This visualization was generated on 15.11.2021 with Corpus Services.

SEV Okkɨr ara elzə pajandɨsä.
Tabɨnnan eːza nagur neːt okkɨr iːd.
No kušak tabla warkɨzak, pajat quːmba.
Arat qaːlɨmba nagur nänsä okɨr iːd (okɨr iːnsä).
Tabla surup warkuzat, nʼüǯop padʼälʼišpɨzat surula par awralǯigu.
Kušak tabla warkɨzak.
Azɨt tʼiːǯikus: “Mat kuːnǯak, tiː kunäj aza qwalɨt i kodnaj igɨ üduqwat.”
Kuʒat az kuːmba, našaqɨt azɨp tambat, onǯit warkugu qwatɨmbat.
Okɨrbar ark pajaga tömba matkönt.
Kanak muda, aza üdoqwat maːt.
Warg nʼenʼät ɨǯalgwa tʼemnʼagant: “Qwalʼebeː kanap oralbet.
Pajaga maːt šeːrčʼa.”
No tʼemnʼat qwanba, kanam oralbat.
Pajaga maːt šeːrba.
Nu ɨǯalgwa tabɨlan: “Qaj nadäla tigant skušnan eja?
Mat tinan šaqänǯap.”
Wargə nʼenʼät əǯalgwa: “Šaklʼent.”
Kuʒat aurbat tabla, i qondugu kuʒalbat.
Šid nʼenʼät aubelʼekat qondat, i pajaga naj natʼän.
A warg nʼenʼat i kɨba tʼemnʼa tau belʼekagan qondat.
Warg nʼenʼat öndədʼet: pajaga qaip tawešpat.
Warg nʼenʼät pajagant sogondʼzʼet: “Qajp awešpal?”
Pajaga əǯalgwa: “Talʼdʼelʼi lɨlap awešpap.”
Warg nʼenʼä taːrba: “Mananɨ nʼenʼalap awešpat.”
Warg nʼenʼa tʼemnʼap odogant iːmbat i matkogondɨ kuralbat.
Kuʒak tap čaːǯis, čaːǯis.
I tʼemnʼamt elʼe astəmbat.
Tʼemnʼa azɨmba sɨbɨndʼalʼlʼe.
No nʼenʼat čʼaːǯə i sɨbandʼa kuralʼišpa.
Kušak tap čʼaːǯis, čʼaːǯis.
Pajaga medrešpa.
Kɨgas oralgu tablat, nʼenʼät manǯisak kwäzɨp ilʼlʼe astɨmbat.
I azɨmba öt.
Pajaga au bilʼekagan azɨmba, a nʼenʼa tʼemnʼansä tau bilʼekagan qalɨmbat.
Kušak tap čʼaːǯis, čʼaːǯis tʼimnʼansä, wark qwatčʼont medɨmba.
Qajda qwatčʼ amda.
Wargə maːt nɨndə äza.
Šüdernak nömbas.
Amdɨs wark kɨba üčʼe (molodoj qup).
Tap parǯet maːt.
Tabla šeːrnat: nʼenʼat šeːrna i tʼimnʼät šeːrna.
Na malodoj qup soːgonʼdʼä: “Kutʼidelʼi čʼaːǯalt?
I sɨbɨndʼal tassä čʼaːǯa?”
No nalguj na (nadäk) ɨǯalgwa: “Mat kunɨšpɨzak pajagɨgɨndɨ.
Pajaga šit nʼenʼam ambat.
A miː kunɨmbaj.
Na sɨbɨnʼdʼa mananɨ tʼemnʼam.
Man ilʼlʼe astap, a tap sabɨndʼälʼlʼe azɨmba.
Nu mat čʼaːǯak i sabɨnʼdʼa kuralʼešpa.
No ku mat čʼaːǯak, onek azak tanɨwap, ku čʼaːǯak, kutʼan warkʼenǯak.”
Na täbälgup ɨʒalgwa: “Manan kodnaj tʼäŋgwa.
Dawaj massä warklaj.”
Tabɨla nadɨmbat i warklʼe qwatɨmbat.
Qaj onǯit awešpɨndat i nazaj sabɨnʼdʼap awralǯešpat.
Nu na täbɨlgup kutʼätta uːdʼas i qwanba kamandirowkant.
Qaj dʼel maːt tögu.
Pajat nʼäj mešpas, plʼinalam meːšpas, arap apstɨgu.
Kuʒat arat maːt töːwa (tömba), pajat tabɨm niːdešpas.
No aramd apstɨmbat i tʼimnʼämt naj apstɨmbat.
Patom tabɨla qondɨzat.
Kuʒat qondɨzat.
Tabɨla qarimɨɣɨn waʒat.
Nu aj aurgu meːmbat.
Tabɨla aurbat.
Arat aj kuda qwanba.
Tab aj wark šogor tʼädɨmbat.
Aj meʒrešpas apsɨp.
Aj belʼinalap meːšpas.
Šüdernak nömbas.
Nagur kaːʒa (kaːǯa) maːt šeːrnat.
Okɨr kaʒa ɨʒalgwa: “Mizaj qwallaj urgu.”
A tab ɨʒalgwa: “Aza qwanǯak.”
Kaːʒa ɨʒalgwa: “Aza qwannanǯ, sajlap täː paqɨlǯenǯap.”
No na nalgup kwanba urgu tablazä.
Tʼeper kaʒa tabɨn ɨʒalgwa: “Qaborgolap (qaborgop) teː ningʼešpet.
I ət padešplʼent.”
Tap qaborglap tä nʼenʼgat i ət panna.
Pelʼeka čʼanǯ ət patpa.
I üdam sawsem qwanba i natʼagɨndɨ aza čʼaːnǯa.
Tʼeper kaʒa nalgulʼlʼe azumba.
I tabɨt qaborglap šeːrbat, tabɨn maːt qwanba natʼedʼelʼe.
I sabɨnʼdʼa naj natʼedʼelʼe maːt qwanba.
Kuʒat arat maːt töːmba, no tap tabɨt aza qwädalǯimbat, aza niːdəmbat.
Tap tarbas, qaj azɨmba, pajam aza niːdat.
No nalgup taperʼ awralǯət.
Aramd awralǯit, a sabɨnʼdʼap aza awralǯikut.
Aragɨnt ɨǯalgwa: “Paup salʼet i sɨbɨnʼdʼap maʒlʼel.”
Ara ɨǯalgwat tabɨn: “Ta qaj meːšpɨndal?
Ɨʒalguzand, što tananɨ tʼimnʼal, a tʼeper maǯigu kɨgant.”
Arat paɨp salɨmbat, ponä čʼannɨmba sɨbɨnʼdʼap maːǯigu.
A tʼeperʼ sɨbɨnʼdʼa ɨǯalgwa kut taredak: “Mašip ɨk (ɨgə) maǯiket.
Mat qwalʼebeː padɨ nʼüǯap amǯap, swʼeʒij öt ödenǯap.”
Kuʒat tap nüǯim ambat, bʼelɨj swetsä prastitčʼemba i tömba üdəp ödogu.
I üdop ödombat i nʼenʼap parǯet: “Nʼenʼa čʼanǯiklʼent pelʼekat čʼanǯ, mat teːka qajlʼemɨp qadenǯap.
Mašip kɨgat maǯigu.”
No nʼenʼat tabɨn əǯalgwa tʼemnʼagant: “Taptʼel taštɨ azɨ maǯenǯat.”
I aj öt qwanba nʼenʼät.
Sabɨnʼdʼä maːt kuranna.
Tapdʼel ara aza qätɨmbat sabɨnʼdʼap, qwädʼimbat tijawdʼel čʼanǯ.
Taptʼeːl tʼeːlt mennɨmba.
Tabla aurlʼebe qondugu kuʒalbat.
Qart waʒɨmbat, aj aurnat.
Nalguj na täbälgunʼnʼij ɨʒalgwa: “Dawaj aram paup salʼel, sɨbɨnʼdʼap maǯlʼel.”
Tab paup saːlɨt, ponä čʼaːnǯa sabɨnʼdʼap maːǯigu.
Sabɨnʼdʼa aj kut taredɨk šarwanna: “Mašip igə maǯikʼet.
Mat qwalʼlʼebʼe padɨ nʼüǯip amǯap, belɨj swetsä prastʼitčʼenǯak i quralʼebe swetlaj üdəm ədänǯap.”
Tap natʼedʼelʼe meda öt, üdəp ədombat i nʼenʼäm parǯep: “Nʼenʼä čʼanǯiklʼent pelʼeka čʼanǯ.
Mat täka qajlemɨp qadenǯap.”
Nʼenʼa čʼanǯa.
Tʼemnʼat əǯalgwa: “Mašip maːǯigu kɨgat.”
Nʼenʼät əǯalgwa: “Kuralʼent maːt, qajlʼemɨ lɨprap tadlʼel meka tazip kajgu.”
No tʼimnʼat kuranna.
Maːt šeːrna tʼimʼnʼat, madɨl čʼanǯ kurna, parkwa, lɨprap teweːgant iːmbat i kuranna natʼedelʼe nʼenʼagant.
Natʼedelʼe tömba, öt medɨmba, nʼenʼam parǯit: “Nʼenʼa čʼanǯilʼent.
Mat tömbak, lɨprap tadap.”
Nʼenʼä čʼanǯa ətqandɨ.
Tazip qait lɨprantsä i tʼimnʼantsä qwannat kutʼidelʼe saj adua.
Čʼaːǯizat, čʼaːǯizat tabɨla, medɨmbat natʼidʼelʼe.
Okɨr kɨba maːt (izbuška) natʼän äːza.
Na matkɨn mugala natʼan äzat, nʼajla membi natʼan äzat, qula tʼäŋguzat.
Qotta warkɨs i kuda sawsem qwanba (qwanbat), maːdap qwädimbat.
Nʼenʼa i tʼemnʼa nɨnt warkat.
Okɨrbar nʼenʼät əǯalgwa tʼemnʼagɨnt: “Tan nɨnt qaːlklʼent, a mat qwanǯak, patom teka tönǯak.”
Nʼenʼa ponä čʼanǯa, mɨgap ilʼlʼe astɨp čwäčont i šündʼekalʼlʼe azɨmba.
Wašemblʼe qwanba natʼidelʼe kutʼan arat warka.
Na maːtqənt medɨmba i šüdʼernant maːt šeːrba.
A šündʼeka nilʼdʼi äːza (eppa), tabɨnan tü taredak tarɨt porɨmbas.
Arat əǯalgwa pajagɨnt: “Manɨmbet, qanduj šundʼeːka maːt šeːrba.
Tü daredak porumba tabɨnnan tarɨt.”
Pajat tʼeper qolʼdʼit šündʼekap i skoworodniksä ponä ganʼimba.
Šündʼeka wašemblʼe ponä qwanba i šüdernan (akoškan) ilont omda, natʼan elʼlʼegan kurna.
Arat mannɨmbas šüdernant.
Akoškan ɨlont meːdɨmba šündeka, aːk tidəmbat.
Arat nagurbar akɨnt swedimbat šündekant.
Šündʼeka wašembelʼe qwanba.
Arat amdɨs, amdɨs, ponnä mannɨmbɨs, kɨgɨs ešo na šündʼekap qonǯurgu.
I bolʼše tab aza tökos.
Nʼenʼat natʼedʼelʼe tömba tʼimnʼagant, i aj kut taredɨk azɨmba.
Wot warkat tʼimnʼanse nʼenʼa.
Nʼenʼantnan nanǯet orwešpa.
Kušat warkɨzat.
Wremʼat medɨmba, nagur iːmt qombat.
Na iːlat tʼeːk orwešpazat, ilat tʼek orwešpat.
Orumbat wargɨčʼkalagi iːla.
Okɨr iːt ɨǯalgwa: “Mat menǯap karabelʼ.”
Šidəmǯelʼi iːd əǯalgwa: “Mat skripkap menǯap.”
A nagurumǯelʼi iːt əǯalgwa: “Mat lärinǯap.”
Aut əǯalgwa: “Qait ti meːnǯalɨt, qaimna aza meːnǯalɨt.”
No iːlat meːšpɨzat.
Okɨr karabəlʼ membat.
Okɨr skripkap membap.
Okɨr lära, kotʼik lär tanundät.
Okɨr iːd iǯalgwa awegant: “Dawaj qwallaj natʼidelʼi kutʼan menanɨ azɨm warka.”
Wes omdat korabilʼ šündʼegɨnt i ilʼdʼa sabɨnʼdʼä natʼidelʼe omdɨlǯat.
Wot tabla čʼaːǯat.
Okɨr iːt skripkam moːnɨt.
Okɨr iːd lärä.
A kuʒat tabla medešpɨzat, kutʼat azɨt warka qwatčʼogɨt, tabla wes lärlʼe qwatalǯat.
Meːdɨmbat tabla kutʼat azɨntnant mat eja.
Tʼeper arat ɨǯalgwa awna pajagant: “Tona mannɨmblʼel pajam qajla töndat i lärat swak.”
Tap (pajat) šüdernant meːdɨmba, manǯedʼa natʼidelʼe i aragant əǯalgwa: “Ɨg mannɨmbet.
Tä qwalʼlʼent šudʼernaqɨndɨ.
Qaj mannɨmbal?”
Nu i arat ponä čʼaːnǯa i natʼedelʼe qwanba karent.
Natʼedʼelʼe meda i soːgonʼdʼa tablan: “Kutʼagɨndɨ ti tömbalɨt nilʼdʼi swa qula?”
A tabla ɨǯalgwat što mi tenanɨ iːlal.
Azɨt aza werumbat što tabɨn ilat.
A okɨr iːd ɨǯalgwa: “Šečʼas manan awem čʼanänǯa.
Ilʼdʼa sabɨnʼdʼa čʼanänǯa.”
No nɨnd arat kolʼdit što tabɨt paja i tabɨt tʼimnʼa sabɨnʼdʼa.
Medlʼebe pajap niːdešpas i iːlamt naj niːdet.
I ilat naj niːdembat.
Nu natʼidelʼi maːt qwanbat.
Arat awna pajap qwatpat i tʼädɨmbat tünt.
A na pajantsä warklʼe qwatalǯimbat.
I iːlat naj ʒä tablazä warkat.