|
|
PMP |
Ilɨmbaq warkɨmbaq Paʒenej nagur ewes, Nädej nagur ewes.
|
|
|
|
Kušaŋ ilɨzattə, ilɨzattə.
|
|
|
|
Okɨr dʼel Neden neːntɨne tʼärɨŋ: “Kɨba ni qardel qarimɨɣɨn tünǯiŋ meŋga Paʒineː.
|
|
|
|
Tʼarenǯiŋ:“ “Ačiga čeːtšʼ päːč.
|
|
|
|
Qajze amnaant?
|
|
|
|
Tamdʼel čorǯo qwädʼi tʼelɨːt.
|
|
|
|
Qwalaj satčum qwatku.”
|
|
|
|
Satčum qwatqu mazɨm qwannenǯaŋ.
|
|
|
|
Kušaŋ satčim qwatčaj.
|
|
|
|
Tʼärenǯiŋ: “Tʼägos tʼöna unǯirlaj.”
|
|
|
|
Unǯarlʼe omnenǯaj.
|
|
|
|
Perwa tabɨn ol mannɨmenǯau.
|
|
|
|
Mannɨmenǯau, mannɨmenǯau.
|
|
|
|
Tap meŋga tʼärenǯiŋ Paʒine: “Tan olomt mannɨplaj.”
|
|
|
|
Kušaŋ mannɨmenǯat, kušaŋ mannɨmenǯat man oloum.
|
|
|
|
Kɨba paze man oloum poǯolǯänǯit.
|
|
|
|
Man quːnǯaŋ.
|
|
|
|
Mazɨm penǯiŋ, madʼi kanǯiŋ ɨːlond penǯiŋ.
|
|
|
|
Man paːroɣeŋ penǯit satčim.
|
|
|
|
Man az adenǯa.
|
|
|
|
Mannani padi panizou tʼümbocʼka čotčoɣɨn kütterčenǯiŋ.
|
|
|
|
Medenǯiŋ qäːn bart.
|
|
|
|
A tan qän baroɣən tʼürlʼe nɨnʼenanǯ.
|
|
|
|
Paʒine tʼärenǯiŋ tʼeŋga: “Qajse nɨŋgantə tʼönaa.”
|
|
|
|
A tan tʼärennanǯ: “Alʼdiga, tan tüant?
|
|
|
|
A mamou kuʒan tʼünǯiŋ?”
|
|
|
|
Paʒine tʼärenǯiŋ tʼeŋga: “Qajze tʼälɨmmant?
|
|
|
|
Pʼäldɨk mazɨm madʼikanǯoqan üːgolgou.”
|
|
|
|
Tan tabɨn peldɨmenǯal.
|
|
|
|
Mannani padi panizoum kolʼdenǯal.
|
|
|
|
Aj warɣɨŋ tʼürlʼe üːbərenanǯ.
|
|
|
|
Poʒine tünǯaŋ ondə maːtqɨnt.
|
|
|
|
Satčilam sünimnenǯit.
|
|
|
|
Mazɨm maːt üːgulʼe tülǯenǯiŋ.
|
|
|
|
Mazɨm tʼägelʼlʼi üːbərenǯiŋ.
|
|
|
|
A tan kɨba neː čarɨk Paʒinen maːt part.
|
|
|
|
Wes ündədenǯal.
|
|
|
|
Mazɨm tʼägelʼlʼe taːdərenǯiŋ.
|
|
|
|
A newat tʼärenǯat: “Eumt tamdel amǯutt.
|
|
|
|
A nelamt kuʒan?”
|
|
|
|
Paʒene tʼärɨŋ: “Eomt amǯutt, a ilʼmaːdlat quː ɣadʼenǯat.
|
|
|
|
Ilʼemadlamt patom amǯit.””
|
|
|
|
Nedʼeː tʼärɨŋ neːɣant: “Maːttə tükkə, kɨba nanʼäkam taqqɨlǯ, wes tädomɨlam taqqɨlǯ.
|
|
|
|
Kɨba nanʼäkamt kedʼegont omdɨlǯet.
|
|
|
|
Kɨbelʼdʼöːs, kantəpelʼdʼöːs, pendɨ (taqqälǯ).
|
|
|
|
Nanʼäkamt kiːdent oːmdɨlǯet.
|
|
|
|
Tau tʼeŋga segɨllaga.
|
|
|
|
Tau seːgɨlagam küːrelǯet.
|
|
|
|
Kucʼedele segɨlaga püŋgɨlimban, i natʼedʼeːlʼe qurolk.
|
|
|
|
Tau teŋga solodi qočə.
|
|
|
|
Tau tʼeŋga püːsejla.
|
|
|
|
Qaptʼe tibɨnenanǯ.
|
|
|
|
Miːdenanǯ natʼedʼeːlʼe.
|
|
|
|
Teŋga qurčiŋ moːskaj kɨba kanaka.
|
|
|
|
Tan na kanakane qwatʼälgant solʼdeːt püːsseilam i qotčam.
|
|
|
|
Nilʼdʼiŋ i meːt.”
|
|
|
|
Eut tabne wes kennɨt neːntɨne äːǯarit.
|
|
|
|
Na pen Neːdeŋ tʼüːrɨŋ.
|
|
|
|
Net tüːrɨŋ.
|
|
|
|
Ukse, sojse nʼämtə netɨrnidi sət kɨba neː.
|
|
|
|
“Nilʼdʼiŋ ondɨ warkenǯilʼi.
|
|
|
|
Tidam tenan ewlʼe tʼäŋwenǯiŋ.
|
|
|
|
Qalɨmbɨdi pidʼel man tɨze tʼälɨmpan.
|
|
|
|
Mekga tʼezlʼi as qonǯirku.
|
|
|
|
I tʼeɣɨndi mazɨm as qonǯergu.”
|
|
|
|
Nu i nilʼdʼiŋ qondɨku kuʒannat.
|
|
|
|
Səd negat qondonnaq.
|
|
|
|
A Nedeŋ as qondan.
|
|
|
|
Tabɨm aŋgu az iːkut.
|
|
|
|
Nilʼdʼiŋ seːŋgɨn Nede tʼäkɨze səda kɨba nendɨze.
|
|
|
|
Nom tʼelɨmkɨŋ.
|
|
|
|
Tʼeːlɨt pɨrgɨn čanǯiŋ.
|
|
|
|
Nedeŋ wazɨŋ.
|
|
|
|
Sət kɨba nemt awstɨt.
|
|
|
|
Toːdannɨt, kawannɨt.
|
|
|
|
Kalɨmbɨdi pülʼdel uːkse, sojse nʼämdat niternat, nilʼdʼiŋ nʼämdət.
|
|
|
|
Toːdalʼlʼe nitärlʼe malčatt.
|
|
|
|
A ondət tʼüratt.
|
|
|
|
Nedem qassodi Paʒine taːɣədʼeŋ.
|
|
|
|
Paʒine tʼärɨŋ: “Tʼägus tʼönaa, qwallaj.
|
|
|
|
Tamdʼel sorǯo qwedʼi tʼeːlɨt.”
|
|
|
|
Nu i Neden tʼimbennɨŋ, qwannɨŋ Paʒeneze.
|
|
|
|
Ond kɨba səd nemt kwedʼät okkɨrɨlʼe eugalɨk teːgaŋ sət kɨba nelamt.
|
|
|
|
“Neː tɨdam ondi elalʼi warkalʼi.”
|
|
|
|
Nu i nilʼdʼiŋ Paʒineze qwannɨŋ.
|
|
|
|
Ont teːrban: “Tɨdam meŋga az iːlgu.”
|
|
|
|
Medaq Paʒineze na čočont kutʼen satč orumpan.
|
|
|
|
Satč süsöguj tʼeːlɨmpan kocʼiŋ.
|
|
|
|
Nedeŋ tʼeːrban: “Satč, saːtč, qajno kocʼiŋ tʼeːlɨmant?
|
|
|
|
A tan bɨ tʼeːlɨmnent ergekaŋ man bə ešo kundəlak iːlneŋ.
|
|
|
|
A tan tʼelɨmant pagaŋ, pagaŋ.
|
|
|
|
Me tʼäŋ qwačaj sətqun Paʒineze.”
|
|
|
|
Ondə tʼeːrban: “Man tʼäŋ qunǯan.”
|
|
|
|
Satče qwatlʼe üːbəraq Nedet Paʒineze sədəqun.
|
|
|
|
Paʒene tɨːdəmpan, a Nedeŋ sündeqɨn nilʼdʼiŋ jewan qwattɨgu ass qwattɨgu.
|
|
|
|
Qwattɨŋ as qwattɨŋ.
|
|
|
|
Nedʼen udla qwattɨgu as kɨgattə.
|
|
|
|
Kundar as qwattɨŋ, a tabɨn udoɣɨndo satčila pɨgelʼlʼe čaǯatt.
|
|
|
|
A Paʒine as saralǯikut, kundar kɨba Nedeŋ satče qwattɨŋ.
|
|
|
|
Az našaŋ tap satči qwattɨŋ, kušaŋ tüːrɨŋ.
|
|
|
|
Satčum kwannɨdi, qwannɨdi tʼäŋ.
|
|
|
|
Paʒine tʼärɨŋ Nedeːne: “Tʼägus tʼönaa unǯarlaj.”
|
|
|
|
Nedʼeŋ tejeptɨŋ: “Tɨdam tan mazɨm qwačant.
|
|
|
|
Mannan sət kɨba new teːgaŋ qwädʼänǯal.”
|
|
|
|
Nu, unǯirlʼe üːbəraq.
|
|
|
|
Nedeŋ Paʒinen olɨm mannɨmpɨst.
|
|
|
|
Paʒine tʼärɨŋ: “Tan olomt mannɨmpɨlaj.”
|
|
|
|
Nu i Nedeŋ kuʒannɨŋ mannɨmpɨku oːlɨmt mewɨt.
|
|
|
|
A Paʒine qaj tɨːdəmpan.
|
|
|
|
Mannɨmpat tʼäŋ Neden oːlɨm, ass kundɨŋ mannɨmpɨst Neden olɨm.
|
|
|
|
Kɨba paze poʒolǯit kɨba Nedeŋ olount.
|
|
|
|
Kɨba Nedeŋ nanʼäŋ quon.
|
|
|
|
Sət kɨba net kalɨŋ tʼeːgaŋ.
|
|
|
|
Paʒine andannɨŋ.
|
|
|
|
Kɨba Nedʼem üːgonnet madʼi qannonǯ pennɨt, paːraont satčum qännɨt.
|
|
|
|
A kɨba Neden paːnes tʼümbəcʼka padi čočoon küternɨŋ.
|
|
|
|
Paʒine üːbɨŋ madʼe qanǯokaze.
|
|
|
|
Satčum üːgɨlbat.
|
|
|
|
Nedʼem üːgəlbat.
|
|
|
|
Taːdərast, taːdərast.
|
|
|
|
Medɨŋ qɨn qɨn bart.
|
|
|
|
Qän baːroɣɨn nɨŋan Neden kɨba net.
|
|
|
|
Neden kɨba net tʼärɨŋ: “Alʼdiga, a tan tüant.
|
|
|
|
A mamau kuʒan tʼünǯiŋ?”
|
|
|
|
“Mamal kuː qadenǯiŋ?
|
|
|
|
Solakaj tʼäqɨon qwanǯiŋ.
|
|
|
|
Pergekaj tüːroɣɨn seːŋenǯiŋ.
|
|
|
|
Tüdakaj tʼäkoon tüːnǯiŋ.”
|
|
|
|
A kɨba Neden neːt qolʼdʼit eunt warq paːnesɨŋ padi.
|
|
|
|
A ondə tʼürɨŋ.
|
|
|
|
Tʼärɨŋ:“ “Qajzi nɨŋant?
|
|
|
|
Peldɨk mazɨm natʼe qanǯokam üːgɨlgu.”
|
|
|
|
Kɨba Neden neːt peldɨt.
|
|
|
|
Maːdʼe qanǯokam üːgənnɨdi qän paːrt.
|
|
|
|
Paʒine midɨŋ maːtqɨnt.
|
|
|
|
Neden neːt quronnɨŋ maːtqant.
|
|
|
|
Az warkaŋ maːtqɨn eːgedʼdʼeŋ.
|
|
|
|
A ondɨnan seːdet küzɨŋ.
|
|
|
|
Quronnɨŋ Paʒinen maːt pat seːɣɨnnɨŋ.
|
|
|
|
Üŋgɨlǯimban soːlan sündʼeon, qaj kelʼe taːdɨrɨndɨt neːlandɨze.
|
|
|
|
Poʒine nela tʼäratt eondɨne: “Eumd tamdʼeːl amǯutt, a neːlamt kuʒan?”
|
|
|
|
Paʒine tʼärɨŋ: “Eumt amǯut, a nelat kutʼet kadenǯat.”
|
|
|
|
Kɨba Neden net üŋgulǯiŋ.
|
|
|
|
Tʼäno quronnɨŋ.
|
|
|
|
Maːttə tüan.
|
|
|
|
Kundar tabne eut tʼärzan, kɨba neden neːt nilʼdʼiŋ i takkɨlʼe üːbəratt eɣɨldaglam.
|
|
|
|
Ondə tɨdɨmpan.
|
|
|
|
Eɣɨldaglam taqqɨnnɨːt.
|
|
|
|
Kɨbelʼdʼös kantəpilʼdʼös, pennɨt.
|
|
|
|
Kɨba nenʼämt omdəlǯit kiːdent.
|
|
|
|
Iːɣət seːgɨlagam.
|
|
|
|
Kundar tabne eːwɨt tʼärɨs, seːgɨllagam palʼdʼölǯit.
|
|
|
|
Iːɣat püːsejlam, solodə koːčim.
|
|
|
|
Nu i kuronnɨŋ, kuronnɨŋ kɨba nanʼändɨse.
|
|
|
|
Qursan, qursan.
|
|
|
|
A kɨba nanʼäkat türlʼe üːbəraŋ.
|
|
|
|
Aːbat kiːdam čačit, kɨba nanʼäkant awstɨmblʼe üːbəratt kebelʼdʼösse kantəpilʼdʼösse.
|
|
|
|
Kɨba nanʼäkat az warkaŋ uːdərɨŋ.
|
|
|
|
Abat kiːdam tiːrannɨt.
|
|
|
|
Aj quronnaq.
|
|
|
|
Qurs, qurs.
|
|
|
|
Kɨba nanʼäqət aj tʼürlʼe üːbərɨŋ.
|
|
|
|
Abat niŋɨt kiːdam.
|
|
|
|
Iːɣat nanʼäkant.
|
|
|
|
Austembat kübelʼdösse qandəpüldʼösse, mɨrolǯimbat.
|
|
|
|
A kɨba nanʼäkat kundar tʼüːrɨŋ niŋ i tʼürɨŋ.
|
|
|
|
Abat täːrban: “Man dast kundarnäj tast austembaŋ, a tan kundar tʼürant, niŋ i tʼürant.
|
|
|
|
Mega az üŋgelǯikwant.
|
|
|
|
Man tast qwedʼänǯaŋ.
|
|
|
|
Ato Paʒine tʼüːnǯiŋ, meswi midrenǯiŋ, tast amǯiŋ i mazɨm amǯiŋ.
|
|
|
|
Paʒine ɨst amni.
|
|
|
|
Nu i qwädʼit nanʼäkamt kiːtse.
|
|
|
|
Ondə quronnaŋ, quronnaŋ.
|
|
|
|
Qurs, qurs.
|
|
|
|
Nanʼäkamt iːdernɨt.
|
|
|
|
Qwesse quronnaŋ, kuten nanʼäkat kalɨŋ kiːtse.
|
|
|
|
Qurlʼe tüan.
|
|
|
|
Teːrban: “Paʒine amgu, amgu, meːzwi sətqun amni.”
|
|
|
|
Tʼäbət kiːdəm.
|
|
|
|
A nanʼäkat kiːdan sündʼeɣɨn püj lozɨŋlʼe pürolʼdʼimban.
|
|
|
|
Aːbat tʼerban: “Xocʼ püj lozɨŋlʼe pürolʼdʼänt, jelaj okkɨrmɨɣɨn.”
|
|
|
|
Nu i tiːrannɨt kiːdem nanʼäkantse.
|
|
|
|
Qurnɨŋ, qursan, qursan.
|
|
|
|
Medɨŋ qɨn qäːn baːrt.
|
|
|
|
Taj plʼekaj qɨn qän baːrɣɨn palʼdʼiŋ pajaga.
|
|
|
|
Kɨba Neden neːt laŋgonneŋ: “Alʼdʼikaaa!
|
|
|
|
Meŋga andokam puːdəlʼent.
|
|
|
|
Mazɨm Paʒine amgu qaːɣan.”
|
|
|
|
Pajaga tʼärɨŋ: “Noː, qaptʼemɨlʼe qaj qarlaj olʼi paja jes.”
|
|
|
|
Kɨba Neden net tʼärɨŋ: “Noːoo, alʼdʼiga.
|
|
|
|
Tan olol qarlaŋ az jeŋ.
|
|
|
|
Tan oːlol kak qwandɨn oːl.
|
|
|
|
Andoka meŋga puːdək.
|
|
|
|
Ompe, ompe mazɨm amǯiŋ Paʒine.”
|
|
|
|
Pajaga tʼärɨŋ: “Qaptʼemɨlʼe qaptʼemɨlʼe qaj parsaj pajaga jeːs.”
|
|
|
|
Kɨba Nedʼen neːt tʼärɨŋ: “Tan nepsol parsaŋ as jeɣan.
|
|
|
|
Aːn kalarlʼe čaːǯendi neden nepsɨn tare jeɣan.
|
|
|
|
Andoka üːdək.
|
|
|
|
Paʒine mazɨm amǯiŋ.”
|
|
|
|
Pajaga tʼärɨŋ: “Qaptʼemɨlʼe qaptʼemɨlʼe qaj nedi quŋgɨlʼi paja jees.”
|
|
|
|
“Nu alʼdʼiga, tan tobol nidɨŋ az jeɣan.
|
|
|
|
A tan tobol nilʼdʼiŋ jeɣan.
|
|
|
|
Andoka üːdək.”
|
|
|
|
Pajaga maːdɨn taqqɨndo iːwɨt andoqam.
|
|
|
|
Nʼämpoːdʼet.
|
|
|
|
Kɨba Neden neːt püːcʼowɨŋ tʼeres.
|
|
|
|
Tabne qurnɨŋ, qurnɨŋ moːskaj kɨba kanaka.
|
|
|
|
Lʼädʼimpan:“ “Wow, wow!
|
|
|
|
Sent ajgou čaǯint.”
|
|
|
|
Kɨba Nedeŋ solʼdʼit moskaj kanane püːssejlam i qoːtčim.
|
|
|
|
Moskaj kanaŋ qurnɨŋ, andalbat püːsselaze, qotčize.
|
|
|
|
“Wow, wow.
|
|
|
|
Send ajgou čaǯant.
|
|
|
|
Meŋga püːssejla tatet, solode qotč.
|
|
|
|
Nugoum čočont tʼeːɣɨlbat.”
|
|
|
|
Paʒine qonselʼdʼeŋ kɨn qän part.
|
|
|
|
Tʼärɨŋ: “Alʼdʼigaː, andokam talʼent.”
|
|
|
|
Pajaga tʼärɨŋ: “Qaptʼemɨlʼe qaptʼemɨlʼe qaj warsapaj olʼi paja jes.”
|
|
|
|
Paʒine tʼärɨŋ: “Olol padi nano warsapaŋ az jeɣan.
|
|
|
|
Andokaj üːdak,” – Paʒine tʼärɨŋ.
|
|
|
|
Pajaga tʼärɨŋ: “Qaptʼemɨlʼe, qaptʼemɨlʼe qaj parsaj nipsi paja jes.”
|
|
|
|
Paʒine tʼärɨŋ: “Olol warsapaŋ az jewan.
|
|
|
|
Nipsol padi nano parsaŋ as jeŋ.
|
|
|
|
Andoka üːdək.”
|
|
|
|
Pajaga tʼärɨŋ: “Qaptʼemɨlʼe qaptʼemɨlʼe qaj nidi quŋgɨlʼi paja jes.”
|
|
|
|
Paʒini tʼärɨŋ: “Tobɨl nano quŋgɨlɨŋ az jewan.”
|
|
|
|
Maːdən takt quronnɨŋ pajaga.
|
|
|
|
Quronnɨŋ, quronnɨŋ.
|
|
|
|
Tannɨt twej andokam.
|
|
|
|
Paze perelaɣənnɨt.
|
|
|
|
Paʒenini nʼämpodʼit.
|
|
|
|
Paʒine omdɨŋ üːbədʼiŋ (tʼönǯimaːrɨk).
|
|
|
|
Qɨn sajgɨnt andokat üsse tiːrədʼiŋ.
|
|
|
|
Paʒine üt qowɨŋ.
|
|
|
|
Laŋgɨneŋ “sət kɨbaneː”, laŋgɨneŋ “sət kɨbaneː”.
|
|
|
|
Nilʼdʼiŋ i qowɨŋ.
|
|
|
|
Paʒinnan sədə neːt nej tʼegaŋ qalaq.
|
|
|
|
Kɨba Nedʼe pajagaze maːt seːrnaq.
|
|
|
|
Pajagɨnnan tüan iːt.
|
|
|
|
Aurgu omdat.
|
|
|
|
Pajaga tʼärɨŋ: “Iː, ont tobɨn tʼümbədi nedeŋ.
|
|
|
|
Tabɨm iːlʼel nedlʼent tapse.”
|
|
|
|
Iːt teːrban: “Nu netku keregeŋ.”
|
|
|
|
Neːtɨŋ.
|
|
|
|
Iːlɨlʼe üːbərattə.
|
|
|
|
Erat köcʼkuŋ suːrulʼlʼe.
|
|
|
|
Natʼento tʼükuŋ, aurgu oːmdəkuŋ.
|
|
|
|
Nedeŋ apsodimɨm taqqɨlʼe üːbərkut.
|
|
|
|
Soːɣulgut perwaj pizaɣən tʼätčikut kɨba nanʼäntɨne.
|
|
|
|
A nɨnto soːɣulgut erantɨne.
|
|
|
|
Erat nilʼdʼiŋ aurguŋ.
|