|
|
PMP |
Ilzaq warkɨzaq Iːdʼäj aːlʼdigazɨk.
|
|
|
|
Aːlʼdigat qwälɨlʼlʼe palʼdʼukuŋ, a kɨba Iːdʼe matqən jen waːrkan.
|
|
|
|
Aːlʼdʼigat kušaŋ orumčlʼe taːdərɨst, Iːdʼä wargɨŋ oːrumneŋ.
|
|
|
|
Alʼdigandəni tʼärɨŋ: “Man tidam oneŋ qwälilʼe palʼdenǯaŋ.”
|
|
|
|
Alʼdʼigat ass üːtkut, a Iːdʼa tʼärɨŋ: “Man oneŋ qwälʼɨtʼänǯaŋ.”
|
|
|
|
Aːlʼdigat tʼärɨŋ: “Taːmi tʼöron tibent palʼdʼik, a taŋi tʼöron tibent ik palʼdʼik.
|
|
|
|
Natʼen könsej tutola, könzej i padala.”
|
|
|
|
Nu i Iːdʼä qwannɨŋ poːŋglam ponnɨt.
|
|
|
|
Mattə tüan, seŋgat.
|
|
|
|
Qarimɨn wazɨŋ, poŋgɨlandə qwannɨŋ.
|
|
|
|
Medɨn poŋgɨlaɣɨnt tudola qwädɨmbat soːtʼka.
|
|
|
|
Tudolam qwälam kocʼin qwannɨt.
|
|
|
|
Tʼäːlladaq.
|
|
|
|
Üːdəmɨɣɨn aj qwannɨŋ poŋgɨlam potku.
|
|
|
|
Taːmi tʼöron tibent ponnat.
|
|
|
|
Ontə tʼerban: “Qajno mazɨm alʼdʼiga az üːtkuŋ taŋi tʼöront?
|
|
|
|
Taŋi tʼöron tiːpent uʒo man köčʼkulaŋ.”
|
|
|
|
Nu i qwannɨŋ taŋi tʼöron tiːbent.
|
|
|
|
Ponnet poŋgɨlam.
|
|
|
|
Tudola qwädat kocin.
|
|
|
|
Okkɨr tudon sej paqɨlgundɨt, sejt taːdɨŋ jeŋ.
|
|
|
|
Sədəmǯelʼe tudon seim paqkɨlgut, nej taːdɨŋ jeŋ.
|
|
|
|
“Nu alʼdiga, sideptɨmban meŋga.
|
|
|
|
Mazɨm aːlɨmban.”
|
|
|
|
Nu poŋgɨlamt qwädit.
|
|
|
|
Sədə mɨɣɨn ponnat poŋgɨlam.
|
|
|
|
Ondə teːrban: “Qajno man taŋi tʼöron tibent qwanǯaŋ andɨze?
|
|
|
|
A man tadotet udɨrɨlaŋ tau tʼöron tibent.”
|
|
|
|
Nu i niŋ i mewat.
|
|
|
|
Uːdərɨŋ.
|
|
|
|
Andɨm qandolǯit.
|
|
|
|
Ont üːbaŋ.
|
|
|
|
Čaːǯis, čaːǯis.
|
|
|
|
Medɨdʼeŋ, Püneksün tüt.
|
|
|
|
“Aː!
|
|
|
|
Pünüksü tütpan?”
|
|
|
|
A tüt tabɨm qwegɨlǯimbat: “Pönüksü tʼütpan?”
|
|
|
|
Iːdʼä tʼarɨŋ: “A tan mazɨm qweɣɨlǯimenanǯ?”
|
|
|
|
Uduntse qätɨt Pünüksin tüdɨm.
|
|
|
|
Uːdət parədiŋ.
|
|
|
|
“Aː!
|
|
|
|
Tan manane udou orannal.”
|
|
|
|
Tüt tabɨm qwegɨlǯimbat.
|
|
|
|
Iːdʼän ut parɨdʼiŋ tüttə.
|
|
|
|
Iːdʼä tüːwɨŋ.
|
|
|
|
Sədəmǯelʼe udumtse qätɨt, i sədəmǯelʼe uːdut parɨdʼeŋ.
|
|
|
|
“Tan mazɨm aj qwegɨlǯimant?”
|
|
|
|
Iːdʼä aj warɣɨn tʼüwɨŋ, tobɨntse tabonnant.
|
|
|
|
Tobɨt parɨdiŋ.
|
|
|
|
“A tan man toboum aj orannan?”
|
|
|
|
A Püneksün tüt tabɨm aj qwegɨlǯimbat.
|
|
|
|
A Iːdʼe aj warɣɨŋ tʼüːwɨŋ, sədəmǯelʼe tobɨntse kak tabunnɨt, i tobɨt aj parɨdʼeŋ.
|
|
|
|
“A tan manani sədəmǯelʼi toboum orannal?”
|
|
|
|
Iːdʼä tüːwodiŋ, kak čanǯeqatse padʼännɨt Püneksün tüdɨm.
|
|
|
|
I čänǯiqat parɨdiŋ Püneksün tüttə.
|
|
|
|
Nu i Iːdʼä qotä tasettɨze močkan Püneksen tütqɨn.
|
|
|
|
Pünekse čaːǯiŋ.
|
|
|
|
“Aːaː!
|
|
|
|
Kaːtər!
|
|
|
|
Manani tütqɨn mačkant.”
|
|
|
|
Nu i Pünekse Iːdʼaw iːut, kiːdʼent omdolǯit.
|
|
|
|
I üːbeŋ Pünekse Iːdʼäze.
|
|
|
|
Kušaŋ Iːdʼäm taːdərɨst, taːdərɨst.
|
|
|
|
Iːdʼä täːrban: “Manan wetʼ kɨba pa jetan.”
|
|
|
|
Qɨba paːm iːɣat, Iːdʼä kejdɨgun (kidan) tibɨm maːʒit i natʼen tʼönǯikan tʼäːnǯiŋ kiʼdʼäɣɨndo.
|
|
|
|
Nu i kuronnɨŋ Püːneksenanto.
|
|
|
|
Püːnekse warɣɨŋ erampa, az ünselʼdet kundar Iːdʼä quronnɨŋ.
|
|
|
|
Qurs, qurs, qurle tüan maːtqɨnt.
|
|
|
|
Alʼdikat tʼärɨŋ: “Tan qajno qundɨŋ jewat?”
|
|
|
|
“A man nano kundɨŋ jewaŋ, taŋi tʼöron tiːbent poŋgɨlam ponnau, a oneŋ tʼeːrba: qajno tan mazɨm ass üːtkwant taːmi tʼöron tibent.
|
|
|
|
Nu i kɨgelaŋ qwaŋgu.
|
|
|
|
Qwannaŋ, poŋglam ponnau.
|
|
|
|
Tudola qwedʼälattə.
|
|
|
|
Tʼeːq tudon seim paqkɨlgow, seit taːdɨŋ jeŋ.
|
|
|
|
Nʼärɣ tudon sein paqkɨlgow, näj taːdɨŋ jeŋ.
|
|
|
|
Nu i poŋgɨlam potqɨnaŋ.
|
|
|
|
Taŋi tʼöron tibent ass kɨgelaŋ tügu andɨze.
|
|
|
|
Taːmi tʼöron tibeɣan uːderaŋ, andokau üːgənnau.
|
|
|
|
Qɨn bart čanǯaŋ, a natʼen wattə čaːnǯečʼka, čaːnǯečʼka.
|
|
|
|
A man na watoɣɨn üːbaŋ.
|
|
|
|
Čaǯisan, čaǯisan.
|
|
|
|
Püneksen tüt qondaŋ medɨdʼäŋ.
|
|
|
|
Udouse qättɨzau, a Püneksen tüt mazɨm qwegɨlǯimban.
|
|
|
|
Man aj au udoze qätau.
|
|
|
|
Püneksen tüdɨn manan udou aj paːrɨdʼiŋ.
|
|
|
|
Tobouse tabonnau, tobou parɨdʼäŋ.
|
|
|
|
Aw tobouse tabunnaŋ, näj parɨdiŋ, čaːnǯiqatse qätau, čanǯiqadow parädiŋ.
|
|
|
|
Nu i qotä tasense maːškaŋ.
|
|
|
|
Püneksen tüan: “Aːaː!
|
|
|
|
Tan man tütkäŋ parɨdimant?”
|
|
|
|
Mazɨm iːwan Pünekse, oːmdolǯiŋ kiːdʼent.
|
|
|
|
Nu i taːdərɨŋ mazɨm, a man täːrbaŋ: mannan jewan kɨba paː.
|
|
|
|
Na paːm iːow, kiːdən ɨːlam maǯau, tʼönǯikaŋ tütöwaŋ kʼidäɣɨndo i quronnaŋ.
|
|
|
|
Pünekse mazɨm aːz ünselʼdʼiŋ.
|
|
|
|
Nildʼiŋ man mattə tüaŋ.”
|
|
|
|
Alʼdʼigat tabnä tʼüwɨŋ: “Ax, tan, qatorond!
|
|
|
|
Man teŋga tʼärzaŋ, taːmi tʼöron tiːbent ik palʼdʼik, a tan meŋga as üŋgɨlǯiqwant.
|
|
|
|
Na qaj mental?
|
|
|
|
Tidam Pünʼekse tünǯaŋ, meswiː aːmǯiŋ.”
|
|
|
|
Nu i kušaŋ alʼdʼigat tabnä tʼümbɨs, tʼümbɨs.
|
|
|
|
Kušaŋ ik tʼümbɨk, qaimnej as menǯal.
|
|
|
|
Kɨba Iːdʼe qwannɨŋ poŋgɨlam mannɨmbɨgu.
|
|
|
|
Tudolam kocʼiŋ qwannɨt.
|
|
|
|
Mattɨ tüan.
|
|
|
|
Alʼdʼigat tudolam meːɣɨt, poːnnat.
|
|
|
|
Man nej jezan tabɨstʼännan.
|
|
|
|
Tudolam apsaw, araŋkam üssaw, aːkento küːlǯdis, aːkeŋ ass orwassen.
|
|
|
|
Nu i tʼäptä malčediŋ.
|
|
|
|
Nagɨrtə qazasen.
|