|
|
NEP |
Ɔːmtɨlʼ qoːlʼ ijalʼ čʼaptä.
|
|
|
|
Tämtɨqumi ira nɔːkɨr ijatɨ ɛːppɨntɨ.
|
|
|
|
Meːšat qopɨlʼ porɨqɨtɨ ɛːppa.
|
|
|
|
Nɨːnä ilʼimpa tämtɨt qumɨj ira, nɨːnɨ illa, illa, illa, qumpa.
|
|
|
|
Nɔːkɨr iːjatɨ (/iːjeiːtɨ) qalʼa (/qalɔːtin).
|
|
|
|
Qoškɔːlɨk ilɨmpɔːtɨn.
|
|
|
|
Ukkɨr ɔːmtilʼ qoːt nʼälʼatɨ ɛːppɨntɨ (/ɛːppa).
|
|
|
|
Nɨːnä nälʼätɨ mɨkantɨ säŋkɨ iːppɨtɨ (/ınna iːmpatɨ).
|
|
|
|
Mɔːttɨ pɔːrɨntɨ aj mumpitɨj aj pirnatɨj ɨːtɨntɨtɨ.
|
|
|
|
Kutɨ mišeltantɨ munɨntɨ kəːsɨp aj pirnatɨ, nɨːnɨ mɨkantɨ säŋkij, kutɨ mišaltantɨŋɨtɨ (/mišalpatɨ, mišaltantɨtətɨ), na mutronäj (/təːtɨmpɨlʼ) qup namɨp iːtɨŋɨtɨ.
|
|
|
|
Ira kušaːqɨt quptäːqɨntɨ na nɔːkɨr iːjeːqɨntɨ nılʼčʼik kətɨŋɨtɨ: Tɛː mašıp ılla meːtäːqɨntıː mat qɨlqak tüla šäqɨkkolʼčʼimpɨŋɨt.
|
|
|
|
Märqɨ timnʼä sa (/timnʼätɨ) mat qöqak qontɨlʼantɨ.
|
|
|
|
Nɨːnɨ šitɨmtalʼi pit tat sa qontɨlʼantɨ.
|
|
|
|
Nɨːnɨ poːsä kɨpa iːjaːqantɨ meːšat qopɨlʼ porqɨlʼ iːjantɨnɨk kətɨŋɨtɨ: Əsɨmtɨt ılla meːla nɔːkɨr pit šäqɔːtɨt.
|
|
|
|
Nɨːnä meːšat qopɨlʼ porqɨlʼ timnʼätɨ nılʼčʼik kətɨŋɨtɨ märqa timnʼäntɨnɨk: Apa quptäːqɨntɨ nılʼčʼik kəttɨsɨtɨ.
|
|
|
|
Mat qummäk qɨlqak tülʼa qontoqa.
|
|
|
|
Morqä timnʼätɨ nʼenʼnʼimɔːnna meːšat qopɨlʼ porqɨlʼ timnʼaːqɨntɨ: Mat asʼa latarn mɨqɨt qontak.
|
|
|
|
Nɨːnä ılla qontɔːtɨn.
|
|
|
|
Pit poːsä kɨpa ijatät latarelʼ meːktantɨ konna kurolʼna.
|
|
|
|
Nɨːnä ılla qonta əsɨntɨ qöntɨ.
|
|
|
|
Qarɨnɨlʼ pit ınnä šitɨja.
|
|
|
|
Nılʼčʼilʼ čʼuntɨ nɨŋɨntɨ ola ɔːktɨ nɔːnɨ tü čʼɔːpɨmmɨntɨ.
|
|
|
|
Nɨːnɨ na čʼunɨntɨsä moqonä laqaltɛlʼčʼa.
|
|
|
|
Tülʼčʼa, čʼunɨmtɨ čʼuntɨlʼ mɔːttä ılla ətälʼčʼiŋɨtɨ.
|
|
|
|
Nɨːnä mɔːttɨ sʼeːrna.
|
|
|
|
Timnʼäqıtɨ qontɔːqıj.
|
|
|
|
Täp koptaːqɨntɨ ılla ɔːlʼčʼa.
|
|
|
|
Təpɨt koptɨ moqonäqɨt mɔːtat puːtɨlqɨt nɨmtɨ totta.
|
|
|
|
Toːnna timnʼaːqıtɨ nennɨlʼ sʼünčʼaːqɨntɨ nɨmtɨ qonternɔːqıj.
|
|
|
|
Timnʼäːqıtij ınna məsʼɔːqıj.
|
|
|
|
Tümti čʼɔːtɨlʼa čʼajniktɨ muširɨŋɨtɨ.
|
|
|
|
Qapija na nɔːkɨr timnʼasɨt imatɨt čʼäːŋka.
|
|
|
|
Nɨːnä meːšat qopɨlʼ porqɨlʼ timnʼatɨj ınna məjsʼa.
|
|
|
|
Amɨrquntoːqa omta.
|
|
|
|
Märqɨ timnʼatɨ nʼenʼnʼimɔːnna: Tat lataret iːqɨt qontɨpɨlʼ loːsantɨ amɨrquntoːqa aj mɔːtɨrnantɨ!
|
|
|
|
Tap čʼoːilʼ pakalɨp ütɨŋɨtɨ.
|
|
|
|
Toːtna šitä timnʼäsɨqaːqa pona tantɔːqıj ɔːmtɨlʼ qoːt mɔːttɨ qəmmantiqa (/qɨnnɔːqı tıː), ɔːmtilʼ qoːt nälʼän mɔːttɨ qənqɨntıːqa.
|
|
|
|
Ɔːmtilʼ qoːt nälʼa munɨntɨ kəːsɨp aj mɨkantɨ səŋkij aj pirnatɨ mɔːtɨt pɔːrontɨ nɨː ɨːtɨmpat qumɨtɨt oraqa.
|
|
|
|
Kutä orqɨlʼtɛntɨnɨtɨ namɨ, ɔːmtɨlʼ qoːt nälʼap iːtɨŋɨtɨ.
|
|
|
|
Poːsukɨlʼ pɔːrɨqɨt mɨkantɨ säŋkɨjip mišeltɛntɨŋɨtɨ.
|
|
|
|
Šitɨmtälij pit munäntɨ kəːssɨ, nɔːkɨrtälij pit– pirnatɨ mišeltɛntɔːtɨn.
|
|
|
|
Nɨːna na čʼeːlʼi čʼeːlʼatɔːtɨt.
|
|
|
|
Meːšat qopɨlʼ porqɨ ɔːmtɨlʼ qoːt čʼɔːtɨ üːtɨlʼ (/üːtɨtɨ) tunta.
|
|
|
|
Nɨːna üːtɨt lɨpkomɔːlʼlʼa qumɨt čʼuntɨsa oraqolamnɔːtɨt ɔːmtɨlʼ qoːt nälʼat mɨkat säŋkɨlʼ aj munäntɨ kəːssɨ, nɨːn pirnʼatä.
|
|
|
|
Təpɨt tɨmnʼaqä aj čʼuntɨsä oraŋɔːtɨt qumɨtɨsa.
|
|
|
|
Ɔːmtɨlʼ qoːt mɔːtɨp kolʼiraltɨmpɔːtɨt.
|
|
|
|
Qumɨt qaj qɔːn ɛːŋɔːtɨt ɔːmtɨlʼ qoːt nälʼap iːqɨntɨtqa.
|
|
|
|
Ɔːmtɨlʼ qoː ira aj nälʼatɨ mannɨmpatıj, kutɨ mišaqat orqolʼnɨtɨ.
|
|
|
|
Ni kutɨ orqoltäːtɨ čʼäːŋka.
|
|
|
|
İlla qəːqɨlnɔːtɨt.
|
|
|
|
Nɨːnä moqona qənnɔːtɨt.
|
|
|
|
Meːsʼa qopɨlʼ porqə ɔːmtɨlʼ qoːt mɔːttɨ poːlʼ tuːnta aj ütɨlʼ toːnta.
|
|
|
|
Nɨːna ılla qontɔːtɨt.
|
|
|
|
Tɨmnʼaːqıtɨ poːnʼerolʼčʼimpɔːtɨt.
|
|
|
|
Šitɨmtalilʼ üːtɨt čʼontaqɨlʼ tɨmnʼäntɨnɨk nılʼčʼik kətɨŋɨtɨ: Tat qaj äsäntɨnäk asʼa qəlla sʼäqanantɨ.
|
|
|
|
Äsalʼ tinta nılʼčʼik topsɨtɨ sʼitɨmtalilʼ pit tat šäqɨquntaːqa.
|
|
|
|
Täp nʼenʼnʼimɔːnnɨ: Mat asʼa latarɨt iːqɨt qontak.
|
|
|
|
Onantɨ qəlla qontasʼik.
|
|
|
|
Täp nʼennɨ ɛsa əːtɨkɔːlɨk.
|
|
|
|
Nɨːna ılla qontɔːtɨt.
|
|
|
|
Sʼeːplʼaklɔːqɨ ippa.
|
|
|
|
Timnʼäːqıtɨ qontalʼɛlʼčʼɔːqa.
|
|
|
|
Nɨːna ınna mɨsʼäla pona tantalʼa konna kurolʼna, əsɨntɨ qəlat qanɨktɨ tülʼa ılla qonta.
|
|
|
|
Nɨːna sʼeːplʼak qontalʼɛıːmpa.
|
|
|
|
Nɨːnä ınna šitäja, kəntɨtä montɨ iːlečʼa.
|
|
|
|
Nɨːnä: Montɨ nılʼčʼilʼ soma porqə čʼoːnammɨntak.
|
|
|
|
Uːkalʼ porqanɨ nɔːnɨ som ɛːŋa.
|
|
|
|
Aj nılʼčʼilʼ sappaq aj ükkə, (təp pos/ täp kos) qaj šip čʼoːnɨmmɨntä.
|
|
|
|
İnna məjsʼila karra laqaltɛlʼčʼa.
|
|
|
|
Nılʼčʼilʼ čʼuntɨtä mitä seːjtä (/sıːčʼa), uːkalʼ čʼuntanɨ nɔːnɨ som ɛːŋa.
|
|
|
|
Čʼunnantɨ iːntɨ omtɨıːla kara laqaltɛlʼčʼi.
|
|
|
|
Tına uːkolʼ čʼunnɨmtɨ kučʼa üːttɨmpɨsɨtɨ.
|
|
|
|
Nɨː üːttɨŋɨtɨ.
|
|
|
|
Aj porqɨlʼ čʼɔːktɨ toː iːla aj nɨː ɨːttɨŋɨtɨ.
|
|
|
|
Nɨːnä na čʼeːla čʼeːlatɔːtɨt.
|
|
|
|
Ütɨlʼ tuːnta.
|
|
|
|
Təpɨtɨt mɨːqɨt nɔːkɨr čʼuntɨtɨt ɛːjppɨntɨ qoštilʼ.
|
|
|
|
Na üːtɨn lɨpkɨmɔːnna.
|
|
|
|
Təp moqɨna tüŋa.
|
|
|
|
Timnʼaːqıtɨ ɨːrɨk moqonä čʼäːŋka tiptäːtij.
|
|
|
|
Təp čʼɔːjtɨ muširɨlʼa amɨrna.
|
|
|
|
Qumɨt qaqɨllaliqolamnɔːtɨt (/qɨqɨlʼlʼä qɨːqɨlnɔːtɨn).
|
|
|
|
Qumɨt kuras asʼa ata.
|
|
|
|
Qapija kutä misʼaltɛntɨŋɨtɨ.
|
|
|
|
Kurkom kolʼeraltɨmpɔːtɨt mɔːtät ɔːmɨqät.
|
|
|
|
Mɔːtät čʼontɨsʼak paktɨrɔːtät čʼuntɨsa.
|
|
|
|
Čʼuntɨtɨt ɔːmɨqät ılla alʼčʼa (/alʼčʼikka).
|
|
|
|
Nɨːnä ınna paktɨraltɨlʼa aj nennɨ qoptɨraltɨmpɔːtɨt.
|
|
|
|
Na iːjalʼa aj nɨmtɨ ɛːŋa.
|
|
|
|
Mannɨmpatɨ, qapija tɨmnʼaːqıtɨj aj nɨmtɨ qoptɨraltɨmpatij.
|
|
|
|
Na pit, nɔːkɨrtalij pit täp ontä qontɨpsa pittə.
|
|
|
|
To moːraːqɨt əsɨtɨ nılʼčʼik soqɨsʼpatɨ: Tat nɔːkɨrtalij pit onantɨ sa qontɨlantɨ.
|
|
|
|
Qapija täp namɨmtɨ tɛnɨrpatɨ.
|
|
|
|
Təpɨt porqɨ muntɨk natɨmpa.
|
|
|
|
Soma mɨp sʼeːrqa asʼa kɨka.
|
|
|
|
Timnʼäntɨlʼ mɨqaːqɨ moqɨna tüla čʼoːip ütɨmpatıː.
|
|
|
|
Nɨːnä nılʼčʼik mulaltɨmpatij (/koŋpɔːtɨn): Ni kutɨ asʼa iːtotɨ.
|
|
|
|
Nɨːna na pit aj šäqɔːtɨt.
|
|
|
|
Nɨːnɨ meːšat qopɨlʼ porqə ınna mesila (/miššala) aj əsɨntɨnɨk kurolʼna.
|
|
|
|
Tüla əsɨntɨ qɨlat qanaktɨ ılla qonta.
|
|
|
|
Nɨːnä aj qarnɨlʼ pit ınna čʼa sʼitɨje: Aj nılʼčʼilʼ soma porqə čʼoːnɨmmɨntak.
|
|
|
|
Aj nılʼčʼilʼ soma sappoq.
|
|
|
|
Nɨːnä čʼuntätɨ.
|
|
|
|
Ɔːktɨ nɔːnɨ ola tü məsʼalʼlʼɛːntɨ (/mišalnɨtɨ).
|
|
|
|
Nɨːnä čʼunnäntɨ iːntɨ omtɨlʼa moqona laqaltɛlʼčʼa.
|
|
|
|
Ola mɛrkɨ mišalʼmɨtɨ.
|
|
|
|
Čʼunnɨmtɨ aj tınta kut üːttɨkkɨŋɨtɨ uːkalʼ čʼunnɨmtɨ aj nɨː ılla üːttɨŋɨtɨ.
|
|
|
|
Nɨːna moqonä mɔːtqɨntä tüla amɨrnɔːtɨt.
|
|
|
|
Nɨːnä aj čʼeːlatɔːtɨt.
|
|
|
|
Nɨːnä uːčʼela qənnɔːtɨt.
|
|
|
|
Təp aj ütɨlʼ tuːnta.
|
|
|
|
Timnʼaːqıtɨ aj täpaqı uːčʼɔːqə.
|
|
|
|
Üːtɨt aj lɨpkɨmɔːlla aj qoptɨraltɨmpɔːtɨn.
|
|
|
|
Nɨːna na ija nılʼčʼik tɛnɨrpa: Mat qɔːtə aj qəssaŋ ɛna.
|
|
|
|
Nɨːnä təp pona tanta.
|
|
|
|
Tına poːsɨkɨlʼ pɔːrɨqɨt tattɨpɨlʼ čʼunnɨmtɨ pona mišalla taqtaltɛlʼčʼa.
|
|
|
|
Nɨːnä čʼunnɨntɨ iːntɨ omtɨıːla laqaltɛlʼčʼa.
|
|
|
|
Takkɨlʼ pɛlammɨt kolʼimɔːnna ɔːmtɨlʼ qoːt mɔːtɨt qanɨmmɨt paktɨlʼa čʼunnentɨsa mɨkantɨ säŋkɨjip mišelʼlʼä.
|
|
|
|
Nɨːnä qəntɨkkɨtä.
|
|
|
|
Aj tına qumɨt tümpa, näčʼi laqaltɛlʼčʼa.
|
|
|
|
Nɨːnä moqona tülʼčʼena.
|
|
|
|
Čʼunnɨmtɨ ılla əːtteŋɨt.
|
|
|
|
Mɔːtqɨntɨ mɔːttɨ sʼeːrna.
|
|
|
|
Tülʼ tɔːktɨ čʼɔːtäntɨtɨ.
|
|
|
|
Nɨːnä tɨmnʼaːqıtɨ moqona tüŋɔːqı.
|
|
|
|
Nılʼčʼik mulɨmpɔːqıj: Ɔːmtɨlʼ qoːt nälʼat mɨkat säŋkɨjep täp qos qaj namɨšak čʼatkɨsɨmɨlʼ qaj misʼalnɨtɨ.
|
|
|
|
Na iːja əːtɨkɔːlɨk ɔːmta.
|
|
|
|
Mɨta takkɨmɨt latarɨlʼ qətɨt čʼiːpaːmɨt kolʼimɔːlla tüla mišalsɨtɨ.
|
|
|
|
Nılʼčʼilʼ čʼuntatɨ, mitɨ mol qıšqat saji, məsʼalʼlʼɛːmmɨntɨ (/mišalʼmɨtɨ).
|
|
|
|
Qontɨrɔːmɨt čʼäːŋka.
|
|
|
|
Nılʼčʼik mulaltumpɔːtij.
|
|
|
|
Nɨːnä ılla qontɔːtɨt.
|
|
|
|
Tɔːptilʼ qarät aj qəntɔːtɨt uːčʼela.
|
|
|
|
Nɨːnä üːtät aj munäntɨt kəːsɨp oralʼa qəntɔːtɨt.
|
|
|
|
Nɨna üːtɨt uːčʼiptäːlʼ mɨn nɔːnɨ moqonä tüŋa.
|
|
|
|
Qumɨt aj qaqlelɔːtɨt (/qaqletɔːtɨt).
|
|
|
|
Täpɨt timnʼäːqa aj tına qostilʼ čʼunnɨntij lʼıːpɨsa qaqlɨttɔːqə.
|
|
|
|
Nɨːnä təp pona tanta.
|
|
|
|
Tına čʼontaqɨlʼ timnʼantɨ čʼɔːtätɨlʼ čʼunnɨmtɨ pona mišalla saralɔːlɨtɨ.
|
|
|
|
Nɨːnä laqaltɛlʼčʼi.
|
|
|
|
Aj tınta kutar kolʼimɔːssɨ aj munäntɨ kəːsɨp mišälʼlʼa.
|
|
|
|
Nılʼčʼik qənna ola mɛrkɨ mišaŋɨtɨ.
|
|
|
|
Qumɨt mannɨmpɔːtät təp kos qajilʼ loːsɨ iːkkɨtɨ.
|
|
|
|
Nɨːnä ukkurtɨk təp moqona laqaltɛlʼčʼe, čʼunnɨmtɨ aj ılla əːttelʼčʼiŋɨtɨ (/üːteŋɨtɨ).
|
|
|
|
Üːtɨt ɔːmtɨlʼ qoːt nälʼä nılʼčʼik čʼiːta: Täp kos namɨsʼäk čʼatkɨsɨmɨlʼ qaj iːŋɨtɨ.
|
|
|
|
Kurastɨ aj čʼuntɨtɨ asʼa ata.
|
|
|
|
Timnʼäntɨlʼ mɨqaːqa moqäna tüla aj nılʼčʼik mulaltimpɔːtij: Munɨntɨ kəːsɨp aj na misʼaltɔːtɨt.
|
|
|
|
Təp kos qaj namɨsʼak čʼatkɨsɨmɨlʼ ɛːsʼa.
|
|
|
|
Təp əːtɨkɔːlɨk ɔːmta.
|
|
|
|
Toːnna timnʼaːqätij nılʼčʼik čʼiːtokkɨjesʼa: Tap tätaqɨlʼ qup iːŋɨtɨ.
|
|
|
|
Mänɨlʼ pɛlʼaqqɨlʼ qup iːŋɨtɨ.
|
|
|
|
Tiː ukkur pirnatɨ qalentɨ.
|
|
|
|
Nɨːnä üːtɨt ılla qontɔːtɨt.
|
|
|
|
Täːli aj qəntɔːtɨt.
|
|
|
|
To moːroːqɨt əsɨtɨ nılʼčʼik soqɨspatɨ, quptäːqɨntɨ.
|
|
|
|
Tɔːptɨlʼ qarɨt asʼa qənqolomna uːčʼila.
|
|
|
|
Mɔːtqɨntɨ čʼeːlʼata.
|
|
|
|
Toːnna timnʼaːqıtij qənpɔːqıj uːčʼila.
|
|
|
|
Təp ɔːmtɨlʼa nılʼčʼik tɛnɨrpa: Mat tap üːtɨt aj qəntak.
|
|
|
|
Qumɨt qaqlɨttɔːtɨt.
|
|
|
|
Təp pona tanta aj ontɨ čʼɔːtätɨlʼ čʼunnɨmtɨ saralnɨtɨ.
|
|
|
|
Nɨːnä čʼunnäntɨ iːntɨ omtäla laqaltɛlʼčʼa.
|
|
|
|
Təp nılʼčʼilʼ soma porqɨtɨ ɔːmtɨlʼ qoːt porqɨp mennɨmpatɨ, namisʼak soma porqatɨ.
|
|
|
|
Nɨːnä kolʼimɔːnna aj səpɨtäŋɨtɨ (pirnantɨ).
|
|
|
|
Ɔːmtɨlʼ qoːt nälʼa mannɨmpatɨ, aj əsɨtɨ.
|
|
|
|
Nɨːnä əsɨtɨ nılʼčʼik čʼiːta: Täːlä tap qəːtɨt tolʼ qup muntɨk taqqalte.
|
|
|
|
Nɨːnä karmattɨ muntɨk mantaltukkatɨ, misʼaqat kutɨ mɨqat qoŋal.
|
|
|
|
Nɨːnä timnʼaːqıti moqonä tüla nılʼčʼik čʼiːtɔːqı: Aj mišaltɔːtɨt pirnatə.
|
|
|
|
Tɔːptɨlʼ qarɨt ɔːmtɨlʼ qoːt nälʼa qumɨtɨp muntɨk taqqɨlnɨtɨ.
|
|
|
|
Nɨːnä omtä, mantaltukkɨŋɨtɨ qumɨtɨt karmanɨp.
|
|
|
|
Nʼi kut čʼäŋka.
|
|
|
|
Təp meːšak qopɨlʼ porqə karmatqɨntɨ nɨmtɨ wärɨŋɨtɨ.
|
|
|
|
Təpɨt timnʼaːqıt karmanɨp aj mantaltukkɨŋɨtɨ.
|
|
|
|
Meːšak qopɨlʼ porqɨ mɔːtqontä ɔːmtɨla čʼeːlata.
|
|
|
|
Təp qoštilʼ porqɨlʼ peːmɨ seːrpɨntɨtɨ.
|
|
|
|
Montɨlʼ tɔːktɨ mitɨ sıːčʼi.
|
|
|
|
Əsɨtɨ nälʼantɨnɨk nılʼčʼik čʼiːta: Täːle meːšat qopɨlʼ porqɨlʼ qumɨtɨp taqqɨlka.
|
|
|
|
Mišaqat kutɨt karmatqɨt qoŋal.
|
|
|
|
Tɔːptɨlʼ čʼeːlʼit taqqɨlnitə.
|
|
|
|
Nɨːnä topɨtɨt karmanɨp ɔːmtɨlʼ qoːt nälʼa omtɨ, mantaltukkɨŋɨtɨ.
|
|
|
|
Nɨːnä na irat ijat karmatqɨt nɨmtɨ qoŋɨtɨ.
|
|
|
|
Ɔːmtɨlʼ qoːt nälʼa čʼuːrqɨlna.
|
|
|
|
Əsɨtɨ nılʼčʼik kətɨŋɨtɨ: Ukoːt qajqa ɨːtɨsal.
|
|
|
|
Əsɨt iratɨ nʼenʼnʼimɔːnna.
|
|
|
|
Tiː kutar kɨkantɨ, nılʼčʼik ilasʼik.
|
|
|
|
Təp qoštilʼ ijalʼ lıːpɨ säːqɨ wočʼik ɛːŋa, tamɨlʼ nʼuːqotä.
|
|
|
|
Nɨːna əsɨtä kutar meːtɨŋɨtɨ: mɛntalʼ panʼantɨ üːtɨŋɨtɨ.
|
|
|
|
Tɔːptɨlʼ qarat nılʼčʼilʼ mɔːt ɔːmnɨntɨ jarɨk lipkɨmpa.
|
|
|
|
Təːptɨlʼ qarɨt əsɨtɨ pona čʼäp tanta, tına panʼe lʼıːpɨ tüsa čʼɔːtajotɨ.
|
|
|
|
Ira nɨrkɨmɔːnna.
|
|
|
|
To mɔːttɨ qumɨt kuralʼnɔːtɨt.
|
|
|
|
Tına qumaqı nılʼčʼik taqtaltɨmpɔːqa, nʼuːqɨtɨj jarɨk lɨpkɨmpa.
|
|
|
|
Nɨːnɨ əsɨtɨ təpɨtɨt mɔːttɨ puːlɨsa soqola sʼeːrna.
|
|
|
|
Nälʼatɨ nɨlaıːlla ınna orqɨlnɨtɨ.
|
|
|
|
Mat tat ponä sʼıp üːtɨtäŋantɨ čʼuːrɨsak.
|
|
|
|
Tɔːntɨpoːt iːqɨt nɨkɨrlaka ippentɨ.
|
|
|
|
Namɨ omtɨ (/ompi) šitɨ ɔːlʼčʼantɨ.
|
|
|
|
Nɨːnɨ qumɨtɨp taqqälʼlʼä üːtɨmpɨqɨlomnotɨ.
|
|
|
|
Opsɨtɨt üːttet, ontɨ tottɨjɛnta.
|
|
|
|
Ɔːmtɨlʼ qoːt kutɨ pɔːrɨlʼ qumɨiːmtä muntɨk taqqalpatɨ.
|