This visualization was generated on 15.11.2021 with Corpus Services.

PMP Сказка про голову.
Elɨmbaɣ warkɨmbaɣ era pajasak.
Erat palʼdʼukuŋ suːrulʼe.
Pajat maːtkan jewan.
Erat pajantɨne tʼärkuŋ: “Tan segam perčilʼent.”
“Nu perčulʼewsʼe.”
Erat aj köčʼkuŋ suːrulʼe.
A pajat pürčugutčiŋ i pürčugutčiŋ.
Okkɨr paragɨn erat tʼärɨŋ pajantɨne: “Aː qaj tan seːgɨm perčumbal?”
“Perčumbow.”
“Kotʼiŋ perčal?”
“Sət seːgɨlaga.”
A tap perčumbat okkɨr seːgɨlagam.
Au plʼekaj konʼ dʼärmɨnt aːdolǯikut, aj au plʼekaj konʼ dʼärmɨnt aːdolǯikut natə seːgɨlagam.
Nu kušan elɨzaq, elɨzaq.
Okkɨr paraɣɨn erat aj soɣunǯiŋ pajandɨnan: “Tattə menga segam.”
Pajat mikut tabɨne okkɨr segɨlagam.
Erat sorumlʼe üːberkut poŋgɨm.
Soːrumenǯis, sorumenǯis.
Segɨlaga malʼčediŋ.
Pajandɨne tʼärɨŋ: “Qajɣanʼ eŋ au seːgɨlaga?”
A pajat tʼärɨŋ: “A man okkɨr seːgɨlagam pürčizaŋ.”
“A tan qajno sideptant?”
Erat tʼüwɨŋ, pajamdə qwalʼlʼe üːbərat.
Qwannɨt, qwannɨt, qwannɨt.
Ponʼe nʼämbodet.
Pajat tʼüraŋ.
Pajat qwannɨŋ, qwannɨŋ.
Čaːǯas, čaːǯas.
Medɨŋ nildi sarbont, quːn pɨrgi lɨ sarɨp.
Kanan lɨ pɨrgi sarɨp.
Čaːǯis, čaːǯas.
Manǯedʼiŋ iːbkaj maːt aːmnant.
Tap teːrban: “Qaj maːt jezan.
Kut na maːtqɨn warkɨnt, qwalʼe mannɨmmenǯau.”
Qwannɨŋ na maːtt.
Maːttə seːrnaŋ.
Maːtqɨn kudnej tʼäŋgwat.
Ponä čanǯiŋ.
Manǯeːdʼiŋ: iːbkaj aran aːmnant.
Näjqum üŋgulǯiŋ, kutʼenda qajda nerɣɨrnɨŋ.
Soːtʼkaŋ manǯeːdiŋ, čaːǯat kündəla nʼüːǯə kanǯelase.
Näjqum kɨtʼiwannɨŋ.
“Man tidam kutʼet kadlaŋ?
Ass tunou kutʼet ateːčʼku.”
Näjɣum ponä nɨŋan, manɨmpan.
Kündəla nʼüǯe qanǯise čaːǯat.
A nʼüǯe kanǯilan moqɨn püŋgelɨmban qun ollaga.
Näjɣum kočiwannan.
Ateːdiŋ.
Üŋgulǯimban.
A ond mannɨmpan, qaj mekwenǯit ollaga kündɨlandɨse.
Ollaga tʼärɨŋ: “Maːda nʼögadik.”
Nu i maːdə nʼögadiŋ.
Kündila sernatt.
“Kudgola tikɨslʼe čaǯaltə.
Ɨːbaj pola ondalt qoptoɣɨndɨlt qwannaltə.
Plʼejboː nʼüʒim sinʼumǯet.”
Okkɨr kanǯim plʼejboː sinʼümǯit.
(tabɨnan plʼejboːla) Tabla ondɨt uːdʼät.
Ollaga tʼärɨŋ: “Kündɨla, čaǯaltə ondɨlt qoptoɣɨndɨlt (aralgandɨlt).
I kündila čaǯaltə ondɨlt qoptoɣɨndɨlt.
Xamudla, tugala niŋgɨstʼilʼe čaːǯaltə.”
Ollaga qaim ketkut, tabne wes üŋgulǯimbattə.
Nu i wes kündila nilʼdiŋ serkuzattə nʼüʒe kanǯilajze.
Nu i wes kündɨla nildʼiŋ serkuzattə nʼüʒə kanǯilaze.
Nüːʒilam wes kännat (nildʼiŋ süniŋǯattə).
A näjgum mannɨmpan kundar ollaga tʼälɨmban kündɨlaze.
Ollaganan wes kündɨla aralǯ seːrnat.
Ollaga kündəlane tʼärkuŋ: “Aralǯ seːrnaltə.”
Kündəla aralǯ sernatt.
“Aran mada ludolǯilǯik.”
Näjqum kocʼiwannɨŋ.
Tʼänno kuronnɨn mattə.
Maːttə seːrnɨŋ.
“Kutʼet kadɨgu menga?
(Čanʼenǯaŋ).
Sɨːɣəlǯenǯan warɣ porən part.
I sɨɣännɨŋ warɣə purən part.
Ollaga mattə seːrnaŋ.
Omdarsa pon part omdɨŋ.
Tʼärɨŋ: “Apsot kej čaːǯaltə meŋga stol bartə.”
Nu i apsot kej stol bart wes čaːǯat.
Ollaga aurnɨŋ, aurnɨŋ.
Aurlʼe malčiŋ.
Tʼärɨŋ: “Apsot kej pizagla qwannaltə ondɨlt qoptoɣɨndɨlt.”
Apsot kejla pizagla qwannattə ondɨːt qoptoɣɨndɨtt.
Ollaga tʼärɨŋ: “Kutʼet meŋga qondɨgu?
Ɨnnej porant kuʒalgu, pɨŋgɨlʼenǯaŋ.
Petʼ part kuʒalgu, püŋgɨlʼimenǯaŋ.
Somman sünʼent konenǯaŋ.
Mada nʼügodʼik.
Soma serk.”
Soma sernaŋ.
Ollaga sɨɣannɨŋ soman sünʼnʼent qondɨgu.
I qondonnaŋ ollaga.
Nuːnädʼimpan, qondonnäŋ orse.
Näjɣum tuːcʼowɨŋ warɣə puroɣɨndo.
Čanǯiŋ ponʼe.
Tannɨt ponʼänto sommaj poːm.
Ollagam tʼökolʼlʼe üːbərat.
Ollaga lagɨneŋ.
“Ajga peška baːrow.”
Nu näjɣum tabɨm nildʼzʼaredɨŋ qwannɨt.
Ont warklʼe üːbəraŋ na maːtqɨn.
Seŋgɨŋ.
Ponʼe čanǯiŋ.
Tʼärɨŋ: “Aran mada nʼüːgodʼik.”
Aran maːda ass nʼüːgočʼkuŋ.
Näjɣum ondə nʼüːɨt.
“Plʼejboː pendə nʼüʒim.”
A plʼejboː ass üŋgulǯikuŋ.
Nejgum ondə nʼüːɨt aran maːdam.
Nʼüʒlam ontə pennɨt.
Nejɣune kudnej ass üngulǯikuŋ.
I nilʼdʼiŋ warkəlʼe übəraŋ oːnt.
Kušaŋ warkɨs, warkɨs.
Erat suːrulʼe palʼdizan.
Kolʼdit na maːdəm.
“Qaj maːt eppan.
Sergu keregeŋ.
Kud natʼen warkɨnt.”
Maːttə sernaŋ.
Kolʼdʼit pajamt.
“Aː, tan paja tautʼen warkand?”
“Tautʼen warkaŋ.
Mazɨm iːlʼent.”
“A qajno man tast iːnǯaŋ?”
“Tan mazɨm qwasandə, qwasandə, ponʼe nʼämboːtisant.
A man čaːǯisaŋ, čaːǯisaŋ.
Kolʼdisaw tau maːdəm.
Maːttə seːrsaŋ.
Kudnej tʼäŋwan.
Pone čanǯaŋ.
Ündɨdʼäw, kanǯila nʼeːrɣɨmbattə.
Kanǯilan moqɨn püːŋgɨlʼimban quːn ollaga.
Na ollaga man qwassaw.
I oneŋ warkaŋ tidam.
Nu iːk mazɨm.
Setqun warkɨlajsʼ.
No tʼükkə.”
Nu i erat tʼüan.
Sətqun warkɨlʼe üːbəraq.
I naze tʼäptä malčediŋ.