This visualization was generated on 15.11.2021 with Corpus Services.

SEV Ara pajasɨgi warkɨmbagi.
Tablanan nagur neːt eːza.
Ara pajasɨgi qwälčʼukumbat, kɨbandlap mešpɨzat.
Okɨrbar ara pajasɨgi qwannat qɨbandɨp meːgu.
Natʼedeːlʼi medat qwatalǯat kɨbandɨp meːšplʼe.
Wot meːšpɨzat tabla.
A nagɨr neːt maːtqɨt uːdʼezat.
Okɨr neːt sɨrlaze kwaza.
Šedemǯelʼe neːt apsɨp poːdäšpɨs.
Naːgurumǯelʼe neːt cʼalǯiboːp čʼobalʼišpɨs.
Nagurumǯelʼe neːt autko azɨtko qwanna maːt qwärgu aurgu.
Ara pajasɨk kwanäšpɨzat maːt.
Nu i neːt čʼaːǯɨs tablaza.
Tablanan okɨr paɨt äza maːtkɨt.
A na paɨt tabla onǯisä talǯikuzat.
Na paɨp natʼat qaːlɨmba, kutʼät kɨbant meːšpɨzat.
Neːd ɨʒalgwa azägand: “Azäm, paɨ natʼät qaːlɨmba.
Nʼäj maǯigu matqɨt paɨ tʼäŋgwa.”
Nu ara ɨʒalgwa: köšklʼent tadlʼel.
Neːt paːralba kwesse.
Natʼidelʼe medɨmba, kutʼat kɨband eppa.
Tap kɨgɨs paɨm iːgu.
I okɨr täbälgup meːdɨmba.
Tabɨp orannat i maːt qwannɨmbat.
Maːt natʼidʼelʼe taːdɨmbat i natʼät tabɨn ɨǯalgwa: “Manan kodnaj tʼäŋgwa.
Ta massä warkenanǯ.
Apsɨp poːdešpenǯal, mašip awralǯešpinǯal.
A onenǯ porglap södäšpenǯal, newat porgla.
Kušak söːtčʼal, wes azägant, awegant kwanenǯaj.”
No tab qart waʒes, apsɨp poːsa, awralǯit aramt.
Arat kɨgɨs kwangu madʼönt.
Madɨrsa tabɨnan salǯindɨ mɨp pedʼap salgu.
Tab meːzɨt aragɨnt.
Arat salɨt peːdʼap.
Kwesse tabɨn membat salǯɨndɨ nap i ɨǯalgwa: “Nap palʼel i ɨg awešplʼel.
Ješlʼe amǯal, to taštɨp kwatčʼap.”
Arat kwanba madʼönt.
A tab na salǯɨndɨ naːp iːmbat i nʼugolbat.
Tab nʼüːjek.
Pajat (tab) wes ambat.
Tab madʼogɨndɨ tömba.
Tabelap kotʼik kwatpat.
Pajat apsɨp potpat, aramdə awralǯɨt.
Qondugu kuʒalbat.
Qart waʒat.
Pajat aj poːdɨšpɨs, pötpi öt perčʼagɨlǯispɨs, aramdə awralǯit.
Onǯə naj aurna.
Arat aj kɨgɨs qwangu madʼont.
Ɨǯalgwa pajagɨnt: “Salǯɨndɨnap meka meːlʼel pedep salgu.”
Pajat kɨgɨs tabɨn meːgu, a natʼät tʼäŋgus.
Arat ɨʒalgwa: “Ta ambal?”
A tab ɨǯalgwa: “Aza ambat.”
Arat ɨǯalgwa: “Ku kadenǯda?”
Pedʼem iːmbat, olɨp tabɨn qätɨt.
Pajap qätlʼe qwannɨt.
Maːt paront tʼäǯimbat.
Onǯ kwanba madʼont.
Nu a natʼät araga pajasɨgi aj tömbat kɨbandɨp meːšpugu.
Kušat tabla meːšpɨzat, tabla tʼürɨmbat.
Tablanan neːt öːromba.
No i šedemǯelʼi neːt tömba maːt kwärgu aurgu.
Ara pajassɨk maːt kwanešpat aurgu.
Neːt tablazä čʼaːǯa.
Neːd ɨǯalgwa: “Maːtqɨt paɨ tʼäŋgwa nʼäip maǯegu.”
A paɨ natʼät eppos kutʼät kɨbandɨ.
Neːt ɨǯalgwa: “Mat köškwinǯak paɨtko.”
Azɨt ɨǯalgwa: “Köːšklʼent.”
Neːt natʼidelʼi meːdɨmba.
Natʼät täbälgup orannɨt tabɨp i maːt kwannɨmbat.
Maːt tadɨmbat i tabɨn ɨǯalgwa: “Manan kodnaj tʼäŋgwa.”
Ta massä warkʼenanǯ, meːka poːdešpenǯal, apstešpenǯal.”
Tab apsɨp ponnɨt.
Pajat awralǯɨt aramd.
Arat kɨga madʼont kwangu.
Tabɨn ɨǯalgwa: “Meːka melʼel salǯɨndɨ nap pedʼep salgu.”
Tap tadɨmbat salǯɨndɨ naːp.
Pedʼep salɨmbap arat.
Pajagɨn kwesse membat i ɨǯalgwa: “To pallʼel, ɨg amget naːp.”
Arat kwanba madʼont tabetčʼigu.
A pajat apsɨp poːdɨšpɨs, konnäporgɨp södäšpɨs.
Arat maːt tömba.
Pajat aramt awralǯit.
Onenǯ naj aurna.
Tabla kondugu koǯalbat.
Qart waʒat.
Pajat aj kodowamǯit aurgu.
Tabla aurbat.
Arat ɨǯalgwa: “Meːka salǯindɨ naːp tadlʼel.”
Pajat kɨgɨs tabɨn meːgu, a natʼät tʼäŋgus.
Arat ɨǯalgwa: “Ta ambal.”
Tab ɨǯalgwa: “Azza.”
Arat pidʼim iːmbat, petse olɨp qätɨt, tabɨp qätlʼe qwannɨt.
Maːt paːront tʼäǯimbat.
Natʼät šid nʼenʼä eppa.
Na täbelgup madʼont kwanba tabetčʼagu.
Ara pajassɨgi kɨbandɨp meːšpɨzat.
Tʼürkuzat što šɨd neːt tʼäŋgwa, öːromba.
Kušat tabla mešpɨzat kɨbandap.
Nagurumǯelʼe neːt tömba tablatko maːt kwärgu aurgu.
Azɨt aut maːt čʼaǯizat aurgu.
Neːt naj čʼaːǯis.
Neːt azägɨnt ɨǯalgwa: “Azäm paɨp kwedʼimbaut.
Matqɨt nʼäip maǯugu paɨ tʼäŋgwa.”
Azɨt ɨǯalgwa neːgant: “Kwesse paːrolglʼent paɨm iːlʼel.”
Neːt natʼidʼelʼe meːdɨmba kutʼät kɨband eppa.
Tabɨ kɨgɨs paɨm iːgu.
Natʼät täbälgup tabɨp orannɨt i maːt kwannɨmbat.
Natʼidʼelʼi maːt tadɨmbat i tabɨn ɨǯalgwa: “Ta massä warkenanǯ.
Manan kodnaj tʼäŋgwa.
Meːka aurgu poːdešpenǯal, mašep apstešpenǯal.
Onänǯ konäporglap södäšpenǯal.”
Aramt apstɨt.
Onǯe naj aurna.
I qondugu koːǯalbat.
Karimɨgɨn waʒat.
Tabɨ aurgu ponnɨt, aramd awralǯit.
Onek naj aurna.
Arat tabɨn ɨǯalgwa: “Meːka tadlʼel salǯɨndɨ naːp pedʼep salgu.”
Tap pedʼep salɨmbat.
Arat salǯɨndɨ naːp pajagant meːmbat, ɨǯalgwa pajagant: “Täː pallʼel, ɨg amget.
Tan amǯel, mat taštɨp qätlʼe kwatčʼap.”
Arat qwanba madʼont.
Pajat metlʼebeː salǯɨndɨ naːp nʼugonnɨt.
Tab nʼüːjek.
Pajat aza ambat.
Tap tarba: “Nʼenʼalat ambat, tablap arat qätlʼe kwatpat.”
Nʼenʼat kwatalǯimba tabɨlap peːgu.
Maːt paːront sɨːgəlba, nʼenʼalap kolʼdʼit.
Natʼät eːppat.
Tap tʼüromba natʼän.
Elle tümba, ponä čʼannɨmba, kərnicʼont paːront omnɨmba, tʼurəp kwattɨt.
Nɨnd pajaga čʼaːǯɨs.
Soːgonʼdʼä tabɨp: “Kajko tʼürant?”
Na nalgup ɨǯalgwa: “Manan nʼenʼalam kumblʼe eːppat.”
Pajaga ɨǯalgwa: “Ɨk tʼürɨk.
Ponä čʼannäp čʼoːčʼlʼel, munglaj nʼaj natʼidʼelʼe kamǯlʼel.
Teːka tönǯat nagur šündʼeka.
Ta tabɨlap maːderlʼent, tabla teːka tadenǯat elandi öt i kumbi öt.”
Pajaga kwanba.
Na nalgup čʼannäp čʼočʼembat ponä, natʼidʼelʼe munglaj nʼaip kamnɨmba.
Töwat nagur šündeka.
Tab okɨrɨm orannɨt.
Okɨr šündeka ɨǯalgwa kut taredɨk: “Ta mašep elmadɨp üːdlʼel.”
A na nalgup ɨǯalgwa: “Meːka tadlʼel elandi öt i kumbi öt.
Našakɨt tananɨ elʼmadɨm üːdenǯap.”
Šündʼeka kwanba i taːdɨmbat elendi üdəp i kumbi öt (üdop).
Na nalgup šündekam üːdumbat.
Na nalgup maːt paːront čʼannɨmba.
Kumbij ötsä pudolbat i elɨndi ötsä pudolbat.
Nʼenʼalɨt kɨlʼdembat.
Tab nʼenʼalɨp awralǯit i udʼimbat.
Tülʼgont omdalǯit i tablan ɨǯalgwa: “Ɨk šarwatpat.
Ato aram tönǯa, tiːʒemt kwatčʼa.”
Tabla natʼan amdat tülʼgoɣɨnt.
Arat maːt töːwa.
Pajat tabɨp apstɨt.
I qondugu koǯalbat.
Karimɨgɨn waʒat, aurnat.
Arat ɨǯalgwa pajagɨnt: “Tiːgent natʼidelʼi azägɨnt awegɨnt kwanǯaj.
Na tülgop kwanenǯaj azägant.”
Kuʒat tabla kwanešpɨzat, tülʼgop taːdɨrsat.
Arad ɨʒalgwa pajagɨnt: “Qajkodə tülʼgoː satčʼim eːja?”
A pajad ɨǯalgwa: “Natʼidʼelʼi kotʼek panba porgɨla.”
Kušak tabla čʼaːǯɨzak, našakɨt šɨd nʼenʼat lakwatčʼukumbat.
Na nʼenʼät tülgop qatälgus kolʼgalɨk, štobɨ tabla kolʼgalǯnet.
Kušak tabla čʼaːǯizat, i maːt meːdɨmbat azägɨnt.
Tülʼgop čʼočʼembat kwašündʼegan.
Onǯit maːt šeːrna, torowatčʼat azänsä aunsä.
Azɨt i aut aːndɨlbat, što tabla tömbat.
Aut apstešplʼe kwatalǯit.
I üːde erlʼe qwatalǯa.
Kuʒat üdɨm öːdumbat, wargə neːt ɨǯalgwa azägɨnt, awegɨnt: “Ti kɨgalɨt nälamt mannɨmbugu?”
Aut i azɨt ɨǯalgwat: “Kutʼat tabla eːjat?”
Neːd ɨǯalgwa: “Kwaːšünenǯ čʼanǯəlaj.”
Tabla čʼaːnǯat kwašunʼenǯ.
Neːt tülʼgop nöwot.
Šɨd nʼenʼat čʼanǯat natʼägɨndɨ.
Aut i azɨt aːndalbat, tablap niːdešpɨzat.
Maːt šeːrnat.
Na täbälgup tarba: “Nala kutʼägandɨ tömbat?”
Pajad ɨǯalgwa: “Ta onenǯ taːdersal tabɨlap.
Tabla tülʼgogan amdɨzat.”
Nɨnt patalǯimbat üdə ärgu.
Kušak äːrɨmbat.
Nʼenʼät aranse maːt kwanbat.
A na nälat aunse, azɨnsä kaːlɨmbat warkugu.