loːsɨ šöttɨ ičʼčʼɨmpa suːrɨjjä, nätäk mɔːtqɨntɨ ontɨ qalɨkkojɨmɨmpa.
Ukkɨr čʼontoːqɨn nätäk iːjatɨ čʼeːlɨŋmɨntɨ loːsɨn nɔːnɨ.
İːjamtij nimtɨmpoːqı Markɨnʼčʼatqa.
Nılʼčʼɨj iːjatıj, nɨllä orɨmnɛnnɨmpa.
Namɨššak ilɨmpɔːqi loːsɨ na nätäksä, iːjatıj mərqɨ ɛsɨmpa.
Ukkɨpar kuššaːqɨn loːsɨ šötqɨn ɛppa iːja nɔːtɨ əmɨntɨnɨk tomnɨt:“ Moqɨnä qənnajlɔːmıj, amma, kun tan čʼeːlɨŋpɨtɨj təttal”.
Əmɨtɨ təpɨnɨk nık kətɨmpat:“ Kuttar meː qəntɔːmıj?
Loːsɨ ɨːrɨknaj šinıj qonta”.
Ukkɨpar kuššaqɨn loːsɨ mačʼaqɨn ɛppa, Markɨnʼčʼa əmɨntɨsa nɔːtɨ na qənmɨntɔːqi.
Pɛntalɛːmpɔːqı kɨš šüːmɨt antɨsä.
Ukkɨr čʼontoːqɨn čʼəm üntɨnʼnʼɔːqı, konnät olä poː qoːštɨmmɨntɨ.
Naqaj loːsɨ tɛpäːqım nʼoːkkɨŋɨt.
Moqɨnä taːtɨmpat tɛpäːqım.
“Kučʼčʼä čʼəm paktɛntɔːlıj, ɨːrɨknaj šintıj qontak”,– tomnɨt loːsɨ.
Nɨːnɨ loːsɨ aj šöttɨ qənpa suːrɨjjä.
Markɨnʼčʼa ämäsɨqäːqi aj qənpɔːqı.
Markɨnʼčʼa pičʼɨtɨ kekkɨsä tɛltɨmmɨntɨt antoːqɨntɨ.
Qənpɔːqi kɨš šüːmɨn.
Üntɨnʼnʼɔːqı loːsɨ na tɛpäːqım nʼoːkkɨŋɨt.
Markɨnʼčʼa toːj pɛläqqɨj čʼuːrantɨ əmɨmtɨ omtɨltɨmpat, ontɨ kəːj jaqqontɨ nɨː qənnɛja.
Loːsɨ aj antɨsä nʼoːmpat.
Na kəːj jaqqoːqɨn kəːtɨmpɨtɨj poːm maːtɨmpat, nɨːnɨ ɔːttɨmpat.
Loːsɨ ɛpsɨrɨmpɨlä nık qatɨnnɨt, Markɨnʼčʼam čʼäːŋkɨ qontɨrätɨ.
Ompä poːn ɨltɨ loːsɨ ɛssɛːnta Markɨnʼčʼa poːmtɨ toː pačʼčʼalnɨt.
Poː loːsɨm nɨː qättɨŋɨt.
Loːsɨ quntɨrolɨjjä kekkɨsä nık kətɨŋɨt:“ Markɨnʼčʼa, kuššan ɛːmä mašɨm sä tɛnamptɨkɨläntɨ”.
Markɨnʼčʼa qatolä əmɨmtɨ tɛltɛːlä nɨːnɨ qənnɛːmpa.
Loːsɨ nɨmtɨ qumpa.
Moqɨnä əmɨntɨ təttantɨ čʼəp tümpɔːqı, ilʼčʼatɨ Markɨnʼčʼam aša iːmpat mɔːtqɨntɨ.
Markɨnʼčʼam ämäsɨqäːqım ponä čʼuntɨj mantɨ nɨː quraltɨpat ilɨqɨntıjqa.
Markɨnʼčʼa aša ilɨqolampa, ilʼčʼantɨnɨk qəllä nık tomnɨt:“ Ɔmtɨjqoj ilʼčʼa, mäkkä pičʼɨ, pila, sɔːttɨl’ tɛːmtɨ aj poqqɨ mitɨ.
Man tɨmtɨ aša ilɛntak”.
Ɔmtɨjqok ontɨ puːtɨːqɨntɨ tɛnɨrpat:“ Na mar qum namantɨ qɔːnak čʼıːta”.
“Nɔːt aj qajɨm aša kɨkal”,– ɔːmtɨjqok nık soqɨnʼnʼɨt.
“Nɔːtɨ ämtä qaj aša kɨkam”,– tomnɨt Markɨnʼčʼa.
Na uːtaktɨ muntɨk iːmpat, nɔːt na qənmɨntɨ.
Əmɨntɨnɨk tomnɨt mol tıːtam šintɨ qərɛntak.
Qənpa kɨš šüːmɨt ınnä.
Kuntɨ qənnɨmpa.
Ukkɨr čʼontoːqɨn nılʼčʼɨj təttantɨ tulɨšpa, qumɨn mɔːnkɔːlɨk ilɔːtɨn.
“Qajɨtqo tɛː mɔːnkɔːlɨk ilɔːlɨn”,– Markɨnʼčʼa nık soqɨnʼčʼa qumɨtɨtkini.
“Mɛrkɨj palʼčʼa meː mɔːtiːmɨt muntɨk nɨtalä qəntalsɨ”,– tomnɔːtɨn qumɨt.
“Kɨssa makɨj mɔːtɨm meːqɨllamɨt”,– tomnɨt Markɨnʼčʼa.
“A kɨssa meːlɔːmɨt”,– qumɨt kətentɔːtɨn.
Na makɨm muqɨltıːrɨj čʼeːlɨ maːtɨmpɔːtɨn, ämtä šittɨ mɔːtɨššak makɨm čʼäːŋkɨ maːtɨmtäːtɨn.
Markɨnʼčʼa ıllä omtɨlä nık tɛnɨrpa:“ Nılʼčʼɨk uːčʼɨlä meː čʼək aša meːtɔːmɨt mɔːtɨm”.
Oqqä čʼəm namɨk tɛnɨrpɨlä qɨːqɨltɛnta, pičʼɨtɨ aj pilatɨ nɨː uːčʼɨqolamnɔːqı.
Olä qɔːpɨrä tıšqɨltɨmmɨntɨ.
Pičʼɨ pačʼɨnnɨt, pila pilɨnnɨt, tɛːmtɨ ınnä näkäŋɨt.
Čʼeːlɨtɨ aša pannɨ kuššaːqɨntɨ mɔːrɨkɨtɨj mɔːn melʼčʼɨmmɨntɔːtɨn na pičʼɨtɨ, pilatɨ aj tɛːmtɨ.
Nɨmtɨ ilɨlä qumɨtɨt čʼɔːtɨ mɔːrɨkɨtɨj mɔːtɨm meːqɨlpɨntɨt.
Nɨːnɨ aj nʼɛnnä qənpa.
Qənpa, qənpa, nılʼčʼɨlʼ təttantɨ tulɨšpa, qumɨt qəːlɨkɔːlɨk ilatɨn, nɔːtɨ ompä quqɨlɛntɔːtɨn.
“Qäːqa qəːlɨkolɨk ɔːmtɔːlɨn”,– Markɨnʼčʼa nık soːppɨnʼnʼɨt qumɨtɨm.
“Qos qaj loːsɨ qəːlɨm meːqɨnʼɨn aša üːtɨmpat,– tomnɔːtɨn qumɨt,– toːs soːjɨn ɔːm ıllä taqɨtɨmpat”.
Markɨnʼčʼa qənpa na toːntɨ, qanɨktɨ omtɨlä tɛːmtɨtɨ nʼɛntɨ saralqolamtɨt.
Ütɨl loːsɨ iːjamtɨ quraltɨŋɨt, mol qaj qum ɔːmnɨntɨ.
İːjatɨ qənpa Markɨnʼčʼanɨk qanɨktɨ.
“Qaj meːtɨntal tat tɨmtɨ”,– ütɨl loːsɨn iːja Markɨnʼčʼanɨk soqɨnʼčʼa.
“Tam qəːlɨm aša üːtɨptäntɨtqa tɛːmtam saraltɛntam, konnä šintit näkɨlqɨnoːqa”,– tomnɨt Markɨnʼčʼa.
Ütqɨj loːsɨn iːja qarrä qəllä əsɨntɨnɨk mulaltɨŋɨt qaj meːtɨntɨt Markɨnʼčʼa.
Ütqɨj loːsɨ nʼenʼnʼɨmɔːnnɨ, nık kətɨŋɨt iːjantɨnɨk:“ Qəllä kətät, mol kukčʼak ɨkɨ orɨnʼnʼɨja, ɨːrɨknaj qəːlɨm aša üːtɛntam”.
Ütqɨj loːsɨn iːja Markɨnʼčʼanɨk mulaltɨŋɨt əsɨntɨ tompɨj əːtɨm.
Markɨnʼčʼa pilatɨ sɛlɨmpat, nık tomnɨt:“ Qənäšɨk apantɨnɨk, nık mulaltät, mol qəːlɨm aša üːtɨptäːqɨntɨ man teːšɨntɨn tam poqqanɨsä konnä šintɨn näkɨltɛntak, tam täːqanɨsä muntɨk šintɨn pačʼaltɛntak”.
Nɨːnɨ atɨltɨmpat pilamtɨ.
Ütqɨj loːsɨn iːja tülä əsɨntɨnɨk mulaltɨŋɨt qajɨm meːqa olampa Markɨnʼčʼa.
Pilamtɨ ämtä pɛläktɨ čʼäːŋkɨ sɛlɨptätɨ, mannɨmpat: toː üssä tıːrɨčʼɨqolamtɨ.
Noː kıkätɨ qarrä na qäššɨmɔːttɨ.
Seːpɨlak ɛːlä orsä na qäššajčʼɨ.
Seːpɨlak ɛːlä kɨ olä qunnɨmpa.
Kıkäš šüːmɨt qəːlɨ olä kɨntɨ qəntɨlä pičʼɨltɨmmɨntɨ.
Qumɨn qəːlɨ qətällɨntɔːtɨn.
“Ja, namɨššak soma qum Markɨnʼčʼa”,– tomnɔːtɨn qumɨn.
Qəːlɨsä qumɨn təttarnɔːtɨn.
Markɨnʼčʼa aj nʼɛnnä qənnɨ.
Qənpa, qənpa.
Nʼɛnnän nılʼčʼɨj koptantɨ tulɨšpa– mačʼɨ təpɨn məttɨm taqɨtɨmpat.
İnnät mačʼɨt pɔːroːqɨn qum ɔːmnɨntɨ.
“Qaj qumantɨ, ıllä panʼčʼɨräš, näqqɨllɔːmıj”,– Markɨnʼčʼa na qumɨm nık laŋkɨptɨŋɨt.
Qumɨn ıllä panɨčʼčʼäːqɨn näkɨlpɔːqi.
“Qaj qumantɨ aj qaj meːtɨntal nɨmtɨ ınnät”,– soqɨnʼčʼa Markɨnʼčʼa.
“Man,– tomnɨt na qum,– ɔːmtɨjqo tam mačʼɨt čʼɔːtɨ, aj man təpɨm meːsam”.
“Qata qaj tan meːmpal onšünčʼɨk,– tomnɨt Markɨnʼčʼa,– toː ürɨptätɨ aj (meːtɨ) orɨptaltät”.
Utɨmtɨ mačʼɨn ɔːmtɨjqo šittɨ qättɨŋɨt– mačʼɨm mitɨ šeːsä nʼüːqɨlnɨt.
Nʼɛntɨ utɨmtɨ qättɨŋɨt, mačʼɨ aj ɛssɛja.
“Ja, ɔːnɨj tan meːmpal”,– tomnɨt Markɨnʼčʼa.
“Massä qəllɔːmıj, mačʼɨn ɔːmtɨjqo”,– tomnɨt Markɨnʼčʼa.
“A kutɨ mərqɨmɨnqa ɛːnnɨntɨ”,– tomnɨt mačʼɨn ɔːmtɨjqo.
“A kutɨ məttɨm meːtɛntɨŋɨt namɨ aj mərqɨmɨtqa ɛːnta”,– tomnɨt Markɨnʼčʼa.
Nɔːt na qənmɨntɔːqı.
Markɨnʼčʼa uːkɨn, a mačʼɨn loːsɨ čʼiːpɨn qälɨmpa.
Nʼɛnnän tulɨšpɔːqı nılʼčʼɨj tɛttantɨ– čʼaŋaj säqqɨ.
Tam poː nomtɨ ınnä jattɨmɔːtpa.
Innät ukkɨr poːt pɔːrɨqɨn qum ɔːmnɨntɨ.
Na qumɨm ıllä qərɨmpɔːqı Markɨnʼčʼaj mačʼɨn loːsɨn noptıj.
“Qaj qumantɨ”,– soqɨnʼčʼɔːqı Markɨnʼčʼaj mačʼɨn loːsɨn noptıj.
“Man tam säqqɨm meːsam, man säqqɨt čʼɔːtɨ ɔːmtɨjqo”,– tomnɨt na qum.
“Qaj tan meːmpal, toː ürɨptät, nɨːnɨ aj meːtɨ”,– tomnɨt Markɨnʼčʼa.
Na qum utɨm šittɨ qättɨmpat, säqqɨtɨ nɨː ürıːmpa, nʼɛntɨ qättɨmpat utɨmtɨ, säqqɨ kuttar ɛppa nılʼčʼɨk ɛːŋa.
“Ja, ɔːnɨj tan säqqɨn ɔːmtɨjqo, qəllɔːmıj meːsä”,– tomnɨt Markɨnʼčʼa.
“A kutɨ mərqɨ qumɨtqa ɛːnta”,– soqɨnʼčʼa säqqɨn ɔːmtɨjqo.
“A kutɨ məttɨm orqɨlpat namɨ aj mərqɨ qumɨtqa ɛːnta”,– tomnɨt Markɨnʼčʼa.
Markɨnʼčʼa uːkɨn kuralnɨ, təpɨn čʼiːpoːqɨn mačʼɨn ɔːmtɨjqo, poːs čʼiːpɨn säqqɨn ɔːmtɨjqo.
Qənpɔːtɨn, qənpɔːtɨn, nʼɛnnän tulɨšpɔːtɨn nılʼčʼɨj tɛttantɨ, mərqɨ, mərqɨ toː.
Na toːn ɨsakɨːqɨn təttɨllaka.
Na təttɨllakaːqɨn qum ɔːmnɨntɨ.
Qumɨm Markɨnʼčʼa konnä qərɨmpat.
Qum kuššaqɨn konnä tanta Markɨnʼčʼa soːppɨnʼnʼɨt:“ Tat qaj meːtɨntal?”
“Man tam toːm meːsam, man toːn ɔːmtɨjqo”,– tomnɨt na toːn ɔːmtɨjqo.
“Mišan ɔːnɨj tan meːmpal, tam toː təːkɨrät, nɨːnɨ aj üssä meːtɨ”,– tomnɨt Markɨnʼčʼa.
Toːn loːsɨ utɨm šittɨ qättɨmpat, toː kessak ıllä təkkɛːmpa, nɨːnɨ utɨm nʼɛntɨ qättɨmpat, toː okoːt kuttar ɛppa nık üssa ɛːŋa.
“Ja, tan ɔːnɨj toːm meːmpal, meːsä qənnantɨ”,– soqɨnʼčʼa Markɨnʼčʼa.
“A kutɨ mərqɨmɨtqa ɛːnta”,– soqɨnʼčʼa toːn ɔːmtɨjqo.
“Kutɨ uːkɨn ɛːnta namɨ aj mərqɨmɨtqa ɛːnta”,– tomnɨt Markɨnʼčʼa.
Qənpɔːtɨn nʼɛnnä.
Markɨnʼčʼa uːkɨn, nɨːnɨ mačʼɨn loːsɨ, nɨːnɨ säqqɨl loːsɨ, poːs čʼiːpɨn toːn loːsɨ.
Qənpɔːtɨn, qənpɔːtɨn, nɔːtɨ namɨššak ɔːmtɨjqoːn nuːnɨčʼɨmpɔːtɨn, topɨmtɨ kekkɨsä nʼɛnnä pintoːqojɨmpɔːtɨn.
Ɔmtɨjqoːn nɔːtɨ čʼəm čʼıːtɔːtɨn Markɨnʼčʼanɨk nıšqɨqɨntɨtqa.
Markɨnʼčʼa čʼəm tomnɨt mol aj kɨpəːqa qəllɨmɨt.
Nɨːnɨ ukkɨr čʼontoːqɨn mɔːttɨ na tulɨšpɨntɔːtɨn.
Mɔːttɨ čʼəm šeːrnɔːtɨn, ämtä qaj qumnaj čʼäːŋkɨ.
Šäqqɨmpɔːtɨn na mɔːtqɨn, qarɨn nɔːkɨrtɨn suːrɨjjä qənpɔːtɨn.
Mɔːtqɨn qəːčʼɨmpɔːtɨn čʼim mušɨrɔːlqa aj nʼäjɨm piralqɨntoːqa mačʼɨl loːsɨm (mačʼɨn ɔːmtɨjqo).
Mačʼɨn ɔːmtɨjqo poːt pačʼalpat, šoːqɨrtɨ čʼɔːtätɔːllä nʼäjtɨ qarrä omtɨltɨmpat.
Nʼäjtɨ ompä pilä tuːra, nɨːnɨ konnä iːŋɨt.
Na nʼäjtɨ šittɨ maːtɨŋɨt tɔːntɨpoːqɨntɨ, sajɨt kuːrɨsä nık na qontɨt: okoškaːqɨntɨ qos qaj na lanʼkɨmɔːttɨ.
Seːpɨlak ɛːlä kalʼtopkaːqɨn qos qaj säːjqɨmmɨntɨ šeːppɨk.
Mɔːtam nılʼčʼɨj imaqota na nüktɨlä šeːrɨ, olɨtɨ mitɨ sɨrɨ.
Əːtɨkɔːlɨk tɔːntɨpontɨ tülä säqɨtqolamna kɨpɨlʼoː kotajaːqɨntɨ utiːqɨntɨ orqɨlpɨtɨj.
Na kotajatɨ šittɨ näqɨrıːntɨlorɨnʼnʼɨ, kuttar nʼäjɨm säqaltɛntɨŋɨt.
Mačʼɨl loːsɨ olä sajɨtɨ mərqɨ ɛsa.
İmaqota muntɨk säqalnɨt nʼäjɨm, ponä əːtɨkɔːlɨk kojjɨmɔːnnɨ.
Mačʼɨn loːsɨ (ɔːmtɨjqo) mɔːtan ɔːqqɨn čʼəm orqɨlnɨt imaqotam.
İmaqota sukɨltä piːqɨllä mačʼɨl loːsɨm orqɨlnɨt šuk tɔːpoːmɨn nɨːnɨ nɔːtɨ mɔːtɨn ɨːlantɨ čʼoqqačʼčʼɛːŋɨt.
İmaqota nɨːnɨ qənnɨ.
Toːnnamɨ topɨmtɨ kekkɨsä üːqɨlnɨt koptantɨ.
Nɔːtɨ tɛnɨrpa mačʼɨl loːsɨ (ɔːmtɨjqo):“ Mat qaj kətɛntam ɔːmɨnʼeːiːqäŋ, kətɛntam mol qaj imaqota man nɔːnɨ nʼäjɨm piːtɨsɨt?
Aša, nılʼčʼɨj ürɨ aša ɛːŋa”.
Qumiːtɨ čʼəm tüŋɔːtɨn, ämtä qajɨm čʼäːŋkɨ meːptätɨ mačʼɨn loːsɨ.
“Tat qäːqa nʼäjɨm čʼäːŋkɨ meːptäl”,– soːppɨnʼnɔːtɨn ɔːmɨnʼeːiːtɨ.
“Ja, man qüːtälɨsak, aj nuːnɨčʼɨsak täːlɨ čʼeːlɨ, natqa čʼäːŋkɨ meːptäm nʼäjɨm”,– tomnɨt mačʼɨl loːsɨ.
Qaj meːtɨntɔːtɨn, olqa qonnɨmpɔːtɨn qumiːtɨ.
Täːlɨ məšɨlä olqa amɨrpɔːtɨn, nɨːnɨ aj suːrɨjjä qənpɔːtɨn.
Nʼäjɨm meːqa qəːčʼɨmpɔːtɨn säqqɨm loːsɨm (säqqɨn ɔːmtɨjqo).
Aj nılʼčʼɨj ürɨ.
Aj imaqota säqqɨn loːsɨn nɔːnɨ toː piːtɨmpat.
Qumiːtɨ tülä čʼəm soqɨnʼčʼɔːtɨn aj mol qäːqa nʼäjɨm čʼäːŋkɨ meːntal, toːnnamɨ (säqqɨn ɔːmtɨjqo) mol nuːnɨčʼɨsak da olap čʼüsɨntɨ.
Amɨkɔːlɨk aj qonnɨmpɔːtɨn.
Qarɨn məšɨlä olqa amɨrpɔːtɨn.
Nʼäjɨm meːqa qəːčʼɨmpɔːtɨn toːn loːsɨm.
Təpɨn nɔːnɨ aj na imaqota piːtɨmpat meːpɨj nʼäjtɨ.
Aj nılʼčʼɨj ürɨ ɛsɨmmɨntɨ kuttar mačʼɨn loːsɨsä aj säqqɨn loːsɨsä.
Nɔːt qaj meːtɨntal, tɛːttɨmtälɨj čʼeːlɨ qalɨmpa Markɨnʼčʼa.
Tüm čʼɔːtälɔ̄llä nʼäjɨm qarrä omtɨltɨmpat nɨːnɨ nɔːtɨ ətɨŋɨt kuššan pinta nʼäjtɨ.
Konnä iːlä šittɨ maːtɨŋɨt mol qaj pimpa qaj čʼäːŋkɨ, sajɨntɨ kuːroːqɨn okoškaːqɨntɨ qos qaj lanʼkɨmɔːttɨ.
Ukoːn nık na üntɨčʼčʼɨt, kalʼtopkaːqɨntɨ qos qaj sajqɨmmɨntɨ, puːn seːpɨlak ɛːlä nılʼčʼɨj imaqota na šeːrɨ, olɨtɨ mitɨ sɨrɨ, utiːqɨntɨ kɨpəː kotaja orqɨlpɨntɨt.
Əːtɨkɔːlɨk nʼäjɨm na kotajaːqɨntɨ na säqɨtqolamtɨt.
Kuttar nʼäjɨm säqältɛntɨŋɨt nılʼčʼɨk kotajatɨ šittɨ näqɨrıːntɨlorɨnʼnʼɨ.
Markɨnʼčʼa olä sajɨtɨ mərqɨ ɛsa, qaj imaqota əːtɨkɔːlɨk nʼäjɨm iːntɨlorɨnʼnʼɨt.
İmaqota əːtɨkɔːlɨk ponä kojjalta.
Markɨnʼčʼa paktɨlä imaqotam nɨː mɔːtan ɔːqqɨn orqɨlnɨt soːjmɨntɨ.
İmaqota nɨːnɨ qättɨqolamtɨ.
Markɨnʼčʼa imaqotam mɔːtɨn ɨːlɨt čʼiːtɨ qɔːttɨsä čʼoqqačʼentɨŋɨt.
İmaqota laŋkälɨntɨ:“ İːjəː, nɔːt toː šim üːtäšɨk, nʼäjlɨ moqɨnä mintam, aj qaj kɨkɨntal namɨ minnɨntak, šintɨ imattɛntak”.
“Man šintɨ üːtɛntak, kekkɨsä mat kuːnɨ šintɨ qontak”,– (tomnɨt) soqɨnʼčʼa Markɨnʼčʼa.
“Čʼeːlɨn mašɨm peːqɨllä qənäš, čʼeːlɨt čʼontoːqɨn məttɨm na qonnɨntal, na məttiːmɨn sä qəlläntɨ”.
Markɨnʼčʼa tɔːptɨj čʼeːlɨ nɔːt na qənmɨntɨ imaqotam peːlä.
Čʼeːlɨ kuntɨ kurɨtpa, čʼeːlʼ čʼontoːqɨn nɔːtɨ na məttɨm qommɨntɨt.
Məttɨm nʼoːmpat, nʼoːmpat.
Ukɨ čʼontoːqɨn məttɨn čʼiːpoːqɨn təttɨ puːtɨntɨ mü qommɨntɨt.
Na müš šüːmɨn, tɛːmtɨm sɔːrɨlä ıllä na patpɨntɨ.
Ilqɨn seːlʼčʼɨ mɔːtat tɔːqɨn na imaqota ɔːmnɨntɨ.
“Kɨssa, kunɛː tına tomtɨjmɨl”,– soqɨnʼčʼa Markɨnʼčʼa.
“Tıː ınnä tannɛntɔːmıj”,– tomnɨt imaqota.
Markɨnʼčʼa tomnɨt, mol man uːkɨn sɨːqɨltɛntak.
“Ukoːn man uːkɨn sɨːqɨltɛntak”,– tomnɨt imaqota.
“Tan aša orlɨ čʼäːŋkɨ, kuttar tan mašɨm üːqɨltɛnnantɨ”,– tomnɨt Markɨnʼčʼa.
“Man imaqotaj loːsaŋak, man uːkɨn, man šintɨ üːqɨltɛntak, ɨkɨ ɛnäš”,– tomnɨt imaqota.
İmaqota uːkɨn sɨːqɨlpa ınnä, nɨːnɨ Markɨnʼčʼa na sɨːqɨlpɨntɨ, imaqota aj näkäŋɨt.
Markɨnʼčʼa ompä ınnä tulɨčʼčʼɛnta, imaqota paŋɨsä tɛːmtɨp tiː mattɛːŋɨt.
Markɨnʼčʼa ıllä alʼčʼa.
İmaqota nɨːnɨ qənnɨ.
Markɨnʼčʼa nɔːtɨ tɛnɨrpa:“ Man tɨmtɨ aj na quntak ınnä sɨːqɨlqa tačʼallä”.
Tɨmtɨ tɛnamtɨŋɨt əsɨmtɨ (loːsɨm).
Kekkɨsa əsɨmtɨ tɛnamtɨŋɨt, kuššak kuntɨ loːsɨ qöːqɨntɨ nɨŋɨntɨ.
“İːja, qajal kuttar ɛsɨntɨ, qäːqa šim tɛnamtantɨ”,– tomnɨt loːsɨj əsɨtɨ.
“Tam ınnä sɨːqɨlqa tačʼalpak”,– tomnɨt Markɨnʼčʼa.
Tɨmtɨ mulaltɨmpat kuttar imaqotam orqɨlpat, qaj imaqota Markɨnʼčʼanɨk meːqa olammɨmpa.
Nɨːnɨ kuttar təpɨm imaqota qətqa olampa.
“Tıː ınnä man šintɨ sɨːtɛntak.
Nʼɛnnä qənnantɨ, ɨlamäntɨ seːlʼčʼi nätäk na paktɛntɔːtɨn, čʼiːpɨj nätäm sä orqɨlläl, namɨ aj tan imantoːqa”,– tomnɨt loːsɨ.
Ɔːnɨj ınnä čʼəm sɨːqɨlnɔːqi, Markɨnʼčʼa nʼɛnnä kuraltäːqɨntɨ seːlʼčʼɨ nätäk ɨloːmɨntɨ paktɨmmɨntɔːtɨn.
Na poːsɨ čʼiːpoːqɨj mɨm orqɨlpat nɨntɨk aj moqɨnä qənnɨmpat.
Qumiːmtɨ üːtɨmpat, kutɨ kučʼčʼä kɨka näčʼčʼä qənnɨja.
“Soma qumantɨ, Markɨnʼčʼa, nɔːtɨ tan imap qoːsal.
Tan moqɨnä qənnantɨ, meː nʼɛnnä qəntɔːmɨt onɨt kɨːmɨt peːqɨnɨtqa”,– tomnɔːtɨn ɔːmɨnʼeːiːtɨ (mačʼɨn loːsɨ, säqqɨn loːsɨ i toːn loːsɨ).
Nɨːnɨ nɔːtɨ na šittɨ qənmɨntɔːtɨn.
Markɨnʼčʼa tümpa kun qumɨtɨt čʼɔːtɨ mɔːtɨm meːqɨlsɨt, kun qumɨtɨt čʼɔːtɨ qəːlɨm qarrä üːtɨsɨt.
Mərqɨ, mərqɨ qəːttɨ meːmmɨntɨt.
Qumɨn na qəːttoːqɨn Markɨnʼčʼam ɔːmtɨjqoːtqa meːmpɔːtɨn.
Markɨnʼčʼa na qəːttoːqɨn seːlʼčʼɨ toːt poːt kuntɨ ɔːmtɨjqoːttɨmpa.
Tıː qɔːtɨ ɨːrɨk ɔːmtɨjqoːtta.
Šöjqumɨj əːtɨsä čʼaptä muntɨk.