|
|
NEP |
Ukkɨr ijatɨ ɛppɨmmɨnta, neːkɨtɨlʼ pɛlɨkɨtɨlʼ.
|
|
|
|
Na tɛntɨlʼ, aše čʼaptä.
|
|
|
|
İra ilɨmpa, quːtalʼpa.
|
|
|
|
Na šolʼqumɨlʼ ira tapplʼälʼ qolʼtit pɛlʼaqqɨt ilɨmpa.
|
|
|
|
Poːkɨtɨlʼ tətɨt toːčʼiqɨt iːlɨmpa tintena qüːtälpa.
|
|
|
|
Ukkɨr ijatɨ pɛlɨkɔːtɨlʼ neːkɨtɨlʼ.
|
|
|
|
Ni nälʼatɨ čʼäŋka ni qajtɨ čʼäŋka.
|
|
|
|
Nɨnɨ əsɨtɨ qüːtäla na ijalʼa.
|
|
|
|
Na ija qapıja nɨmtɨ ila, əsɨntɨsä əmɨntɨsä.
|
|
|
|
Tontɨ šitɨ qäːlɨlʼ timnʼäsɨt ɛppɨntɔːtɨt.
|
|
|
|
Qäːlʼ irä puːčʼčʼɛnta.
|
|
|
|
Tɨntäna ira ıllä quŋa.
|
|
|
|
Tintena qäːlʼ ira kučʼčʼä qattɛnta.
|
|
|
|
Toː timnʼäntɨnɨ puːŋa.
|
|
|
|
“İrra qunta, ıllä meːŋɔːtɨt”.
|
|
|
|
Šittälʼ imaqotatɨ qüːtälʼlʼä, aj ıllä quŋa.
|
|
|
|
İralʼ mɨqä ijatɨt nejkɔːlɨ pɛlɨkɔːlɨ qala.
|
|
|
|
Kučʼčʼä qattɛnta.
|
|
|
|
Na qäːlʼi ira šittalʼ tɔː puːtɨmpatɨ.
|
|
|
|
Märqɨ ijatɨ nılʼčʼilʼ ijatɨ ɛppɨmmɨnta.
|
|
|
|
Puːtɨŋɨtɨ ɔːtätɨ aj čʼäːŋka.
|
|
|
|
Ɔːtäkɔːlɨk topɨsä ilɨmpɔːtɨt.
|
|
|
|
Nɨmtɨ ilɨmpɔːtɨt.
|
|
|
|
İlɨmpɔːtɨt, tɔː puːlʼä, qälʼɨ-irat mɔːttɨ.
|
|
|
|
Qälʼɨ irra ijatɨ čʼäŋɨmpa.
|
|
|
|
İjakɔːtɨlʼ imatɨ.
|
|
|
|
Toːna čʼontolʼ timnʼatɨ ukkɨr nälʼätɨ pɛlɨkɨtɨlʼ.
|
|
|
|
Takkɨnɨ nʼänna šitɨ qälɨk tüːŋa.
|
|
|
|
Poːkɨtɨlʼ təttoqɨnɨ na qälʼi ira najɛnta.
|
|
|
|
Kuššalʼ tamtɨrtɨ ɔːtäp muntɨk taqqɨšpatɨ.
|
|
|
|
Nılʼčʼik tüːŋa.
|
|
|
|
Na tɨmnʼasɨka ilɔːtɨt na iralʼ tɨmnʼäsɨka šittɨ.
|
|
|
|
Tɛːttɨ toːt ɔːtäqitɨ.
|
|
|
|
Na iran ɔːtäp iqɨntoːqo tünta.
|
|
|
|
Qumintɨsä tüːnta.
|
|
|
|
Paːn iːra, nımtɨ aj najta.
|
|
|
|
Nɨnɨ tüːlä šäqqɔːtɨt na täpɨtɨt mɔːtqɨt.
|
|
|
|
Na ija aš tɛnɨmɔːtɨt.
|
|
|
|
“İːja kuttar taːpɨnɨk alʼčʼimpa?
|
|
|
|
Täp qaj muːtɨronak ila”.
|
|
|
|
Qup kuttar tɛnimɛntätɨ alʼpet ilʼäntɨlʼ qup.
|
|
|
|
Šäqqɔːtɨt.
|
|
|
|
Mompa nɔːrtälʼilʼ čʼeːlʼɨt toːqqɨt mompa Pan ira köt qupsä tüːŋa.
|
|
|
|
Qapija ɔːtäp tɔːqqɨqontoːqo.
|
|
|
|
Na tintena asästit ɔːtäp tɔːqqɨqo.
|
|
|
|
Kun mɔːntɨlʼ mɔːttɨ šentɨ kun mɔːntɨlʼ qajtɨ mun taqqalʼtɛntɨt.
|
|
|
|
Ukoːn nɔːta taqqɨlʼkolʼčʼimpat.
|
|
|
|
Qälʼitɨt ɔːtap taqqɨllä iːmpatɨ.
|
|
|
|
Nɨnɨ šittälʼ mɨŋa moqɨnä qənnɔːqij na qälɨkqıː.
|
|
|
|
Nɔːrtälʼilʼ čʼeːlʼit mompa tüntɔːmɨt.
|
|
|
|
Tɛː mumpa kučʼčʼä ɨkɨ qənnɨlɨt.
|
|
|
|
Šittälʼɨlʼ čʼeːlontɨ ınnä čʼeːlʼinna.
|
|
|
|
Na iːja nılʼ kətɨtɨt ilʼčʼantɨnɨk.
|
|
|
|
Mɨta nʼannät tɨmtɨ tɛːttɨ toːt ɔːtat nɨŋqɨkušalʼ nʼarop ɛːnta, načʼčʼä üːtälʼɨmɨt.
|
|
|
|
Qäːlʼit tüːntɔːtɨt ɔːtäp tɔːqqɨqolamnɛntɔːtɨt.
|
|
|
|
Ɔːtan upkɨt kəlʼčʼomɨntɨ kuntɨ kärɨpɨlʼ kutar meːtɔːmɨt.
|
|
|
|
Na iːja nık kəttɨŋɨt.
|
|
|
|
Nɨnɨ nık kəttɨŋɨtɨ.
|
|
|
|
Mäkkä mɨta šentɨ mɔːllʼet ɛːŋa, ilʼčʼa, mäkkä mitɨ.
|
|
|
|
A toːna tınte timnʼäntɨ nälʼa ilʼčʼatɨ natɨp kuralʼtɨmpatɨ.
|
|
|
|
Na iːjanɨk…
|
|
|
|
Nʼännät tɨmtɨ maːčʼelʼ tiːčʼi ɛːŋa.
|
|
|
|
Nɨmtɨ mɔːtɨŋnɛntak.
|
|
|
|
Šentɨ mɔːt tatɨŋɨt mɨta.
|
|
|
|
Üːtälnɔːtɨt taːlʼ.
|
|
|
|
Qapıje nɨ nɔːrtälʼilʼ čʼeːlɨ tüːntɔːtɨt Pan iralʼmɨt təpɨtɨtkiːne na qälɨ-irat ɔːtap taqqalʼqo.
|
|
|
|
Timnʼäsɨqät ɔːtäp nɨnɨ šittelʼ üːtältɔːtɨt.
|
|
|
|
Na ɔːtäp na tɔːqqäntɔːtɨt qapıj täm aj tɔːqqɨmpatɨ.
|
|
|
|
Mɔːssä na mintɔːtɨt.
|
|
|
|
Na mačʼit tičʼit nʼännälʼ pɛlʼäqqɨt nɨna mɔːtɨŋtɔːtɨt na imantɨsä.
|
|
|
|
Qapıje təttalʼ qälɨk qaj mɔːttɨ čʼaːŋka šentɨ mɔːttɨ qopɨlʼ mɔːttɨ.
|
|
|
|
Nɨnɨ šittälʼ šäqqɔːtɨt na imantɨsä.
|
|
|
|
Təptɨlʼ qarɨt nıŋ ɛsa.
|
|
|
|
Tıntena imantɨnɨk: mat mɨta nʼänna qumiːqäk koːnɨlʼäk.
|
|
|
|
Qaj mɨta mɔːtɨnpɔːtɨt qaj qaːtɔːtɨt.
|
|
|
|
Nʼännä laqaltelʼčʼa.
|
|
|
|
Nɔːkɨr qoptɨp sɔːrɨlʼa qapıja nɔːssarɨlʼ ɔːtäp qaltɨmmɨntɨt.
|
|
|
|
İja nʼanna qənnɛːja.
|
|
|
|
İːmatɨ ontɨ qala.
|
|
|
|
Na omta, na omta.
|
|
|
|
Ukkɨr tät čʼontoːqɨt čʼeːlʼɨtɨ üːtoːntɨ na qənna.
|
|
|
|
Na iːja lʼamɨk kəːŋa, nʼännät ukkɨr tot čʼontoːqɨt qup najap tatɨntɔːtɨt.
|
|
|
|
Takkɨnɨ Pan iralʼmɨt tatɨntɔːtɨt.
|
|
|
|
Köt qumtɨ qapıja ɔːtäp tɔːqqɨsɔːtɨlʼ.
|
|
|
|
Pan ira naššak qəːtɨsä ɛːŋa.
|
|
|
|
Nɨn šittalʼ na ija tülʼčʼikunä.
|
|
|
|
İmatä üŋkɨltimpatɨ.
|
|
|
|
Montɨ čʼap tüːlʼčʼa Pan iralʼmɨt qaj montɨ tüŋɔːtɨt.
|
|
|
|
Qaqlʼilʼ mɨtɨ nɨk tottälnɔːtɨt, poːqɨt eːtɨmantoːqɨt.
|
|
|
|
Mɔːttɨ šeːrna.
|
|
|
|
Mɔːtan ɔːt nɨŋkɨlʼa mɔːtan ɔːt kʼeː topɨmtɨ tupalkɨtɨ.
|
|
|
|
Peːmɨmtɨ na tupalnɨt.
|
|
|
|
Nı kəttɨŋɨtɨ Pan iranɨk nʼännä koraltɨlä.
|
|
|
|
Ɔːklɨ miːt olʼlʼa qolʼtɨt qəqɨt oːlʼa.
|
|
|
|
Taːlʼ na nʼänna paqtɨmpa na kupaksä täqalemmɨntɨtɨ.
|
|
|
|
Pan iralʼ mɨtɨp muːntɨkə lʼäpek qättɨmpat.
|
|
|
|
Ɔːmmɨtɨ qumpa Pan ira ilʼilä qalɨmpa.
|
|
|
|
Šittäqij ilɨlä qaːlɨmmɨnta.
|
|
|
|
Ponä qəlläitɨ.
|
|
|
|
Na iːja ukkur pɔːrɨ kupaksä täqalempatɨ.
|
|
|
|
Muntɨk porqäntɨ šunʼnʼontɨ (pümmɨntɨ šʼu) nʼölʼqɨmɔːtpotät.
|
|
|
|
Na qupɨlʼmɨt nɨnɨ šitälʼ ponä kälʼlʼeitɨ.
|
|
|
|
Eːtɨmannoːntɨ tintena qaqlɨ tüːr tolʼčʼitɨ na sɔːrälɨmpa.
|
|
|
|
Pan irap aj ponä itɨmpat (čʼatɨmpat).
|
|
|
|
Qapija muntɨk pona iːtɨmpat.
|
|
|
|
Illa omta malʼčʼalʼ tɔːqtɨ toː iːlʼä.
|
|
|
|
Amɨrlʼä ıllä ommɨnta šäqqa.
|
|
|
|
Na qumiːtɨ poːqɨt na ippälɨmpɔːtɨt.
|
|
|
|
Kuttar sarälɨmpa.
|
|
|
|
Nılʼčʼik šäqqa.
|
|
|
|
Tɔːptɨlʼ qarɨt ɨnnä wäša.
|
|
|
|
Pan ira nılʼčʼik tap wäntɨlʼ tɔːktɨ tɔːtɨk taŋkıːčʼimpa kekkɨsä sailʼatɨ qətɨmpa.
|
|
|
|
Toːna qälɨkqıtɨ ešo somalʼoqı ɛppɨmpa.
|
|
|
|
Nılʼ kətɨŋɨtɨ na ija mɨta na qälʼitɨtkiːnä.
|
|
|
|
Moqonä qəntat talʼtälʼlʼä untɨt qaqlɨntɨsä.
|
|
|
|
Nɨnɨ šittälʼ toːna meːqıj mɔːttɨ šeːrɨšpɔːtɨt.
|
|
|
|
Qaj amɨrpɔːtɨt, qaj aš.
|
|
|
|
Nɨnɨ tintena saralpɨtɨlʼ qaqlɨmtɨt nɨnɨ moqonä qəːčʼelʼlʼä na qumiːmtɨt qupɨlʼ qumiːmtɨ nık qəntɨŋɨt.
|
|
|
|
Takkɨ moqonä Pan iramtɨ aj kočʼilʼä qəntɨtɨ.
|
|
|
|
Qaj kɨka qəjitɨ qəntɨt.
|
|
|
|
Qənnatɨt tına.
|
|
|
|
Qumat somak qənnɔːtɨt, imantɨnɨ nık kətɨŋɨt.
|
|
|
|
“Mɔːlle toː tılätɨ, me nʼänna qəlʼlʼä qumɨtɨtkiːne”.
|
|
|
|
Aš tɛnimɨmpatɨ, ilʼčʼantɨlʼ mɨt qos qaj.
|
|
|
|
Nʼenna qənna tintena.
|
|
|
|
Onta aša koŋɨmpa.
|
|
|
|
Toːna imatɨ na kətälmɨntɨtɨ.
|
|
|
|
Əsɨntɨlʼ ilʼčʼantɨlʼ mɨqätkiːne.
|
|
|
|
İralʼ mɨt moqonä qəssɔːtɨt.
|
|
|
|
A nɨnä šittelʼ pijaka pija ni qaj aš tɛnimɔːtɨt.
|
|
|
|
Ta qənna.
|
|
|
|
Täpɨt ilʼčʼantɨ mɔːttɨ šernɔːqı.
|
|
|
|
Qaqlɨlʼ tɔːktɨ kurɨlʼä nılʼčʼik tottɔːtɨt.
|
|
|
|
Toːna qənmɨntɔːtɨt, moqɨnä na qənmɨntɔːtɨt.
|
|
|
|
Pan irä takkɨt kekkɨsa mɔːtqɨntɨ tulʼišpa ıllä qumpa.
|
|
|
|
Toːna šittɨ qumoːqı ilɨmpɔːqı.
|
|
|
|
Pan ira nimtɨ ɛːŋa.
|