This visualization was generated on 15.11.2021 with Corpus Services.

PMP Ilɨksaq warkɨsaq nimat igaiːndɨze.
Nimat qwälɨsku suːrɨsku čoburnɨŋ.
Qwälɨnniŋ, suːrunniŋ, čoburnɨŋ.
Nilʼdʼiŋ igaiːmt tʼönǯikaŋ orumǯilʼe taːdərat.
Iga iːt tʼeːlɨt tʼeːlɨntonando tʼönǯikaŋ oruwlʼe čaːǯiŋ.
Nu i warɣɨŋ oːrumnɨŋ.
Piːramt sanɨmnɨt.
Tʼeːrban: “Man tɨdam nimoum oneŋ wargu kɨgaŋ.”
Okkɨr tʼeːl nimandɨne tʼärɨŋ: “Nima, tan meŋga talʼel qomdem.
Man qwačont qwanǯaŋ.”
A nimat tʼärɨŋ: “Qajno tʼenga qomdem?“
Iga iːt tʼärɨŋ: “Qalʼemɨm taugu.”
Nimat mewɨt iga iːndɨne qomdem.
Iga iːt qwannɨŋ.
Čaːǯas, čaːǯas, qwačondə medɨŋ.
Qwačoɣɨn (palʼdʼisaŋ) qwajaŋ.
Kušaŋ qwajas, qwajas, qaimnej as taut.
Paːrannɨŋ kösse (qwesse).
Tibequm čaːǯaŋ, taːdərɨt kanam.
Kɨba aurga tʼärɨŋ tibequne: “A tan kutʼet taːdəral qanaŋ?”
Tibequm tʼarɨŋ: “A man taːdərau sɨgetkuː.”
Kɨba aurg tʼärɨŋ tibequne: “Ik sɨgedʼet kanam, miːrɨnt meŋga.”
Nilʼdʼiŋ i meːwadi.
Tibequm kɨba aurgane meːrɨnnɨt kanam.
Kɨba aurg andannɨŋ, kanakse üːbaŋ.
Čaːǯiŋ, čaːǯiŋ, kanam taːdərɨt.
Ondɨ tʼeːrban: “Nimou qaim meŋga kellɨs.
Qwädəmeːnǯiŋ, man qojɣalǯəmeːnǯaŋ.”
Nilʼdʼiŋ maːttə tüːan.
Kundar kɨba aurg teːrbɨsan, a maːtqɨn nilʼdʼiŋ i jezɨŋ.
Kundar maːttə seːrnɨŋ, nimat qostɨt tap kaimne ass taumbat.
Niːmat warɣɨŋ tʼüːwɨŋ warɣɨŋ qwädlʼe kɨbatʼälakane (kɨba indane).
“Tan qajno qomdem raqsaušlʼe taːdərau?
Man teŋga mezau qomdäm qalʼlʼem soːcʼka mɨm taugu.
A tan meŋga kanakse koːnčant.
Meŋga tannal tüdi pergɨm, tüdlaj aurgu.”
Nu i nilʼdʼiŋ qwädɨmbɨzak.
Aj seŋgaq.
Iga iːt qarimɨɣɨn aj übɨcʼilʼe üːbəraŋ.
“Nima, tan meŋga talʼlʼel qomdäm.
Man köcʼkulaŋ qwaːčont.
Kalʼlʼemgɨn uːdilaks tilʼdelʼi qomdäm paralǯlʼews.”
Nima tüːmban: “Tiːlʼdʼel qwassant, tüdə pergɨm tassal.
Tamdʼel aj nilʼdʼiŋ ʒa palʼdʼennaš.
Qomdem iːt kutʼednej ig malčeːt.
Awaj qaimnäj ik tawkeːt.”
Nilʼdʼiŋ i qwannɨŋ.
Medɨŋ qwačont.
Qwačont süntʼeɣɨn qwajaŋ, qwajaŋ.
Tilʼdʼzʼöːmp qaimnäj as tawɨt.
Nom üːdəmnɨŋ.
Tibequm čaːǯiŋ, taːdərɨt maːtqɨn wartäj nʼäure suːrumgam.
Kɨba aurk tʼärɨŋ: “Qaj taːderɨndal?”
Tibequm tʼärɨŋ: “Man taːdəraw maːtqɨn wartäj suːrumgam nʼäuri.”
Kɨba aurg tʼärɨŋ tibequne: “A tan qajno taːdəral?”
“Sɨgetku.”
“Ik sɨgedʼeːt, merɨnt meŋga.”
Tibequm tʼärɨŋ: “Tawet.”
Nu i kɨba aurgə tawɨt nʼäure suːrumgam.
Suːrumgaze paːrannɨŋ qwesse.
Maːtte tüan.
Nimat tʼärɨŋ: “A tan aj nilʼdʼzʼi tüdi perk tatal meŋga.
Na kriːklam tawelʼlʼe taːderal.
Qaj (qajze) tüsse abstɨmenǯau?”
Iga iːt tʼärɨŋ: “Nima, ik tʼüumbɨk.
A man oneŋ taow, oneŋ apstɨmeːnǯau.
Qwälɨjtʼenǯaŋ, suːrutʼenenǯaŋ, tast awstɨmeːnǯaŋ i suːrumgalau apstəmenǯau.
Nilʼdʼiŋ tʼönǯikaŋ ilʼenǯaj.”
Nimat tabne tʼärɨŋ: “No suːrusk, qwälɨsk!”
Seŋgaq.
Qarimɨɣɨn wazaq, aurnaq.
Iga iːt tʼärɨŋ: “Nima, tan meŋga talʼlʼel az warkaŋ qomdem.”
Nimat tʼärɨŋ: “Qaimnej az menǯau tamdʼel.
Kɨgant qwangu, olla qwanqɨ.”
Nu i iga iːt tʼerban: “Man i olla qwallats.”
Qwannɨŋ.
Čaǯis, čaːǯis, medɨŋ qwačond.
Qwačoɣɨn palʼdʼis, palʼdʼis selaj tʼeːlʼdzʼömp.
Tʼeːlɨt tʼelɨnt plʼekant medɨŋ.
Kɨbatʼälakane qogɨdʼiŋ laqčakaj paja.
“Tan kutʼet čaːǯant, kɨba aurk,” – paja tʼärɨŋ.
Kɨbatʼälaka tʼärɨŋ: “Tʼükkuzaŋ qwačont uːdʼäcʼku, meːsodimɨm ass kokow.”
“Qwallaj meŋga.
Man meːsodimɨm kocʼiŋ jen.”
Kɨba aurg laqčaj pajane lejdʼɨŋ.
Uːdiŋ, uːdiŋ.
Naː tʼel nilʼdʼiŋ uːdis, uːdis.
I teːlɨtne omdɨdeŋ.
A tap kundar uːdiŋ, nilʼdʼiŋ i uːdʼaŋ.
Tabɨm lejtəmpɨdi paja tʼärɨŋ: “Man warkaŋ pelgalɨk.
Mazɨm qudnej as peldɨmban.
A tan qomdäno maːderčannanǯ.
A manan qomdäum tʼäŋgwan.
A man teŋga miːlʼews qäːtsuj pürɨm.
Tau pür teŋga soːcʼkaŋ, soːcʼkaŋ udʼanǯiŋ.
Udoɣänt muːnantet tau pürɨm selʼdʼ paːr.
Tau püroɣɨn sappɨstenǯiŋ sədqwajjet orsuj qum.”
Qɨbatʼälaka teː munandɨt pürɨm, toː munandɨt pürɨm.
Sappɨstʼät sətqwajjet orsuj tibequm.
“Qaj tʼeŋga keregett?”
Kɨbatʼälaka tʼärɨŋ: “Meŋga tamdʼel qainej as keregeŋ.
Nane üŋgulǯumbalt meŋga.”
“Tau pürɨm todʼelɨlʼe qudnänej ig meqwet.
Ezendɨne, ewendɨne, nanʼändɨne, tɨmnʼändɨne, nimandɨne, pajandɨne, kudneːnej, kudneːnej ig miːqwet.”
Nu i kɨbatʼäla iːwat.
Nu i pajagam omdannɨt kɨba aurk.
Nu i kɨba aurk omdannɨt pajagam.
Üːbaŋ, medɨŋ maːtt.
Nimat tüːumba.
“Aj qaimnäj ass tannal.”
Iga iːt kujgalǯimban, qaimnäj as kätkut nimandɨne.
Kušaŋ warkɨzaq, warkɨzaq.
Iga iːt warɣɨŋ ezɨŋ.
Nimandɨne tʼärɨŋ: “Nima, man nʼädegu kɨgaŋ.
Tan qwanqɨ aːmdiqonä tʼäbɨrčik aːmdəqunnan tabɨn nendɨkoː.”
Nimat tʼärɨŋ: “A tan qaj manommant?
Amdəkou mezwi taze omdulǯenǯiŋ.”
Iga iːt tärɨŋ nimandɨne: “Qwannɨq, qwannɨq!”
Nimat tʼüːrɨŋ, ondə qwannɨŋ.
Aːmdeqoːne tüːan, tʼärɨŋ: “Warɣə olʼi qowant, man tʼeŋga tüːaŋ.
Mazɨm üːdɨŋ iga iːw teŋga, tannani neːmt tʼäbɨrgu.
Menǯal alʼi ass?”
Aːmdeqoː tʼärɨŋ pajagane: “Nu i iːmt.
Tam dʼelʼe pen tilʼdʼi ta maːdam omdəlǯimt.
Az omdelǯenǯit tilʼdʼi maːdɨm, man tabɨn olɨm padʼälǯenǯau.”
Pajaga üːbɨŋ.
Oːmdɨ tʼüːrɨŋ.
Tüan maːtt.
Maːtqɨn tʼüːrɨŋ.
Iga iːt tʼärɨŋ nemandɨne: “Nima, a tan qajno tʼüːrant?”
“Kundar meŋga as tʼüːrəku?
Ass kɨksan qwangu.
A tan mazɨm üːdant.
Aːmdeqoː tʼärɨŋ: “Milʼews neum, tan iga iːl tilʼdʼi ʒa omdɨlǯimt maːdɨm.
Kundaredi maːt mannan az omdolǯit, tabɨn olɨm padʼälǯenǯau.”
“Nima, ik tʼürɨk!
Üːdəmɨt qarimɨt qɨtse jewan.
Ik tʼürɨk, nima, qondɨq.”
Nimat qondɨn.
Nom lɨpwannɨŋ.
Qula qondonnat, kanala qondonnat.
Qun murs az ündɨŋ, kanan murs az ündɨŋ.
Nu i tidam iga iːt pin tʼönǯoɣɨn tʼänǯiŋ pone.
Pürɨm iːɣat udoɣant.
Teː selʼdʼzʼiŋ muːnamdɨt, toː selʼdʼzʼiŋ muːnamdɨt muːnoɣɨnt.
Püroɣɨndo sappɨstʼät sədəqwajjet iːbqaj tibequm.
“Qaj tʼeŋga keregett?”
Pajagan iːgaj iːt tʼärkuŋ: “Meŋga tamdʼelʼi pen oːmdalǯalɨt warɣ maːt, nilʼdʼi ʒa kundaredi amdəqunnan.”
Warkɨqwaq pajandɨse, nimandɨse.
Qaj kanam tap taost i matqɨn warqɨnti suːromka nʼäori nastʼäɣom socʼkaŋ warat, socʼkaŋ austembattə.
Kanaŋ, nʼäore suːrumka tabɨn pajandɨne oːgɨlaq.
Kušaŋ warkɨzaq, warkɨzaq pajandɨse.
A pajat teːrban: “Mazɨm kundoqen natʼe jedoɣɨj tibequm tükkus iːgu ezeunan čabɨrčis.
Ezeu mazɨm na qune az mizan.
A tan mazɨm az onent iːwant.
A tan mazɨm iːwant qäːtse.
Uʒo man tast aːtelgulaŋ.
Meze qaj jennanǯ tannando?”
Nu i kɨgemɨŋ pajat nilʼdʼiŋ meːgu.
Qondəku quʒannaq.
Pajat pürɨm iːwat, pin tʼönǯoɣɨn, čanǯiŋ pone.
Muːnantɨt pürɨm teː selʼdʼiŋ i toː selʼdʼiŋ.
Sappɨstʼättə püroɣɨndo sətqwajjet orsoj tibequm.
“Qaj kereget?”
Näjɣum tʼärɨŋ: “Meŋga nauga keregett, tam pin tau maːdɨm qonǯul daːboɣont wes nʼürbannalɨt.
A me erawse aj laqčaqaj tabɨnanne matqɨn ezɨlaj.”
Nilʼdʼiŋ i meːwat.
Qarimɨn wazatt.
Sendɨ maːt soːdʼiga wattɨla, qonǯil taːboɣont tʼäŋgwat.
A sendɨt nedɨmbɨdi era pajasak aj ezaq laqčakaj maːtqɨn.
Amdəqoː mannɨmpan, soːcʼka mat tʼäŋgwan, soːcʼka wattə tʼäŋgwan.
Tabɨn neːt erandɨse kalɨmbaq laqčakaj maːtqɨn.
Neːt ezɨntɨne tʼärɨŋ: “Man tapse az warkenǯaŋ.”
Ezɨt tʼärɨŋ ont neːntɨne: “Qajno az warkennanǯ?”
“A man nano az warkenǯaŋ, tap mazɨm az ont täːendɨse iːzan, a iːɣan mazɨm qätse.”
Neːt amdəqoːj ezandɨne tʼärɨŋ: “Kutʼet kɨgant, natʼet mazɨm qatpɨq.
A man tapse az ilʼenǯaŋ.”
Amdəqoːn neːt tʼärɨŋ ezɨndɨne: “Kundoqɨndo tükkus meŋga mazɨm iːsodi tibequm.
Tan mazɨm tabne az mizand.
Man tidam natʼedʼeːlʼe tabne tibenenǯaŋ.
A taugam kutʼet kɨgant, natʼede qatpeːp.”
Aːmdəqoː neːt qundar ezɨntne qennɨt, amdəqoː tʼüːwɨŋ.
Sent emnemt kɨgelɨn tʼüj maːtt omdɨlǯeku.
Amdəqoː tʼärɨŋ ond koːdʼzʼelandne: “Paqqənalʒə tʼüm qun pärgɨsaŋ.
Mannani emneum natʼedʼelʼe tʼün puʒont omdɨlǯalt.
Püsse wes tabɨm pennalt.”
Amdəqoːn kodʼila nilʼdʼiŋ i meːwat.
Pakkɨnnat tʼüm, tabɨn emnemt tʼün puʒont omdɨlǯattə, püːze wes tabɨm pennattə.
Nu i nilʼdʼiŋ meːwat.
Az čaːnǯičʼka qärɨm qwädʼät.
A tabɨn pajat tebɨndɨŋ nanogoj tibequːne.
Kundoqtə qwannɨŋ qwain tʼeres.
Kanaŋ matqɨn warkɨndi suːrumga nʼäwɨdi üːrčedi na tibequmgan i kizekumblʼe üːbəraq.
Xotʼ kundar tabɨstʼäɣɨn az awstɨmbattə, a taːbɨstʼäɣɨnne wes awaj jeŋ.
Täbɨstʼäx ürčumbadi naːr tibequmgan kut tabɨstʼäm tawɨst səgətsodi tʼelʼäɣɨnto.
Kutʼen ʒə jewan menani kuzajmi?
Qwalʼlʼi peːɣɨllaj.
Pajagan iga iːt aːmdan tʼüj maːtqɨn.
A iːndəmaːt täbɨnnimpaːn aːrɨŋ eranne.
Nu i kanaŋ suːrumga qurnaq peːrɨnǯaq.
Quːrsaq, quːrsaq, aptʼettɨmbɨsti, aptʼettɨmbɨsti.
Aptoun qoɣudi ondi kozaimdi.
Maːtqɨn warqɨndi suːrumga apteptɨt tʼüj maːdən qarɨm.
Tʼärɨŋ kanane: “Tan amdɨq.
A man ɨlʼlʼe tʼütʼöwinǯaŋ.
Taftʼen menani kozaj qaj meːzuwi tauzan qwassodi pilʼ tʼeːlʼäɣɨnto.”
Tʼütʼöwɨŋ suːrumga qozaintɨne.
Natʼen nʼäurnɨŋ qozaint puːlsein paːroɣɨn.
Qozalʼcʼ kostɨt suːrumgam.
“Oj suːrumga, suːrumgaː, man taftʼen aːmdaŋ, tʼüj matqɨn.
Mazɨm omdolǯiŋ amdəku tʼüj matt.
Man tʼäŋ qunǯaŋ taftʼen augalɨk.
Tan meŋga talʼel apsodi mɨm.”
Nilʼdʼiŋ tibequm toːdentɨŋ ond suːrumgantɨne.
“Tastə, kanam tezlʼiː tenani qozaj taːdərɨs səgetku.
A man tezlʼiː səgətsodi mɨɣɨndo tauʒaŋ.
Tä mazɨm qusodi mɨɣɨnto paːralʼǯalʼi.”
Suːrumga üŋgulǯimblʼeblʼe quronnɨŋ.
Kanane tʼärɨŋ: “Menani qozaj taftʼen aːmdan augalɨk, tʼäŋ quŋʒiŋ.”
Suːrumka tʼärɨŋ kanane: “Qurollaj toːrlaj qulanan kutʼenem apsodlaj.”
Nu i nilʼdʼiŋ meudi.
Kanaŋ tʼärɨŋ: “Nu qurollaj.”
Quronnaq.
Qɨba suːrumka qulanan tuːrənɨŋ apsodi mɨlaj.
Kutʼen qaim qoɣɨt, naum i taːdərɨt.
Kutʼen tʼeɣə nʼäj, kutʼen qwäl müzumbədi, awattə qunnan watʼ tʼötčikunt poːnʼän nilʼdʼi čočoɣon maːda az ludolǯimbɨkuŋ.
Tabɨstʼäq kanakse pen alʼi tʼeːlɨn wes qaɣɨlgudi.
Qaim tʼäpkudi, naum i qwandəkudi qozaindine.
Nilʼdʼiŋ i toːrnaq.
Sətqun qozaimdi awstɨmbɨgu kɨgaq.
Apsodimɨm koːcʼiŋ qoudi, quronnaq kozaintine.
Tülʼe medɨdʼäq.
Kɨba suːrumga apsodʼilam tuːɣonnɨt kozaintɨne.
Kozait andannɨŋ.
“Man ärgas quaŋ.
Tɨdam tä peɣɨnnɨlʼi mannani pajaum, kutʼen tap jeɣan.
Man pajau manan iːzat pürɨm.
Tebə mannani pajaun peɣannilʼi, tannilʼi b meŋga tabɨnando pürɨm.”
Suːrumga üŋgulǯimbat kuzäint äːǯim, quronnaŋ.
Kanane tärɨŋ: “Meŋga todəntɨŋ menani kozaj.
Tʼärɨŋ: peːɣɨnnalʼe mannani pajaum, tabɨnanto tannalʼi meŋga pürɨm.”
Kanaŋ tʼärɨŋ suːrumgane: “Qurollaj, peːɣallaj tabɨn pajamdə.”
I quronnaɣ.
Qusaːq, qusaːq, medɨdʼäq qwäldʼ.
Qwain tʼeres pitʼöwgu keregeŋ.
Kanaŋ tʼärɨŋ suːrumgane: “Tidam kundar pitʼöwenǯaj qwain tʼeres?
Man pitʼöwenǯaŋ, a teŋga as pitʼöwgu.”
Kanaŋ tʼärɨŋ suːrumgane: “Omdɨq man paːroɣeŋ.”
Nilʼdʼiŋ meːwadi.
Suːrumka omdɨŋ kanan paront.
Qwain tʼeres üːbaq.
Uːrsaq, uːrsaq, tʼäkkɨze pitʼöwak.
Quronnaq, na jedont kutʼen tabɨstʼan kozain paja i quronnaq.
Qursaq i qursaq, midaq na jedont.
Qoudi kozai näjɣum.
Näjqum tapɨstʼäɣɨm kostɨt, toːdalblʼe üːbərat.
“Ax, kanaŋ, kanaŋ, i tan kɨba suːrumga, kundar mazɨm qoulʼi?”
A tabɨstʼäːqi warɣɨŋ nʼöːɣalčimbaq.
Kɨba suːrumga saralǯimban.
Okkɨr südernaɣɨn kolʼcʼimbɨdi mannɨmpɨtʼej mɨ panalɨmpan.
Qɨba suːrumga na südernaun pone čanǯikuŋ, maːttə serkuŋ.
Ont tʼeːrba: taugɨr meŋga soː jenǯiŋ palʼdʼigu pone maːttə.
Nom üːdəmnaŋ.
Qozai näjqum qondəku kuʒannɨŋ salǯepont.
Pürɨm iːɣat aːkɨnt, qondonnaŋ.
Kɨba suːrumga tʼeːrban: Kundar iːgu pürɨm tabɨn aːqɨnto?
Ündədit, kɨrsɨmpan kɨba tawa.
Tap tabɨm orannat.
Kɨba tawa čorɣɨmpan, tʼärɨŋ kɨba suːrumgane: “Tan mazɨm ig awkə.
Man tʼeŋga sačum pildel soːcʼkaŋ kogɨdilaks.
Man tʼeŋga soːcʼka mɨm meːlaks.”
Kɨba suːrumga tʼärɨŋ tawane: “Nu meːt.”
“A qaim tʼeŋga megu,” – tawa tʼärɨŋ.
A kɨba suːrumga tʼärɨŋ: “Tau nejqum qondugu kuʒesan, pürɨm iːzət aːkənt.
Tan kundarem na pürɨm tabɨnan iːlʼel, talʼel meŋga.”
Tawa tʼärɨŋ: “A meŋga pürɨm tabɨnnan iːgu as saːčum jeŋ.
Mannan talʼdʼöu neʒakaj.
Man talʼdʼöum tabɨn pudʼömt saɣelǯenǯau (pudʼöɣɨnt perilǯenǯau), pudʼimt qɨlʼlʼeptɨmenǯau.
A tap qaːčenǯiŋ.
A tan saralǯembɨq, kutʼet pür sappɨstʼenǯiŋ.
Saralǯimbet wärɣɨŋ.”
Nu i tawa nilʼdʼzʼiŋ meːwɨt.
Näjɣun pudʼönt talʼdʼemt saɣennɨt.
Pudʼint süntʼeɣɨn sɨblʼepčumblʼe üːbərɨt.
Näjɣum qaːčiŋ warɣɨŋ.
Ont puldiŋ.
Pür sappɨstiŋ näjɣum aːqɨndo.
Kɨba suːrumga qolʼdʼit pürɨm, qurolʼlʼe tʼäbɨt.
Taːwa qunnoŋ.
I kɨba suromga pürse quronnaŋ.
Näjɣum qondolbədi kabɨndse qɨlʼdiŋ, perɨnǯiŋ, kutʼen jewan pür.
Tɨdam as tabne qugu i as tabne wargu.
Kɨba suːrumga qurnɨŋ.
I kanaŋ qurnɨŋ.
Qursaq, qursaq, medɨdʼäq qwäldʼ.
Qwain tʼeres üːbku keregeŋ.
Kanaŋ tʼärɨŋ kɨba suːrumgane: “A tan meŋga sidʼeptɨmant.
Tannan pür padʼi tʼäŋgwan.”
A kɨba suːrumga tʼärɨŋ: “Jewan.”
“Aːdəlǯeːt.”
“Az aːdəlǯanǯau.
Ato üːrčenǯaj pürɨm.
Kuʒan medaj oːni koʒajɣɨni, nɨndo man teŋga aːdɨlʒlʼews.”
Kanaŋ tʼärɨŋ suːrumgane: “Omdɨk man paːroɣɨn.”
Kɨba suːrumga omdɨŋ kanan paːrt.
Uːlʼädʼäq qwain tʼeres.
Kušaŋ uːrsaq.
Kanaŋ tʼärɨŋ: “Aːdalǯeːt meŋga pürɨm.”
“Az aːdalǯenǯau teŋga pürɨm.”
“Man tast qoptɨrenǯaŋ.”
Kɨba suːrumga qougu as kɨgaŋ.
Aːŋtə tiːdət, tʼärɨŋ: “Pür tawetam.”
A pür tabɨn aːqɨnto üːt qowɨŋ.
Kɨba suːrumga tʼärɨŋ: “Man tʼäkse iːzaw tau pürɨm.
A tan qopteraːl.
Tidam kundar kɨgant, nilʼdʼiŋ iːt tau pürɨm.
Az iːnǯal, teŋga awaj jenǯiŋ.”
Nu i pitʼöwak qwain tʼeres.
A na paraɣɨn qwajɣɨn qwälɨssat tibequlla wärq poŋgɨze.
Warq poŋgɨm medrattə qwain toptə.
A warɣ poŋgoɣɨn iːbkaj pitʼä qwädəmɨnt.
Tibequla tʼärattə: “Oːoːoː!
Tau pitʼäm potku keregeŋ.”
Okkɨr qum qwannaŋ tablanando potqu pitʼäm.
A kanaŋ suːramgaze tablan köɣɨn nüːzarɨmbaq.
Tabla tabstʼäɣɨn püːgolǯatt, toːdalbatt.
Kanaŋ suːrumgaze aj nʼüːzarumbaq.
Nu i tibequm pitʼäm tʼäɣäːlʼlʼe üːbərat.
A pitʼäm tʼäɣännɨt, pitʼän kedɨm nürbalʼe üːbərat.
Qorɨt, a natʼen solodi pür pitʼän kedeɣɨn.
Tibeɣum laŋgoneŋ qulandɨne: “A tä qaimnej ass tunolt.
Pitʼän kedeɣɨn solodi pür qondaŋ.”
Tibequla qurnattə pürɨm mannɨmbɨgu.
“Xm, xm, pör pitʼän pergeɣɨn!”
Kuʒannej as qwatquzuttə pörzuj pitʼäm.
Pür sendɨcʼka.
Ass kundoqɨn polɨmpat pitʼä.
Pör ass panalɨmpan.
Tibequla mannɨmpɨsat, mannɨmpɨsat pürɨm, pannat puːrən partə.
A kɨba suːrumga mannɨmpan, kutʼet pennatə pürɨm.
Tibequla qwannatə iːbkaj poŋgɨm äːtku.
Okkɨr tibequm kalɨŋ itergu potku na pitʼäm.
Iterlʼe čaǯiŋ kɨba suːrumgam as saralǯikut.
A suːrumka na paraɣɨn puːroɣɨndo tollɨt pürɨm.
Sappɨstʼeŋ poːne.
Kanaŋ tabɨm aːdɨt.
Suːrumga tʼärɨŋ kanane: “Man pürɨm sədəǯel aj iːow.
A teŋga okkɨrɨŋnäj as iːku.
Tan meŋga tʼärzant: man tast qoptərenǯaŋ.
Tɨdam tan mazɨm as qoptərlendɨs.
Man tidam kozain udont oːneŋ menǯau tau pürɨm.”
Nu i quronnaq.
“Qurollaj tʼäŋ.
Menani kozaj tidam augalɨk padi qumpan.”
Nu i tiːdemplʼe quronnaq.
Qursaq, qursaq, medɨdʼäq kutʼen aːmdan tabɨstʼännani koːzaj.
Kɨba suːrumga kɨrmon ilʼlʼe tʼütʼöuŋ kozaindɨne.
Kozait püːɣolǯet ont kɨba suːrumgamt, tʼärɨŋ: “Tan kundar kundaŋ palʼdʼänt.”
Tabɨm tuːdannɨt, tuːdannɨt.
A ondə tʼärɨŋ: “Mannan apsonm malčidʼeŋ.
Tan meŋga kalʼlʼemɨn talʼlʼel amgu.”
Kɨba suːrumga nʼäːolǯiŋ, ondə ɨnʼnʼe čäruŋ.
Tibequm qaomd püɣəlǯimbɨlʼe üːbərɨt.
Tabɨn udont tʼälʼdʼzʼiŋ pür.
Tibequm tʼärɨŋ: “Ooo, pür!
Aj man udoɣəŋ ezant.
Tidam man as quːlaks.”
Pen tʼönǯin maːroɣɨn.
Jeɣan pet.
Tibequm pürɨm teː selʼdʼiŋ muːnamdɨt i toː selʼdʼiŋ muːnamdɨt.
Sappɨskuŋ pürɨn sünteɣɨn sədqwajjet orsuj tibequm.
“Qaj keregett tʼeŋga?”
Qaːɣɨnnalt tau tʼüm mannando, qɨnnalt tau püllam mannando, qotä qaftä.
Üːdalt mazɨm taftʼendo.
Tʼäralt aːmdəqone, kutʼet tabɨn neːt tebɨnnɨmpan.
Na nemd naj erandɨse aːmdəku qwannimd.
As qwatčit, me tabɨm nentse, emnentɨse okkɨrdʼät qwačutt.”
Nom tʼeːlɨmnɨŋ.
Tibequm tʼüj maːtqɨndo čʼänǯiŋ.
Na sətqwajjet tibequm tʼärattə amdəqoːne: “Tan na nimd qaj nel tibendɨkus nilʼdʼi tibequne na tibequnnando qwannɨŋ natʼedʼelʼi uːgoj tibequndane, a tau tibequm tʼäqəlǯölǯit tʼün sündʼeɣɨn, tan na nemt qwatɨ erandɨse.
Jeʒlʼi tan as qwannal tabɨstʼäɣɨn, me tast nendɨse, emnendɨse okkɨrdʼät qwačott.”
Nu i amdəqo teːrban: “Mannan neːlaw koːcʼiŋ jewat.
A meŋga qaj, okkɨr neum qwatčau.
Mannan na neundʼät qajnäj as sünenǯiŋ.
A oneŋ aj ilʼmadlawse ilɨlʼe kalʼenǯaŋ.”
Aːmdəqoː nilʼdʼiŋ meut.
Ont qodʼilandɨne tʼärɨŋ: “Mannan natʼen nilʼdʼi čočoɣɨn täbɨnnɨmban new.
Tabɨm tä qwannaltə.”
A tau nemant iːgaiː tʼüɣon aːmnandi tüan nimandɨne kwesse.
Nimat andannɨŋ, ondə tʼüːrɨŋ.
“Igaiː, igaiː!
Kundɨŋ kutʼen jezant?”
“Oj qojɣalǯɨk, nema!
Man jezaŋ tʼün puːʒoɣɨn.
Mazɨm amdəgu omdəlǯis tʼün puʒont.
Man amdɨsaŋ kundɨŋ, kundɨŋ, ergas eret.
Mazɨm afstɨmbɨsak kanaŋ aj kɨba suːrumga maːtqɨ.
Man tauzaw kanam, kɨba suːrumgam.
A tan meŋga qwädɨmpɨsant, tʼärkuzant: “Meŋga qajno tawal na tüdə pergɨlam, qaj tüdə awɨrgu?”
Na tüdə pergɨla mazɨm tʼüːɣɨndo üːdak.
Tʼün puʒoɣɨn amdɨsaŋ.
Mazɨm tabɨstʼäk austambɨsaq.
Kanakse kɨba suːrumga torsaq, mazɨm austəmbɨsaq.
I tabɨstʼändʼät man teŋga tüaŋ.
A na näjqum, qaim man iːzaw, tabɨndʼät tabɨn ezɨt mazɨm tʼün puːʒont ondɨlǯiːs.”
Nimat tʼärɨŋ: “Man ass kɨgɨsaŋ tabɨm iːgu.
A tan meŋga ass üŋgulǯukuzant.”
Nilʼdʼiŋ aj nimandɨse warkɨlʼe üːbəraq.
Nilʼdʼiŋ ʒa qoːwaq.
Man ezaŋ tabɨstʼännaŋ.
Maːt soːcʼka.
Wes soː jeŋ.
Tidam warqaq soːcʼkaŋ, qoːompaq.
Tabɨn nemat tilʼdʼiŋ as kabenǯiŋ.
Tabɨstʼäq koombaq.
A me as koomboot.
Tabɨnnan okkɨr iga iːt.