This visualization was generated on 15.11.2021 with Corpus Services.

PVD Xrestjan era.
Tʼelɨmnɨn Xrʼestʼän era.
Täbnan naːgur iːt.
Iːlat wes nädälattə.
Okkɨr iːt qɨdan surulle palʼdükun, warɣə iːt.
A sət (sədə) iːt skatʼinalaze palʼdüqwaɣə, sɨrla warədattə, kütdɨla i konɛrla.
I pašnä wardattə, apsot sejakudattə.
A warɣɨ iːt kɨːdan madʼöt paldʼän (paldʼikun).
Tebnan neːt tʼelɨmda i iːga tʼelɨmda.
Tebɨstaɣə warɣɨn aːzuaɣə (aːzuaq).
A täp natʼen madʼöɣɨn iːbɨɣaj maːt omdɨlǯɨmɨtdɨt, iːbɨɣaj maːt.
Äotdänä äzätdänä tʼärɨn: “Nomse mazɨm paslawikə.”
Äutdə nomɨm iːut i paslawinɨt.
“Man qwatǯan.
Naːgur agazlaftə okkɨr maːtqɨn ass elʼetǯutu.
Manan täper sʼämjau.”
Saozniktə wes tädomɨmdə tuɣunnɨt.
I na üːbɨtdattə.
Ästɨ äudɨ i türlʼe na ɣalɨtdattə.
I täbla i na qwatdattə.
No i tüle na medɨtdattə.
A tebnan natʼen iːbɨɣaj maːt omdəlǯəmɨdɨt.
Wes tuɣunnattə natʼet.
No i ärat wes melʼe taːdərat, qoptə metdɨt.
“Qardʼen madʼöt qwatǯan.
A tan üdno na qwannaš.
Toboɣät qajam struška papalan ig azü.
Ato aːwan jetǯan.”
No sekgattə.
Qarʼemɨɣɨn wazɨn, aurnɨn i na qwatda madʼötdə.
A näjɣum tʼärɨn: “Qajno mekga ärau tʼärɨn, što struška üttə papalan ik azə.
Man sičas sət wedram struškalaze nabineǯau, nabinäǯau, qwalʼlʼe üttə qamnätǯau.”
I na qwannɨdɨt i qamǯɨt.
Nɨkga i mannɨpaːt.
A natʼen köunɨn.
Täp üdɨm soɣunnɨt i maːttɨ tüa.
A täp krasiwa näjɣum jes.
Qwalʼlʼe sütʼdinäj maːttə omdɨn i südɨrlʼe übɨran.
A sət qɨbanʼaʒa warkaɣə.
Razbojnigla čaʒatdə atdɨzʼe i tʼärattə: “Qaj struškala (köudattə) küuze čaːʒɨdattə.
Qən barɨnʼä praibet!”
Tebla mannɨpattə qajda wattɨ.
Täbla wattɨga kotdattə.
“Ugon me tau wattɨm jass qoǯɨrguzautə.”
Na wattogatdə (na watotdə, na watotdə) i uːdurattə.
Attaman tʼärɨn: “Tä aːmdaltə tɨtdɨn, a man qurollan mannɨbɨlʼeu qaj ilatda tɨtdɨn.”
Na qurolǯa.
Tüa, sernɨn maːttə.
“Tʼolom.”
Näjɣum tʼärɨn: “Tʼolom, tʼolom.”
Stul čečelʼe meʒalǯɨt.
Tʼärɨn: “Omdak tɨkga.”
A täp omdɨn.
Kulupbɨlʼe na übɨrɨtdaɣ.
Ataman tʼärɨn: “Tan mekga tɨbɨtdɨlʼet.”
“No mannan ärau orse.
Täp tastɨ qwačɨt i mazɨm qwačɨt.”
“A man tekga qudugo mennɨǯan.
(Optə jennɨš i sɨnkowa prowoloka, täp tau kudɨgom as lakčeǯit).
Täp na tünnɨš üdomɨɣɨn.
Tan tʼärak: “Qozɨrčɨlaj.”
Tabnä tʼärak: “Qut turakɨn qalʼeǯɨn, udlamdə moɣunä saruku.”
A tan täbɨm turakɨn qwäzʼet, udlamdə moɣunä saːrʼet.
Täp tau qudugom as lakčeǯin.
Täp jeʒlʼi ass laqčɨt, a tan ponä čatǯak, mazɨm lakgolʼgə.
Man tütǯan, täbɨm i qwatčau.
Taze ilʼetǯaj.”
Ärat tüa.
Täp täbɨm apstɨt, tʼärɨn: “Qozɨrčɨlaj.”
Ärat tʼärɨn: “Man nunɨtʼipban, qotdugu nadə.”
“Nu dawaj, qozɨrčɨlaj ass qutdɨn.
Ato onän amdan i skušnan mekga jen.”
Nu i omdaɣə qozɨrčɨlʼe.
Qut turaqɨn qalʼeǯɨn, udlamdə sarelǯugu moɣunä.
Ärat turaqɨn qalɨn.
“Udlamdə nadə sarelǯugu, udomdə nadə sarugu moɣunä.
A jeʒlʼe man qalɨnän turaqɨn, tan bə mekga udlau zarelǯɨnäl.
A täper man tʼekga udomdə saretǯau.”
Ärat tʼärɨn: “Sarät”.
Täp saːrät.
Ärat kak turugulǯɨt, qudɨgola wes laqčelattə.
No i qotdɨgu quʒannaɣɨ.
Qarʼemɨɣɨn wazɨn.
Näjɣum wes potqɨnɨt, wadʼilam qajlam, äramdə apstɨt.
Ärat madʼot qwannɨn.
Näjɣum ponä sapɨsin i na qaːrolʼdʼä: “Tʼükkɨ!
Ärau qwanba!”
Ataman na tütda.
“No qaj, qozɨrčezalʼe?”
“Qozɨrčezaj.
Man tʼekga tʼärɨzan, täp orse jen, na qudɨgolam wes lakčelǯɨt.
“A tamdʼel man tʼekga meǯau optɨ qudɨgo mennɨǯan.
Üdəmɨɣɨn na tünnɨš, aj tʼärak: Qozɨrčɨlaj.
Qut turakɨn qalʼeǯɨn, udlamdə moɣunä saːruku.”
Näjɣum täbɨm apstɨpbaːt, arakazʼe ärčibat.
Araqɨla üttɨdɨ.
Täbeɣum qwannɨn.
Ärat tüa.
Surumlam koːcʼen qwatpat i pekqɨ qwatpadɨt.
Täp täbɨm apstɨt.
Tʼärɨn: “Qozɨrčɨlaj.”
Ärat tʼärɨn: “Man nuːnɨdʼipbaːn.”
Pajat tʼärɨn: “Qozɨrčɨlaj tʼem ugoworom, qudə qut turakɨn qalʼeǯɨn, udɨmdə moɣunä saːrugu.
Ješlʼi man qalan duraqɨn, man udou saːraq (sareǯal).”
Täbɨstaɣə omdaɣə qozɨrčilʼe.
Ärat turaqɨn qalɨn.
“Nu, täper udomdə saːreǯau.”
Täp saːrɨt udɨmdə.
Täp kak turgulǯɨtda, qudɨgo laqčɨdin.
Quʒannaɣə qotduɣɨ.
Qarʼemɨɣɨn wazaɣə.
Näjɣum äramdə apstɨt.
Ärat aurnɨn i madʼot na qwatda.
Näiɣum ponä čaːǯɨn i na qaːronʼen: “Tükkɨ!
Ärau qwanba!”
Razbojnik tüwa.
Näiɣum tʼärɨn: “Qudɨgolam ärau wes lakčelǯɨt.
Täp orse jen.”
“A man tamdʼel tekga meǯau kudɨgo optɨ i sɨnkowaja prowoloka okkɨrmɨt tamkɨlba.”
Üːdɨmɨɣɨn na tünnɨš, tan aj tʼärak: Qozɨrčuɣu, qozɨrčilaj.
Qut turakɨn kalʼeǯɨn, to udɨmdə moɣunä saːrugu.
Ära tüa.
Täp täbɨm apstɨt, tʼärɨn: “Qozɨrčɨlaj.”
Ärat tʼärɨn: “Man nunɨdʼzʼipan, nadə qotdɨɣu.”
“No qozɨrčɨlaj, qozɨrčɨlaj.
Xotʼ okkɨrɨn qut turakɨn kalʼeǯɨn, udɨmdə moɣunä saaruku.
Jeʒlʼi man kalʼeǯan, man udou saːrʼet moɣunä.”
I oːmdaɣə qozɨrčɨlʼe.
Äramdə turagɨwlʼe qwɛdʼit, udɨmdə moɣunä saːrɨt.
Täp kak turgulǯɨtda, qudəkolam jass laqčɨt.
Pajätdänä tʼärɨn: “Tʼiket udou.”
Pajät tʼärɨn: “Lakčet.”
Täp aj turgulǯɨn, jass lakčɨt.
Tʼärɨn: “Tʼiket.”
“Ass tʼikeǯau.”
Ponä sappɨselʼe qwannɨn i na lakgolʼdʼä: “Tükkɨ!”
I na razbojnik na tütda.
Tʼärɨn:“ “Ärau qudogom ass lakčɨt.
Serlʼe qwallaj.”
I mattə sernaɣə.
Razbojnik tʼärɨn: “Qardʼen qarʼemɨɣɨn qwatčaj.
Tulǯät wʼädran tʼiːr saːq.
Täbɨm saːɣɨn parotdə puləsejlatdɨze (saːɣot) omdɨlǯeǯaj.
Qarʼeməttə aːmdə.
Qarʼemɨɣɨn qwatčaj.”
Näjɣum watdoɣɨt tülʼe na söːzɨtdət.
“Tan tʼärɨkuzat što man orse jewan.
A qajno qudɨgom ass laqčeǯal?
Tapär qarʼemɨɣɨn tastɨ qwatčaj.”
Näjɣum quronnɨn, saːq tulǯɨtdɨt wädran tiːr i salǯɨbot qamǯɨt.
I täbɨm puluzein omdɨlǯɨt.
Tʼärɨn:“ “Aːmdaq qarʼemɨtdə!
Qarʼemɨɣɨn tastɨ qwatčaj.”
Omdaɣə aurlʼe razbojnikse arakaj ärlʼe jübɨraq.
Näjɣum tüuwa, äratdə kötdə äramdə watdoot na sözɨtdət.
“Qarʼemɨɣɨn me tastɨ qwatčaj.”
Otdə na qwatda razbojnikɨm kaːwalgut, niːdellʼe taːdɨrɨt.
I qotduɣu quʒannax i na qotdolǯaɣɨ.
(Ärat) täp wazɨn innä, paldʼukun.
A kɨːban nägat iːɣat täbɨstaːɣə qotdɨzaɣə palatin paroɣɨn.
Nägat küzɨgu ilʼlʼe tʼütʼöun.
Täp nägatdanä tʼärɨn: “Man udlau tʼikɨlʼel.”
A nägat tʼärɨn: “Tan tʼärukuzat što orse jewan.
Lakčelǯet qudɨgom.”
Palatin barot čaǯɨn i qotda.
Iːgat palatiɣəndo ilʼlʼe tʼütʼöun küzɨgu.
Täp iːgatdänä tʼärɨn: “Man udou tʼiːkelʼel.”
Täp tüwa äzɨtdänä i tʼikəlʼe jübərat.
Jass tʼikɨt.
“Mekga jass tʼikɨɣuː.”
Ästɨ tʼärɨn: “Patpʼilka datkə.”
Täp tannɨt i kudɨgolam sɨlʼelʼlʼe na übərətdɨt.
Sɨlɨt, qudəgola warsɨwannat.
Täp iːgatdänä tʼarɨn: “Qwalʼlʼe qotdaq.
Qarʼemɨɣɨn iːgə larɨpbaːk.
Me tazʼe onäj ilʼetǯaj.”
Nom tʼelɨmlʼe jübɨrɨn.
Täp kudɨgolam udoɣətdə pennɨt (kak budto saːrɨpbaːt) i omdɨn puluzein parot.
Pajät wazɨn, tülʼe watdoɨn söːzɨt.
Razbojnignä tʼärɨn: “Nu qwallaj.”
A razbojnik tʼärɨn: “Aurlʼe qwallajze.”
Tep wadʼilam müzurɣɨnnät.
Aurnaɣə.
“Nu täpär qwallaj.
Maːtqɨn qwatčaj alʼi ponän?”
Razbojnik tʼärɨn: “Ponän qwatčaj.
Nu wazak, čaːʒɨk ponä.
Tastɨ qwatčaj.
Qaj kudɨgolam jass lakčelǯal.
Tan tʼärukuzattə, orse jewan.”
Näuɣum kak watdoutdə sözɨtdɨt.
Täp kak innä wazʼezitda, kak razbojnikam qättɨdɨt.
Razbojnik qotä čäčädʼzʼen (čäčädin).
I qwannɨt.
A pajät sojoɣotdə ɨdədʼen.
Tʼärɨn:“ “Man nɨlʼdʼin ass meːqweǯau.
Toblamdə müzulǯukeǯau.
Na ödɨm ütkeǯau.”
Erat kak qäːtäǯɨt.
I qwannɨt.
Qɨbanʼaʒala türlʼe übərat.
Nägamdə kak qätɨtdɨt i qwannɨt.
I iːgatdänä tʼärɨn: “Me taze ilʼetǯaj.
Igə türak.”
Qwannɨn tʼüj baɣattɨlʼe.
Tüj qɨlɨm paqkɨnɨt.
Täblam natʼet qäːlɣɨnɨt (qännɨt) i tʼüze taɣɨnɨt.
Saoznikamdə qarʼe ükkulʼe qwatdɨt.
Tädomɨlamdə wes tuɣunnɨt.
Iːgatdɨze omdaɣə i na qwatdaːq.
Tʼülʼe meːdaɣə otdə jedoɣotdə.
Qulat aːtdalbat.
“A pajal kuttʼen jen?”
“Pajau qupba.”
Wes tugunattə tädomɨm.
Täp pirʼäɣɨtdə maːt tautdɨt.
I nädɨn i warkɨlʼe na übɨrɨtda.
Man potdɨbon tebnan jezan.
Datau sodʼigan warkaː.
Pajat sodʼiga, mazɨm čajlaze zɨm ärčɨs.
Mekga tʼärɨn: “Mäguntu paldʼikoq.”
Man teblanä qɨdan uduruqwan.
Tabon jedot qwaǯan.
Teblanä aj serkeǯan.