|
|
PMP |
Elɨmpak warkɨmbak era bajasaq.
|
|
|
|
Tabɨstjannaːn jeːɣan neːt.
|
|
|
|
Eːzɨt eːwut qondak aːrɨm maːtqɨn.
|
|
|
|
A neːt nej aːrɨn sündʼeɣɨn.
|
|
|
|
Okkɨr üːdəmɨɣɨn qonduku kuʒanɨn.
|
|
|
|
I sət eraga maːttə seːrnak süːdernaun.
|
|
|
|
Näjgumka išo ass qondolpsan.
|
|
|
|
Tabɨstaq (tapstʼäq) oːmdaːk.
|
|
|
|
Iːɣəti nagurčunti naugam.
|
|
|
|
Nagɨnʒilʼe (nagɨtǯilʼe) üːbərak.
|
|
|
|
Näjɣumga tʼärɨŋ: “Tä qwäzɨlʼe alʼi ass?”
|
|
|
|
Tapstaq tʼärak: “Me ass qwäzaj.”
|
|
|
|
Kuʒän nagɨmǯisaq (nagɨdčezaɣə), nagɨmǯisaq, nagɨrɨm aurgundi tɨssin bart pennɨdi.
|
|
|
|
Undiː aj südernaun qwänak.
|
|
|
|
Tʼipkaka nagɨrɨm iːɣət (iːut), toɣulǯet.
|
|
|
|
A natʼen nagɨrgɨn nagɨrban: “Tan ezel qoŋ jewan.
|
|
|
|
Kudəmnej az austäkut.
|
|
|
|
Kudemnäj ass apstukustə.
|
|
|
|
Eragane pajagane qaimne az mekut (mekustə).
|
|
|
|
Tabɨn qoj ilsan.
|
|
|
|
Okkɨr jedoɣɨn jeɣan nilʼdi kɨba aurga.
|
|
|
|
Tabɨn ilsan na gɨba aurganni wes qwanǯiŋ.”
|
|
|
|
Näjgumga qarimɨɣɨn wäzɨŋ.
|
|
|
|
Ezɨntənʼe kelʼlʼe üːbərat: “Man tamdʼel küːdʼaptəbɨzaŋ (küdərem qonǯirsaŋ).
|
|
|
|
Konduku kuʒasaŋ i ešo oneŋ ass kondolbɨsaŋ.
|
|
|
|
Sɨt eraga maːttə seːrnaq südərnaun.
|
|
|
|
Nagɨnʒlʼe oːmdak.
|
|
|
|
I nagɨrɨm nagɨrnɨdi.
|
|
|
|
Aurtäj tɨssɨn baːt pennɨdi.
|
|
|
|
A ondi südernaun qwannaq.
|
|
|
|
Man wazaŋ, nagɨrɨm iːow.
|
|
|
|
Toɣulǯaw.
|
|
|
|
A nagɨrgɨn nagɨrban: tan ezel qoumpan kudɨnnäj az awstɨkut.
|
|
|
|
Tabɨn qoj ilɨsan bo wes qwanǯiŋ nilʼdʼi jedoɣɨn kɨba tibequmgane.
|
|
|
|
I na tibequmganʼe ezent ilsan wes tabne jenǯin.”
|
|
|
|
Eːzɨt üŋgəlǯimbɨst nent küdərem.
|
|
|
|
Nɨndo tʼärɨŋ pajandɨne: “Tan tamdʼel qwankɨ natʼedʼelʼe, qutʼen na tibequmga jeɣan.
|
|
|
|
Na tibequmgan tawet.
|
|
|
|
(Tattɨ jedont) Tattɨ maːtt.”
|
|
|
|
Pajandɨne meːwɨt ton laga.
|
|
|
|
“Tawet i tattə meŋga na tibequmgan.”
|
|
|
|
Pajat qwannɨŋ taugu tibequmgan.
|
|
|
|
Čaːǯas, čaːǯas, meːdɨŋ na jedont.
|
|
|
|
Qowɨt na tibequmgan.
|
|
|
|
Tabɨstʼäk ilak ewɨntɨse sədə qun.
|
|
|
|
Tabɨnnan naː nejqumnan okkɨr iːt.
|
|
|
|
A tau näjɣum tüan tabɨn iːmt taugu.
|
|
|
|
“Meːrɨwlʼew meŋga iːmt.”
|
|
|
|
Näjɣum tʼärɨŋ: “Man ass meːrɨmnenǯaw.
|
|
|
|
Mannan okkɨr iːw.”
|
|
|
|
A taw näjɣum okkɨrnadi maːdərnɨŋ: “Merɨnt i merɨnt.”
|
|
|
|
Nu i tibəqumgan eːut kɨgelɨŋ merɨŋgu ont iːmt.
|
|
|
|
Nu i merɨŋɨt.
|
|
|
|
Näjɣum jüːbaŋ tibəqumgaze.
|
|
|
|
Teːn qwatčit, ton qwatčit.
|
|
|
|
Kɨdan qula.
|
|
|
|
Tabne qwatku awaj jewan.
|
|
|
|
Okkɨr čočoɣɨn kogɨdiŋ näjgunʼe äraga.
|
|
|
|
“Tan qaj mekundə?”
|
|
|
|
“A man kɨgaŋ qwatku tau kɨba tibeɣumkam.”
|
|
|
|
Eraga tʼärɨŋ: “Tattɨ meŋga tabɨm.
|
|
|
|
A man tabɨm qwatčaw.”
|
|
|
|
Nu i näjɣum mewɨt eraɣane.
|
|
|
|
Ont qwannɨŋ.
|
|
|
|
A eraga kɨba tibequmgan euntɨne qwandɨt kwese.
|
|
|
|
I tʼärɨŋ: “Tan qajno tabne merəkɨsaw?
|
|
|
|
Tap tannan iːɣɨt qwatku.
|
|
|
|
A man tabɨnnan iːow tannani iːnt.
|
|
|
|
Tannau teːŋga.
|
|
|
|
Tidam ik merɨmpet naː nejqunne.”
|
|
|
|
Eraga aj ürɨŋ kutʼetta.
|
|
|
|
A na nejqum tüan maːtt.
|
|
|
|
Erat soːɣɨnǯiŋ: “Qaj tawal tibequmgan?”
|
|
|
|
“Tawow.”
|
|
|
|
“A kutʼen jen?”
|
|
|
|
Näjɣum erandɨne tʼärɨŋ: “Man mizaw eraganʼe tabɨm qwatku.”
|
|
|
|
A erat aːndannɨŋ, što eraga qwannɨt tabɨm.
|
|
|
|
Qušaŋ warkɨzak, warkɨzak.
|
|
|
|
Ündädedi tibəqumka ilɨŋ.
|
|
|
|
Erat qwädam pajantɨne: “Qwannɨk sɨdɨmǯel tawet tibequmkaŋ.”
|
|
|
|
Aj mewɨt tabne qomdem.
|
|
|
|
“Tawet i tattə meŋga.
|
|
|
|
Kudnenij iːg mikwet.
|
|
|
|
Man oneŋ qwatčau tabɨn.”
|
|
|
|
Nu i pajat qwannɨŋ taugu tibequmgan sɨdɨmǯel.
|
|
|
|
Aj čaːǯis, čaːǯis.
|
|
|
|
Näjqum medɨn na jedont na näjqune, qajk näjgunnan taukust tibiqumgan.
|
|
|
|
Aj tawkulʼi üːbərat tibəqumkam.
|
|
|
|
Näjɣum tʼärɨŋ: “Man teːŋga merɨksaw, a tan qajno qwatku kɨkɨsant mannani iːum (qwatku).”
|
|
|
|
“Man as kɨkɨsaŋ qwatku.
|
|
|
|
Tap mannan kuːnaŋ.”
|
|
|
|
A tau näjgum tʼärɨŋ: “Mekga tassɨt eːraga tabɨm.
|
|
|
|
Man tidam ass merɨmnenǯaw tʼeːnga.”
|
|
|
|
“Meːrɨnt meːnga.
|
|
|
|
Man ass qwatčou tɨdam.”
|
|
|
|
Nu i eut aj meːrɨmnɨt ont iːmt.
|
|
|
|
A tau näjqum aj üːbɨn.
|
|
|
|
Čaːǯis, čaǯis, i jedoɣɨnt medɨn.
|
|
|
|
Tannɨt tibequmgan erandɨne.
|
|
|
|
Erat andannɨŋ.
|
|
|
|
Seːŋgat.
|
|
|
|
Qarimɨɣɨn aurnat.
|
|
|
|
I qoːje qum üːdɨt tibequmgan.
|
|
|
|
Tʼärɨŋ tabne: “Tan qwanqi.
|
|
|
|
Nildʼi, nildʼi čočoɣɨn jeɣan nagur oːlʼi sü.
|
|
|
|
Tan soːɣundik tabɨnnan, kušaŋ jewan mannan kolʼtʼäj qomdela.”
|
|
|
|
Nu i tibequmka qwannɨn.
|
|
|
|
Čaːǯis, čaːǯis, medɨm tʼöront.
|
|
|
|
A tʼöroɣon palʼdʼiŋ tibəqum aːndɨse.
|
|
|
|
Kɨba aurga laŋoneŋ tibeɣunʼe: “Tuɣolk meŋga.
|
|
|
|
Mazɨm pudək taj plʼekant.”
|
|
|
|
Andoɣən palʼdindi tibequm tuːɣonnɨŋ kɨba aurgam puːdət tʼörən tʼeres.
|
|
|
|
Kɨba aurganʼe na tibequm tʼärɨŋ: “Tan kutʼet čaːǯand?”
|
|
|
|
“A man čaːǯan nagur olʼi süne.”
|
|
|
|
“A tan süne čaːǯant?”
|
|
|
|
“Süne čaːǯan.
|
|
|
|
Mazɨm üːdəs qoje qum qostɨgu kušaŋ jeɣɨn tabɨnan qolʼtʼerej qoːmdet.”
|
|
|
|
“A tan man dʼät soːɣunčlʼent sünan kuʒan mazɨm nom üdənǯiŋ taw antoɣɨndo.”
|
|
|
|
Na tibequm qulam putkut tʼöron tʼeres.
|
|
|
|
Taj plʼekaj tʼöron kän baːrt uːderkuŋ.
|
|
|
|
Sendɨŋ omnɨmbɨdi pudambed qum köːčʼkuŋ, sennɨŋ puːdombedi qum.
|
|
|
|
Tabɨm ant tʼöron sajgant meʒalgut.
|
|
|
|
A na tibequm, qulam putkandi, andoɣən palʼdʼindi, tabɨm ant meʒalgut tʼöron sajgɨnt.
|
|
|
|
Okkɨrɨlʼe tʼäkalɨmban na tibequm.
|
|
|
|
Tap okkɨrɨlʼe palʼdʼiŋ tʼöroɣən.
|
|
|
|
Kuʒannej as čanǯikuŋ.
|
|
|
|
Okkɨrɨlʼe tʼäkalɨmbaŋ.
|
|
|
|
Kuʒannij, kuʒannij as čančikuŋ.
|
|
|
|
Nu i kɨba tibequmga qwannɨŋ.
|
|
|
|
Čaːǯis, čaːǯis.
|
|
|
|
Medɨŋ tibequmga iːpkaj qwaj.
|
|
|
|
Qwain tʼeres ippan iːpqaj (iːbəqaj) pitʼä.
|
|
|
|
Pitʼä kɨba tibequmgannan soːɣundiŋ: “A tan kutʼi čaǯaŋ?”
|
|
|
|
“Üːdək mazɨm tʼeres.
|
|
|
|
Nɨnto kelʼews.”
|
|
|
|
“Nu mendɨk.”
|
|
|
|
Nu i mendɨŋ kɨba tibequm.
|
|
|
|
“Man sünə čaːǯaŋ, nagur olʼi.”
|
|
|
|
“A tan soɣunčlʼent sünnan qajno mazɨm nom tʼäkalǯoǯimban.”
|
|
|
|
Nu i qɨba urga üːbən.
|
|
|
|
Čaːǯis, čaːǯis, medɨŋ sün lejdɨmbɨdi quːnä.
|
|
|
|
A na pitʼä iːiːselʼcʼe pon ippan qwain tʼeres.
|
|
|
|
I tabɨnan ködə lɨlat aːdat.
|
|
|
|
Medɨŋ sün lejdɨmbɨdi quːnä.
|
|
|
|
Süːn qum soːɣundiŋ kɨba tibequkanaŋ: “A tan kutʼet čaǯan?”
|
|
|
|
“A man čaːǯan nagur olʼi süːne.”
|
|
|
|
“Uːoo!
|
|
|
|
Uːoo!
|
|
|
|
Suːne?
|
|
|
|
Kušaj ass qum tabne kečkomɨnt.
|
|
|
|
I kudnej qwese ilɨlʼe ass paralban.
|
|
|
|
Nu qwanqäː.
|
|
|
|
Taw waːtoːwan čaːǯenanč.
|
|
|
|
Natʼen nej jeɣan tildi ʒa sün kocʼ.
|
|
|
|
Na kocʼinnan soːɣunennanǯ.
|
|
|
|
Tap tast üːdenǯiŋ.
|
|
|
|
Nɨndo qwännanǯ.”
|
|
|
|
Kɨba tibequm üːbɨŋ.
|
|
|
|
Čaǯis, čaǯis.
|
|
|
|
Medɨŋ nagurumčeti sün koːcʼunä.
|
|
|
|
Sün kocʼ soːɣundiŋ: “Kutʼet čaǯaŋ?”
|
|
|
|
“Man čaːǯaŋ nilʼdʼi, nilʼdʼi sünʼä, nagur olʼi.”
|
|
|
|
“Ooo!
|
|
|
|
Ooo!
|
|
|
|
Kutʼen tan čaːǯant!
|
|
|
|
Tabne kušaj ass qum toːtʼelɨlʼe palʼdʼüzattə.
|
|
|
|
I kudnäj ilɨlʼe ass paːralban.
|
|
|
|
Nu čaǯik!
|
|
|
|
Tiːdəmbɨːk (tiːdämblʼe)!
|
|
|
|
Tap maːtqan tʼäŋwan.
|
|
|
|
Tabɨnan pajat soːtʼka, soːtʼka näjqum.
|
|
|
|
Tan tabne maːdərk qandɨbɨŋ.
|
|
|
|
Tap näjɣum soːtʼka.
|
|
|
|
Tast kutʼedeːm oːdiŋnenǯiŋ.”
|
|
|
|
Nu i kɨba tibequmga nilʼdʼin i miːot.
|
|
|
|
Čaːǯis, čaːǯis.
|
|
|
|
Midɨŋ sün pajandɨne.
|
|
|
|
I sün pajat tabɨm maːt üːdɨt.
|
|
|
|
Maːttə sernaŋ kɨba tibequmga.
|
|
|
|
Tʼärɨŋ: “Cʼolom, cʼolom.”
|
|
|
|
“A tan kutʼet čaǯant kɨba aurgə?”
|
|
|
|
“A man čaǯaŋ tannani kozajme (süne), tannani erantɨne.”
|
|
|
|
“Mannane erawne?”
|
|
|
|
“Man čaːǯaŋ tannani eːrandɨne.”
|
|
|
|
“Aaa!
|
|
|
|
Man erawne?
|
|
|
|
A man eraw awaj qum, tʼüːmbədi, tʼüːmbədi.
|
|
|
|
Tap warɣɨŋ tüːmban.
|
|
|
|
Nu tidam kutʼet man tast qatpɨlam?
|
|
|
|
A tan qajno tabnä tʼüant?”
|
|
|
|
“A nano tabnä tʼüːaŋ, mazɨm qoje qum üːtsan.
|
|
|
|
“Qwanɨk tabnä nagur olʼi süne.
|
|
|
|
Kostimd manan kušaŋ jewan manan kulʼtipədi qomde.”
|
|
|
|
Ajquːla meŋga qun tʼärɨs tʼöroɣon paldʼindi.
|
|
|
|
“Soːɣundik sünnan kuʒan mazɨm nom üːdəmǯin taw antoːɣəndo.”
|
|
|
|
Ajquːla tʼärɨs meŋga pitʼä (tʼärɨs):“ “Soːɣundik sünnan, qajno mazɨm nom tʼäkalǯoːlǯemban.””
|
|
|
|
“Nu, man tast oːtiːlaks.
|
|
|
|
Sü tünǯiŋ, a man täbɨnan soːɣunnenǯaŋ.
|
|
|
|
A tan üngolʒimbek.”
|
|
|
|
I omdolǯit tibequmgam tuːldʼont sünʼnʼent.
|
|
|
|
“Sü tüːnǯaŋ, a man soɣunenǯaŋ tabɨnan.
|
|
|
|
A tan üngulʼǯimbet.”
|
|
|
|
Niŋ i meːwɨt.
|
|
|
|
Oːmdɨlǯit tibequmgam.
|
|
|
|
Ass kundən jelʼe nom mergennɨŋ naː mergelǯan.
|
|
|
|
Warɣɨn sü tiːmple tüːan kɨrsan part muːčwannɨŋ.
|
|
|
|
“Quː, quː, nunudʼän.”
|
|
|
|
Süj porɣɨmt sü niŋgɨt.
|
|
|
|
Maːttə seːrnan, tʼärɨŋ matqɨn: “Uuu!
|
|
|
|
Qazaɣən aptə serɨmpan.”
|
|
|
|
Sü kuʒan niŋgekot süj porgɨmt, eskoŋ quːulʼe.
|
|
|
|
Aj serkut süj porɣɨm, eskuŋ sülʼe.
|
|
|
|
I waseːčʼkoŋ nun qwajant.
|
|
|
|
Selaw tʼelʼ dömp kojrɨt nun qwajan.
|
|
|
|
Üdəmɨɣɨn tükuŋ kwese.
|
|
|
|
Pajat tʼärɨn: “A tan qaj qazaɣɨn aptə qomɨndal?
|
|
|
|
Iːselʼcʼ pon me taze iːlaj.
|
|
|
|
Kudnäj meːɣani ass tʼüːkuŋ.
|
|
|
|
A tan nun qwajam qwajalǯal, qwajalǯal.
|
|
|
|
Qazaɣən aptäm aptäptal.
|
|
|
|
Aptäptal, a maːtqɨn pewal.”
|
|
|
|
Nu apsot takkəlʼe übərɨndat erandɨne.
|
|
|
|
Erat aurgu umdɨn.
|
|
|
|
Pajat tabnä iːbqaj čorɨqɨm kamǯit.
|
|
|
|
Erat aurnɨŋ.
|
|
|
|
A pajat tabnä tʼärɨŋ: “Man tamdʼel küdeptəmpɨsaŋ.
|
|
|
|
Konǯersaw küːdərem.
|
|
|
|
Ketku ilʼ ass ketku?”
|
|
|
|
Erat tʼärɨŋ: “Hm, qajno ass ketku?
|
|
|
|
Kettɨ!”
|
|
|
|
Nildʼi čočoɣɨn jewan qoj qum.
|
|
|
|
Tabɨnan kolcʼaj qomdet.
|
|
|
|
Tap tʼärɨŋ štop tan kostunel, kušaj tabɨnan kolʼde qoːmdet.”
|
|
|
|
“Hm!
|
|
|
|
Hm!
|
|
|
|
Kušaj qoːmdeːt!
|
|
|
|
Täbɨnan našaj qomde.
|
|
|
|
Tabɨnan naːšaj qomde, tabɨnani maːdəm naːgurɨːŋ qojalǯiku ass midenǯit.”
|
|
|
|
Paja tabne ajqola qamǯit wargɨčʼka čorgɨn.
|
|
|
|
Erat innɨt.
|
|
|
|
Ajqoːla soːɣundiŋ erandɨnan.
|
|
|
|
“A man kuʒannej ass küdaptembɨkusaŋ.
|
|
|
|
Ajqola qonǯirsaw küdərem.
|
|
|
|
Teŋga ketku alʼi ass?”
|
|
|
|
“Hm!
|
|
|
|
Qajno ass ketku?
|
|
|
|
Kettɨ!”
|
|
|
|
“Okkɨr čočoɣɨn tʼör.
|
|
|
|
Tʼöroɣən qum paldʼiŋ andɨze qotä qaptä.
|
|
|
|
Qaj qum čaːǯiŋ, na qum tabnʼe uːdomt kürolʼǯit.
|
|
|
|
Tap na gune küːkuŋ andɨze.
|
|
|
|
Na qumɨm anont oːmdɨlʒəkut, tʼörɨn tʼeres andəse putkut.
|
|
|
|
Sentɨŋ omnambɨdi qum kan bart tʼšorɨtʼškuŋ (čarkuŋ).
|
|
|
|
Andoɣɨn amnendi qum ajqola tʼöron saj köɣɨn eːskuŋ.
|
|
|
|
I na qum meŋga tʼärɨŋ: “Tan soːɣundik sünan, kušaŋ mazɨm nom tʼäkɨlǯolǯimenǯiŋ.”
|
|
|
|
“A tabɨm nom našakɨn üːdʼanǯit.
|
|
|
|
Tap qulam tʼeres tʼörn putkut.
|
|
|
|
Sendɨm tübi qumɨm andɨn tiːbent omdɨlǯenǯant.
|
|
|
|
A oːmt andɨn olomt omdɨlǯenǯint.
|
|
|
|
Kundar tʼörɨn kän bart üːdenǯit, sändɨn tüːbequm kalʼenǯiŋ andɨn tiːbeɣɨn.
|
|
|
|
A na qum andoɣɨndo sappɨstenǯin i qwanǯin.”
|
|
|
|
Paja tabne ajqola kamǯikut iːpkaj čoːrgɨn.
|
|
|
|
Erat ütkot.
|
|
|
|
Paja tabnä tʼärkuŋ: “Man naj okkɨr küdrəm küːdeptɨmbɨsaŋ.
|
|
|
|
Ketku, alʼi ass ketku?”
|
|
|
|
“Hm!
|
|
|
|
A qajno ass ketku?
|
|
|
|
Kettɨ!”
|
|
|
|
“Okkɨr čočoɣon iːbkaj qwaj.
|
|
|
|
Na qwajɣɨn qwain tʼeres qambərnɨŋ iːbəkaj pitʼä tʼönǯodi.
|
|
|
|
A pitʼä tʼälɨmpan qun dare.
|
|
|
|
“Kuʒan mazɨm nom pitʼaj pirʼäɣɨn, nilʼdiŋ ʒa kundar man ugon jezaŋ?”
|
|
|
|
“Hm!
|
|
|
|
Tap!
|
|
|
|
Pitʼä?
|
|
|
|
Kuʒan ilɨsan pitʼä i pirʼäɣɨnt sədəqwajjet iːpkaj andɨm qulaze polzət.
|
|
|
|
Sədəqwäjjet andɨm kulaze polzɨt.
|
|
|
|
Kuʒan sədəqwajjet andɨm qulaze tʼüdenǯit, našaːqən nom tabɨm üdənǯit.”
|
|
|
|
Nu a na tidam süː aurnɨŋ, kundoku kuʒannɨŋ.
|
|
|
|
A na tüːbə kɨba urga aːmdan, sün pajandɨnan aːmdɨn tulʼdʼöɣɨn wes ündɨdet.
|
|
|
|
Nu i sü wes kennɨt, kudnä qajem kundar megu.
|
|
|
|
Nu i tidam seŋgat.
|
|
|
|
Karimɨɣɨn sü wäzɨŋ.
|
|
|
|
Pajat tabɨm awstɨt.
|
|
|
|
Sü pone čanǯiŋ kɨrsan bart.
|
|
|
|
Süj porɣɨm sernat, aj wazediŋ.
|
|
|
|
Nom nilʼdʼiŋ mergeːnɨŋ.
|
|
|
|
Kuʒan merəgla suːlʼdʼät, pajat tunut što sü qwannɨŋ.
|
|
|
|
Kɨba tibeɣum tuldʼöɣundo üːdat, apstɨt.
|
|
|
|
Soɣundʼiŋ kɨba tibequnnanan: “Ündətsäːl, kundar tap tʼälɨmbɨs?”
|
|
|
|
Kɨba tibequm tʼärɨŋ: “Ündətsaw.”
|
|
|
|
“Tidam nildʼiŋ i meːt.”
|
|
|
|
Kɨba tibequm sün pajand nagorɨŋ omdannɨt, üːbaŋ.
|
|
|
|
Perwaj sün kodʼine tüːan.
|
|
|
|
Sün kocʼ soːɣundiŋ kɨba aurganan, soɣundiŋ: “Kundar tan sünnan malǯonant.
|
|
|
|
Tan ilsanse ewant.
|
|
|
|
Ato iːselʼtʼ pon qula kocʼin, kocʼin palʼdʼikuzattə.
|
|
|
|
Kudnäj ilɨlʼe ass paralgus.”
|
|
|
|
Na kodʼinantu qwannɨŋ.
|
|
|
|
Sɨdəmǯetti sün koǯine.
|
|
|
|
Na sün kocʼse niŋʒa tʼälɨmpan.
|
|
|
|
Na sün kocʼinanto qwannɨŋ.
|
|
|
|
Čaːǯas, čaːǯas.
|
|
|
|
Nagɨrumǯeti sün kocʼinä medɨŋ.
|
|
|
|
Tapse nilʼdʼiŋ ʒa tʼälɨmpsan.
|
|
|
|
Na sün kocʼ tabnä nilʼdiŋ ʒa i tʼärɨŋ.
|
|
|
|
Tap tabɨm omdannɨt.
|
|
|
|
Aj nanʼe qwannɨŋ.
|
|
|
|
Čaǯis, čaǯis.
|
|
|
|
Medɨŋ iːbkaj qweldʼ, kutʼen iːbkaj tʼöŋǯodʼij pitʼä.
|
|
|
|
Pitʼä andannɨŋ.
|
|
|
|
“Aːaː!
|
|
|
|
Tan iwlʼe parannant qwese.
|
|
|
|
Ketɨ meŋga, qajno mazɨm nom tʼäkalǯoǯimpan.”
|
|
|
|
Kɨba tibequm tʼärɨŋ: “Üːdak mazɨm tʼeres!
|
|
|
|
Nɨndo kelʼews.”
|
|
|
|
“Nu mendɨk.”
|
|
|
|
Kɨba tibequm mendɨn i tʼärɨŋ: “Tastə nom našakən üːdʼanǯiŋ.
|
|
|
|
Kuʒan tan ilɨsant pitʼäj pirʼäɣənt, tan našaqɨn sətqwajjet sudnam polsal qulaze.
|
|
|
|
Kuʒan tüːdenǯal na andɨlam nɨndo pitʼäj pirʼäɣənt qwännanǯ.”
|
|
|
|
Kundar pitʼä tüːdennɨt, tüːdennɨt, andɨla üːbədʼät.
|
|
|
|
Kut moɣlapčin, kut qojmɨčin, kut paqtilban.
|
|
|
|
A pitʼä kundar talʼdentse üːdəm kettɨt, kwalʼdʼi qwannɨŋ pitʼäj pirʼäɣɨnt.
|
|
|
|
Kɨba tibeɣum aj čaːǯiŋ, čaːǯiŋ.
|
|
|
|
Tʼörant medɨŋ.
|
|
|
|
A na tibeɣum, qaj tʼöroɣɨn palʼdʼiŋ.
|
|
|
|
Kɨba tibequm laŋonin: “Puːdəq mazɨm.”
|
|
|
|
A na tibequm andanɨn.
|
|
|
|
Nilʼdʼin tuon orse.
|
|
|
|
Tʼärɨŋ:“ “Kettə menga!
|
|
|
|
Qajno mazɨm nom tʼäkalǯolǯimban?”
|
|
|
|
“Pudək mazɨm.
|
|
|
|
Nanto kelʼeːws.”
|
|
|
|
No tap tabɨm puːdət.
|
|
|
|
Tʼärɨŋ tabne: “Sandə qum tünǯin tʼenga.
|
|
|
|
A tan tabɨm andɨn tiːbʼänt omdolǯet.
|
|
|
|
A onent andɨn olont omdɨq.”
|
|
|
|
Nu i kɨba tibequm übaŋ.
|
|
|
|
Čaːǯas, čaːǯas.
|
|
|
|
Medɨŋ qoj qunʼe kut tabɨm üːdost.
|
|
|
|
A qoj qun süntʼeɣɨnt awaj jen nano što kɨba tibequm tüan kwese.
|
|
|
|
Soɣunčulʼe üːbəraŋ.
|
|
|
|
“Ket menga, a kundar sü tʼarɨŋ, a kundar täp tʼärɨŋ.”
|
|
|
|
“A tap tʼärɨŋ: Tannani kolʼtʼäj qomdel, tannani maːdɨm nagorɨn qojalǯiku jaz midenǯin.”
|
|
|
|
Qoj qum tüːwɨŋ i tʼärɨŋ: “Man oneŋ qwalʼe kostenǯau.”
|
|
|
|
Nu i üːbaŋ, üːbaŋ.
|
|
|
|
Čaːǯis, čaːǯis.
|
|
|
|
Tülʼe medediŋ tʼöront.
|
|
|
|
Tɨdämban udɨmse kürɨt.
|
|
|
|
Tülʼe medädiŋ andoɣi tibiquni, tʼärɨŋ: “Omdɨk andɨn olond.
|
|
|
|
A man oneŋ omnenǯaŋ annɨn tʼiːbent.”
|
|
|
|
Nu i omdɨŋ.
|
|
|
|
Tʼöron tʼeres üːbən.
|
|
|
|
Tʼöron kän bart medɨdin.
|
|
|
|
I qaj tibequm kundɨŋ palʼdʼis andoɣɨn naugas sappɨstiŋ kɨːn baːrt.
|
|
|
|
A na qoj tibequm kalɨŋ andoɣɨn.
|
|
|
|
Nu i okkɨrɨlʼe palʼdʼiŋ andoɣɨn tidam.
|
|
|
|
Tau kɨːn bart tolʼko meːdɨčʼku, andoka tabɨm aj pani miʒalgut.
|
|
|
|
A tap tɨːndən kotä qawtä palʼdʼiŋ.
|
|
|
|
Nina qalɨŋ tʼöroɣɨn okkɨrɨlʼe.
|
|
|
|
A tabɨn nemt iːɣət na tibequm.
|
|
|
|
Tabɨn nemtse neːdɨn.
|
|
|
|
I tidam qoj tabɨnnane ilsan wes tau tibequnne wes tabne wes tabɨn udomtə pɨŋgɨlɨŋ.
|
|
|
|
I tidam nilʼdʼiŋ ilat.
|
|
|
|
Tʼäptä malʼčediŋ.
|
|
|
|
Onent seŋt tare nagɨrt.
|