|
|
TFF |
Amdeqo Iːpo.
|
|
|
|
Eːlɨkwaːt warqɨkwaːt okkɨr qwatčʼoqɨn aːmdeqo.
|
|
|
|
Aːmdeqonan eːkwa naːgur iːt.
|
|
|
|
Warɨq iː nept eːkwa Andrej, na tʼonǯoj iːnt nept Waːska, a kɨbɨ iːmt nept Iːpo.
|
|
|
|
Okkɨr pen tablan čʼopri (čʼwečʼont) čʼwetčʼoɣon kutta wadɛšpat (čʼoprɨm).
|
|
|
|
Šədəmǯeːlʼi pen äztɨn (äzɨt) üːdɨt na tʼonǯoj iːmt Wasska.
|
|
|
|
Wasska pel dʼomp aːmdɨs, aːmdɨs, qondalgu kɨgella i qondann qarot čʼan.
|
|
|
|
Qaːrimɨn töːwa maːtqɨnt, äzäqɨnt kadäšpat.
|
|
|
|
“Mat tap pin qondalbaŋ qaːrot čʼan i kutɨmnäj aza qonǯirsaw.”
|
|
|
|
Naːgurumǯeːlʼi pen äzɨt üːtɨt Iːpom, kəba iːmt.
|
|
|
|
Iːpo äzäɣɨnt əːǯalgwa: “Tan adʼam meːkka čʼannent (qaːmǯilel) (qaːmǯet) čʼannet tiːri čʼopɨrɨm, üːdi kalam i wandmuːtʼ iːnǯaw i qwanǯaŋ pelʼ dʼoːmp aːmdegu aːmnenǯaŋ.”
|
|
|
|
Na pen Iːbo qwanna čʼopri čʼwetčʼoqont, pelʼ dʼomp aːmdɨs petʼ tʼonǯon qondalgu kɨgella.
|
|
|
|
Kuʒan qondalgu kɨgella, wandɨmt sajemt össe möːlǯit, wandmuːtʼtʼizä wandɨmt natqɨnnɨt i aza qondalǯešša.
|
|
|
|
Kušaŋ aːmdɨs, aːmdɨs, qajɣɨndoto töːwa waššelʼe (kutʼtʼeɣandodo töːwa) (wašembədi suːrum) tüːj wašembi suːrum.
|
|
|
|
Omda, kurna čʼopɨrlaqɨn, čʼoporlam aːwešpɨt i awešpɨt.
|
|
|
|
Iːpo kwenǯannɨt, tolʼko bɨ oralgu, malʼenʼko aza orannɨt.
|
|
|
|
Orannɨt, okkɨr nʼäːbɨt tarɨt udoɣɨnt qala.
|
|
|
|
Tüːj wašembedi suːrum wašedʼelä qwann.
|
|
|
|
Na nʼäːbɨt tar tüː dər porombɨdi.
|
|
|
|
A nʼäːbɨt tarɨm matqɨnt äzäqɨnt tattɨt.
|
|
|
|
Äzäɣɨnt aːdelǯit, äzät əːǯalgwa: “Ot tau tʼeːllan üːdenǯaw šət warq iːlam tau wašembi suːrum peːku.”
|
|
|
|
Äzi ärat warq šət iːmt qwäːrɨt onǯ piːrʼaɣɨnt, i čʼeːnčʼa tabɨštjanä.
|
|
|
|
“Tau tʼeːllan Wasska i Andrej qwanǯalʼi wašembi suːrum peːku.
|
|
|
|
Šət kündəm oralli, qajduj nadə tiːɣandi künd, nildʼi kündəm i orannalʼlʼi.
|
|
|
|
I tiːmblʼe qwanǯalʼe peːgu.
|
|
|
|
Kuti qaːdarqɨn qonǯalʼi wašembi na suːrum tatčʼaːlʼi, pelʼekkaj oneŋ aːmdeqoj čʼwetčʼim menǯaw tiːɣəndi.”
|
|
|
|
Andrej (Griškan opti) Wasskan opti (kündəm) kündət tʼäːr orannaːqij, (kündɨp) kündlamdi tiːwaqij i qwannaːq.
|
|
|
|
Kutʼet saitɨ mannɨmba i natʼidɛlʼe i čʼaːǯaq.
|
|
|
|
Kušak čʼaːǯisaq kundɨŋ alʼi qaukaŋ, medaqij säːq aj säːq (säːq säːqaj) poːlzant.
|
|
|
|
Poːlzaqqɨn na madʼoɣɨn čʼaːǯisaːq, čʼaːǯisaːq, medaqɨj wattont, warq wattont.
|
|
|
|
Warq wattoɣɨn čʼaːǯisaːq, čʼaːǯisaːq kundɨŋ ilʼi qaukaŋ, medaqɨj naːgur tʼäːraj wattont.
|
|
|
|
Nagur tʼäːraj wattoɣon aːmda pöːj salǯ.
|
|
|
|
Na pöːj salǯoqɨn naːgɨrba, kut qwanǯa kwɛtʼtʼi plʼekkaj wattont na wattoɣon kündɨt i onǯ (quːnǯa) quːnnanǯ.
|
|
|
|
A na tʼonǯoj wattont qwannanǯ, kündɛl elenǯa a onenǯ qunnanǯ.
|
|
|
|
A taːd plʼekkaj wattont qwannanǯ, kündɛl quːnǯa, a onenǯ elɨlä qalennanǯ.
|
|
|
|
Na šət tʼemnʼäsaqɨj qwannaqɨj taːd plʼekkaj wattont.
|
|
|
|
(Qwannaqɨj tabɨštjaq töːwaq naːgur tʼarɨj wattont).
|
|
|
|
Miː eːlenǯaj, oni eːlenǯaj i küdlawi naj elenǯaːqi.
|
|
|
|
Kundɨŋ ilʼi qaukkaŋ qwajazaːq, naːgur pot mʼanda.
|
|
|
|
Na naːgur poːqont Iːpo orɨmna warq quːulʼe (warq qut piːr orumna).
|
|
|
|
Äːzɨtnä čʼeːnčʼa: “Aːdʼa, mat qwallaŋ warq tʼemnʼalap peːgu, peːgu qwanǯaŋ.”
|
|
|
|
Äzat əːǯalgwa: “Nu i qataumba qwaːllent.”
|
|
|
|
Iːpo aːndanna, kwajant šeːrna, sowa tʼeːq kündəm orannɨt, koppijamt iːwat, apsodʼimɨm, tiːwat kündɨm, (üːbɨdɨlʼe qwann) i üːbɨdʼa.
|
|
|
|
Čʼaːǯa kutʼet sait mannɨmba.
|
|
|
|
Čʼaːǯis, čʼaːǯis, kundɨŋ alʼi qaukkaŋ, meda säːqə poːlzant, säːqə poːlzant madʼont.
|
|
|
|
Madʼoɣont čʼaːǯis, čʼaːǯis, meda warq wattont.
|
|
|
|
Kundɨŋ alʼi qaukkaŋ warq wattoɣon čʼaːǯisa, meda naʒa wattont, naːgur tʼäːraj wattont meda.
|
|
|
|
Na naːgur tʼäːraj wattoqon aːmda pöːj salǯ.
|
|
|
|
Pöːj salǯoɣɨn nagɨrba kod qwanǯa taːdə plʼej wattont, kündɨt eːlenǯaj i onǯ eːlenǯa.
|
|
|
|
Tʼonǯoj wattont qwannǯa, kündət quːnǯa, onǯ qoʒait eːlɨlä qalenǯa.
|
|
|
|
A (taːt plʼekaj) kwetʼtʼi plʼekkaj wattont qwanǯa, kündət quːnǯa, onǯ eːlɨlä qalenǯa.
|
|
|
|
Iːpo i täːrba: “Mat kweːtʼtʼej plʼekkaj wattont qwanǯaŋ, kündem pusʼ quːnǯa, a man oneŋ eːlenǯaŋ.”
|
|
|
|
Qwanna kweːtʼtʼej plʼekkaj wattont.
|
|
|
|
Kušak čʼaːǯiss, čʼaːǯiss säːq poːlzaj madʼoɣon.
|
|
|
|
Seːm nuː šünʼdʼ aːda, kutʼtʼeɣondo čʼaːrra tʼumpnä (čʼoːra) čʼoːraʒaqqɨn čʼaːǯisaŋ.
|
|
|
|
Čʼaːra i kündɨm sojoont odannɨt (əpqännɨt).
|
|
|
|
I kündət kuːlä aːldʼa (kuːa).
|
|
|
|
Iːpo üːdə qwann.
|
|
|
|
Üːdə čʼaːǯis, čʼaːǯis, aj čʼaːra kutʼtʼaɣondo tʼumbunä Iːpon i quːlʼ dʼarä čʼeːnčʼa.
|
|
|
|
“Kuː čʼaːǯant Iːpo?”
|
|
|
|
“Mat čʼaːǯaŋ tüːj suːrum wašembi peːgu, äzäm ʒim üːda peːgu.
|
|
|
|
(Štop) qoːnǯaw, a aːmdeqoj čʼwetčʼit plʼekkam mekka menǯit.
|
|
|
|
Mat čʼaːǯisaŋ tau wattoɣɨn, kündew tʼumbnätä amnɨt, mat taper üːdə čʼaːǯaŋ.”
|
|
|
|
Tʼumbənä i əːǯalgwa quːlʼ dʼarä: “Mat paːroqeŋ omdlent, a sajomt kɨba qajpizä saːrlel.
|
|
|
|
I mat tašt qwannenǯa, kutʼtʼan wašembi suːrum eːja.”
|
|
|
|
Iːpo qɨba qajpim čʼatčʼit i saimt saːrɨt.
|
|
|
|
Tʼümbɨnät paːront tiːlä omda, tʼumbnä tabɨm taːdərɨt, tolʼi čʼwetčʼ paːroont taːdərɨn, tolʼi nu šündeunt taːdərɨt.
|
|
|
|
Kundɨŋ alʼi qaukkaŋ čʼaːǯisaq, medaqɨj telɨt uʒe üːdumba.
|
|
|
|
Tʼelɨt passa qoptəɣont, čʼwetčʼoɣont medɨmba.
|
|
|
|
Tʼeːlɨt i kundaːqɨn totʼtʼaqɨn tüːla porälɨmbaːtt.
|
|
|
|
Tʼumbɨnä i əǯelgwa “Totʼattʼo qwatčʼ, qwatčʼoɣon tüːla porälɨmbaːtt.
|
|
|
|
Kuʒan medeːnnanǯ, aːmdeqonnan eːnǯa, aːmdeqon maːdɨn qəːqən šüdernan iːloqɨn aːmnenǯa qaːdə.
|
|
|
|
Na qaːdəqɨn wašembi suːrum pedɛɣɨnt aːmnenǯa.
|
|
|
|
Tan Iːpo na wašembi suːrum pedəntse əg iːkwʼet.
|
|
|
|
Pedemtsä iːku kɨgellennanǯ, pedɛmt lagalǯenǯal (aːmdeqonnanto nʼaqqɨlǯemba kweːzi čʼeːlɨm na pedent) i tašt ənšelʼdʼenǯa aːmdeqo i tašt oralǯenǯatt).
|
|
|
|
Aːmdeqonan na pedeqonto nʼaqqɨlǯimba kweːzi čʼeːlɨm.
|
|
|
|
Aːmdeqo ənčeldʼenǯit i tašt oralǯendtaːtt i omdelǯendtaːtt.
|
|
|
|
Əg iːkwet pedensä.
|
|
|
|
Əg lagret pedemt.
|
|
|
|
Onǯ piːrəmt suːrum iːnǯal, a pedemt əg iːkwet”.
|
|
|
|
Iːpo qwanna, üːbədʼa qwatčʼont, čʼaːǯis, čʼaːǯis, qwatčʼont meda, aːmdeqon maːdɨt qəːnt meda.
|
|
|
|
Šüdernan ɨːloɣon aːmda qaːdə, qaːdət paːroɣon pedət adua, tüː dər porɨmba i wašembi suːrum pedɛɣɨnt aːmda.
|
|
|
|
Iːpo ennä čʼaːnǯa na qaːdət paːront, iːgu kɨgellat, na wašembi suːrum, a pedət našaŋa kweːditi.
|
|
|
|
Ajda mat iːlew pedentsä.
|
|
|
|
Pedemt tolʼko lagalǯit, aːmdeqo əːnšeldʼit maːtqɨnt.
|
|
|
|
Onǯ qulamt ütət, na quːlat aːmdeqon Iːpom orannaːtt, orannaːtt i peɣɨnt omdalǯaːtt katalašqant.
|
|
|
|
Iːpo qaːrot čʼan aːmda.
|
|
|
|
Qarimɨqɨn aːmdʼiqo onǯ pireqɨnt qwärɨt Iːpom.
|
|
|
|
Iːpo töːwa aːmdeqonä, aːmdeqo (soːɣondešpa) Iːponä, soːɣondʼa.
|
|
|
|
“Kutʼe qaːdargɨndo töːpi kəba orgoont i minani wašebi suːrum twälgu kɨgant?
|
|
|
|
Qajko twälgu kɨgal minani wašembi suːrum?”
|
|
|
|
A Iːpo i čʼeːnčʼa: “Mašim äzäw üːta.
|
|
|
|
Wašembi suːrum qonǯal mekka, aːmdeqoj čʼwetčʼit, plʼekkam mʼeːnǯit.”
|
|
|
|
Na aːmdʼiqo Iːponä i čʼeːnčʼa.
|
|
|
|
“Natʼej aːmdeqonnan eːja tüːj puːj šöːw, na šöːw mekka tatčʼal, a mat tekka pedentsä wašembi suːrum menǯaw.
|
|
|
|
Meːkkalä tatčʼal tüːj puːj šöːwɨm, na aːmdeqonan eːja tüːj puːj šöːw, nam (na šöːwɨm) twälänǯal, mekka tatčʼal, mat teːkkalä olɣa menǯaw wašembi suːrum.”
|
|
|
|
Iːpo qwann.
|
|
|
|
Aːmdeqonnando töːwa tʼumbnänä (töːšpa tümbənänä medäšpa) medešpa, töːšpa i meda.
|
|
|
|
Tʼumbɨnä soːɣondʼe: “Qaj oːlɣa čʼaːǯant šündʼəbɨŋ, tüː suːrum aza taːtal?”
|
|
|
|
Iːbo qadäšpa tʼumbnäna: “Mat kɨgɨzaŋ iːgu pedentsä, pedemt laɣalǯaw, aːmdʼeqo əːnšelʼdʼit, i maššim orannaːtt, i peqɨnt aːmdaŋ qarot čʼann.
|
|
|
|
Tepʼer mašim üːdəkwa kutʼenda eːja aːrɨk qaːdarɣɨn tüːj puːj šöːw.
|
|
|
|
Aːmdeqonnan na šöːwɨm mat twäːlenǯaw tabnä tatčʼaw tap mekka menǯit wašembi suːrum.”
|
|
|
|
Tümbanä əːǯalgwa: “Dawaj qajpizä saːret sajomt, meːkka tiːlä omdɨk, mat paːroqeŋ i mat tašt qwannenǯaŋ naː čʼwɛtčʼi qaːdərɨt aːmdeqonä, tabɨnnan eːja tüːj puːj šöːwɨt.
|
|
|
|
Na tüːj puːj šöːwɨm twäːlenǯal, onenǯ köːndɨsä (šöːwɨm olowɨnt) sojowont oralǯenǯal, orallel i köːndɨsa kuːdälblä (kuːdällä) meːkka tɨkkalä töːlent (tatčʼal).
|
|
|
|
Aːqqaːlemt əg iːkwet.
|
|
|
|
Aːqqalemt iːnǯel, laɣalǯenǯal aːqqalemt, aːmdeqo ənšelʼdʼenǯit i tašt oralǯenǯaːt.”
|
|
|
|
Iːpo sajemt saːrət, tʼumbnät paːront omta tiːlä, tʼümbɨnä taːdərɨst, kundɨŋ ilʼi qaukkaŋ tolʼi čʼwäčʼoont taːdərɨt alʼi nu šünʼdʼeont taːderɨst.
|
|
|
|
Medaqij, na čʼwätčʼit tʼonǯont medaqij, nom üːdəläšpa, tʼeːlɨt passa qoptoɣont meːdɨmba.
|
|
|
|
Kundaqɨn, kundaqɨn adua qwatčʼ, Iːpo ellä tüːa, tʼumbnät paːroɣondo ellä.
|
|
|
|
A saim toː tʼekkɨt (sajoɣonto kɨba qapim toː tʼeːkkɨt), kɨba qajpim pannɨt, onǯ piːreɣɨnt.
|
|
|
|
Tʼümbunä čʼeːnčʼa Iːponä: “Totʼatto qonǯirnal qwatčʼ adua, seːm ele adua.”
|
|
|
|
Iːpo qwanna na qwatčʼond.
|
|
|
|
Qwatčʼont meːda amdɨqot (maːdat) maːt qəːnt, (maːt) (maːdant) qəːɣɨnt kwaja, aːmnɨnt kwajan maːdam nöːwɨt, kwaja šünnenǯ šeːrna.
|
|
|
|
Na tüːj puːj šöːw nɨŋga kwajaɣɨnt.
|
|
|
|
Aːqqalet əːta salʼǯoɣɨn (maːdat puːdolqɨn).
|
|
|
|
Köːze (köːndse) nʼozɨt, nʼozɨt na šöːum i aza orannɨt köːndse.
|
|
|
|
Kɨgellɨt aːqqalimt iːku.
|
|
|
|
Aːqqalimt iːut.
|
|
|
|
Aːmdäqo önčelʼdʼit i aːmdeqon quːla oːrannadən Iːpom.
|
|
|
|
Oːmdalǯaːt peqɨnt katalašqant aːmda qarot čʼaːn.
|
|
|
|
Qarɨːmɨɣɨn aːmdəqo onǯ piːreɣɨnt qwäːrɨt: “Kutʼej qaːdarɣondo töːbi quːwamt (quːont) i minani kündəm kɨkzal (kɨgal) twäːlgu?
|
|
|
|
Qajko kɨgɨzal twäːlgu minani šöːwam?”
|
|
|
|
A Iːpo kadɛšpat.
|
|
|
|
“A mašim üːdat tawtʼen aːmdɨqo ele tinani šöːwɨm twäːlgu (tabɨnan eːja wašeːmbidi suːrup).”
|
|
|
|
Aːmdeqo čʼeːnčʼa Iːponä: “Mat taw šədəmǯeːli pot pelgalɨŋ qaːlɨmbaŋ, pajaw mannan tʼäŋgwa, mat näːtku kɨgaŋ.
|
|
|
|
Tottʼen aːrɨk qaːdarɣɨn, morʼen au plʼekan eːla nalguj aːmdeqo nept Jelena Prekrasnaja kweːditi.
|
|
|
|
Tabɨm twäːlenǯal i meka tatčʼal.
|
|
|
|
A mat tau šəːwɨm aːqqalʼindsä paksandsä mɨzä wes teka meːnǯaw.”
|
|
|
|
Iːpo üːbudʼa (tʼumbnänä), qutʼat qaːlɨmba tʼumbunä, tʼumbunänä medešpa Iːpo.
|
|
|
|
A tʼumbunä Iːponä soːɣondešpa: “Qaj Iːpo olomt lojalǯimblʼä čʼaːǯant i pelgalɨŋ töːwant?”
|
|
|
|
Iːpo tʼuːrešpa: “Mašim aːmdeqo orannaːt šim i taw aːmdeqo ʒim üːda (üːdekwa, üdešpa ʒim), kutʼet (kutʼanto, kutʼeɣɨndo) aːrɨŋ qaːdarɣɨn, morʼen au plʼekant eːja qwatčʼ, natʼan nalguj aːmdeqo eːja, tabɨn nept eːja Jelena Prekrasnaja.
|
|
|
|
Wot mat tabɨm twäːlenǯaj, i tatčʼaw aːmdeqonä, i tab meːka menǯit solotij puːj šəːwɨmt.”
|
|
|
|
Tʼumbunä əːǯalgwa: “Omdək mat paːroqeŋ, sajomt saːrət.”
|
|
|
|
Tʼumbunä paːront tiːlä omda, i üːbudʼaːq.
|
|
|
|
Tʼumbunä taːdərɨt tabɨm.
|
|
|
|
Kundɨŋ ilʼi qaukaŋ taːdərɨsɨt, medaqij moret tomn.
|
|
|
|
Tʼumbunä əːǯalgwa tabnä: “Meːdaj, elle, tük.”
|
|
|
|
Iːpo ellɛ tüːwa, kɨba qajpimt toː tʼekkɨt.
|
|
|
|
Tʼumbnä Iːponä qadɛšpat: “A taper, Iːpo, mašim maǯennanǯ.”
|
|
|
|
A Iːpo əːǯalgwa: “Qajko mat tašt maǯenǯak št?
|
|
|
|
Tat quːnnanǯ!”
|
|
|
|
A tʼumbunä i čʼeːnčʼa tabnä: “Teːka moːret auplʼekkant ək puːgu, jeslʼi mašim aza maǯennanǯ.
|
|
|
|
I tan, kuʒan mašim maǯennanǯ, mannan pergeqɨn šət nʼäːbi ennanǯ.
|
|
|
|
Tan okkɨr nʼäːbim toː matčʼlä iːnǯal.
|
|
|
|
Na nʼäːbim öt tomn tʼaǯenǯal, na nʼäːbi pʼäksɨdʼenǯa kɨba andulʼe.
|
|
|
|
I onenǯ na nʼäːbim iːnǯal aːrɣot eːle attedʼelʼent i tau man wadʼoqeŋ kwatpi waššemblʼe töːnǯat kuːläj kʼär.
|
|
|
|
Mannani wadʼow padʼallä qwatenǯat, a tat našan orallel kɨba kuːlän eːlmadam.
|
|
|
|
A kuːläj aːwɨt quːlʼ dʼarä tɛːka čʼeːnčʼenǯa i tɛːka maːdərčʼenǯa.
|
|
|
|
“Üːdlel mannani kɨba mɨw.
|
|
|
|
Qaj naːda tɛːkka, nam i taːtčʼaw.”
|
|
|
|
A tan i kuːlänä čʼeːnčʼelɛnt: “Meːka tadlɛl qupi üːtəm, kutat tatčʼal qupi üːtəm, našan tannani eːlmadomt üːdenǯaw.”
|
|
|
|
Kuːlä waššelä qwanǯa i na üːdəm tatčʼet tɛːkka.
|
|
|
|
Kuʒan moːren au plʼekkant medennanǯ, qwatčʼ moːret topqɨn aːmnenǯa.
|
|
|
|
Medɛːnnanǯ taw kəba annont qamdalǯenǯal, kəba and nʼäːbiulä pʼäksɨlʼdʼenǯa i tat panǯal oːnenǯ piːreqɨnt karmatqent.
|
|
|
|
Onenǯ piːrʼemt čʼüːrze qäːtlel i tat pʼäksɨlʼdʼennanǯ äːrampi äragaulä.
|
|
|
|
I qwannanǯ lʼandäšpɨgu aːmdiqonä.
|
|
|
|
Tap tašt lʼannenǯa onǯ saːdəmt karaulʼbɨgu.
|
|
|
|
Tan elennanǯ.
|
|
|
|
Kaʒdaja qarimɨn na quːpi əssä čʼopɨrlam mölǯikwenǯal (mölǯešpenǯal) i pərsalǯišpenǯal (natqɨlešpɨnǯal) čʼopɨrlam.
|
|
|
|
Tap čʼannɛnǯa okɨr dʼeːl onǯ nʼäːnʼalandsä taːtku.
|
|
|
|
Čʼopɨrlam awešpɨǯat i tabla naːgurtɨn qondku kɨgelenǯaːtt.
|
|
|
|
I qondəku kuʒalǯenǯaːtt i qondalǯenǯaːtt naːgurt.
|
|
|
|
A tan našt qaːron čʼanǯilent, aːmdəqoj naːlɣum šət qodɛn qonnɛnǯa.
|
|
|
|
Kuʒat tabɨm twälenǯal, töːnnanǯ moːret toːmn.
|
|
|
|
Nʼäːbimt tʼäǯenǯal üːdət toːmn, nʼäːbi aj pʼaksɨlʼdʼenǯa andulä.
|
|
|
|
Tawtʼidɛːle puːnnanǯ.
|
|
|
|
A mannani wadʼi maŋgɨlǯikaqɛŋ nikša kuːläla padʼalešpɛnǯaːt.
|
|
|
|
Tat attedʼelä omnennanǯ.
|
|
|
|
Kuːläj kʼär mannani wadʼow padʼalɛšpɛnǯaːtt.
|
|
|
|
Tat nikša orallel kəba kuːläm.
|
|
|
|
I aj ʒa maːdɨrčʼenǯa tɛkka.
|
|
|
|
A tat tabnɛ kuralǯilɛl tap tatimt ɛlti i quːpi üːdəm.
|
|
|
|
Tan našan kəba andəm qamdalǯenǯal.
|
|
|
|
Kəba aːnd pʼaksɨlʼdʼenǯa nʼäːbiulä.
|
|
|
|
Na nʼäːbim panǯal moqänä eːlɛ kutʼtʼan mannan eːza.
|
|
|
|
Na qoptont šeːksä i mɨgazɛ söːtčʼal.
|
|
|
|
Qorbi pʼargew naj söːtčʼaw.
|
|
|
|
Nʼeːqant na kuːlän tatpi ɛlti i kuːpi össä mašim pɨrsalǯennanǯ i mat eledʼenǯaŋ.
|
|
|
|
A nu taper ʒim maǯək.”
|
|
|
|
Iːpo maːtčʼat tʼumbnä, pʼargɨmt korrɨt, pʼargeɣɨnt šət nʼäːbi, okɨr nʼäːbimt toː maǯilä iːwət.
|
|
|
|
Onǯ toː eːle attedʼilä omda.
|
|
|
|
Kutʼaɣɨnto töːwat waššemblä kuːläj kʼar, omdälatt, tʼumbnän wadʼont padʼallä qwattaːt.
|
|
|
|
Iːpo orannat kəba aj kəba kuːläm.
|
|
|
|
Kuːläj aːwɨt, quːl dʼarä maːdɨrlä qwatta Iːponä.
|
|
|
|
“Mannani elmadow üːtlel, a mat tɛːkka qaj nada nam i tatčʼaw.”
|
|
|
|
I Iːbo tapnä uːǯalgwa: “Meːkka tatčʼal quːpi üːdəp.
|
|
|
|
Man našan üːdenǯaw tannani elmadomt.”
|
|
|
|
Kuːlä waššelä qwann.
|
|
|
|
Kundɨŋ alʼi qaukkaŋ waššemblä qwajaza i töːwa, tadɨt quːbi üːdəm.
|
|
|
|
Iːpo karmatqɨt pannɨt, moːret toːmn töːwa, nʼäːbimt üːdət toːmn tʼätǯet, nʼäːbit pʼaksɨlʼdʼa kɨba aːndulä.
|
|
|
|
Iːpo omda annond i üːbədʼa moːrən au plʼekkant.
|
|
|
|
Kundɨŋ ilʼi qaukkand čʼaːǯis moːren au plʼekkant, meːda qwatčʼont.
|
|
|
|
Andɨmt konnä üːgonnɨt annɨmt qamdalǯit, andɨt pʼaksɨlʼdʼa nʼäːbiulä.
|
|
|
|
Na nʼäːbim karmatqɨnt pannɨt.
|
|
|
|
Onǯa čʼüːrəmt iːwɨt, piːramt čʼüːrzä qäːttɨt, pʼaksɨlʼdʼe äragaulä.
|
|
|
|
Čʼaːǯa qwatčʼoqon.
|
|
|
|
Meːda aːmdeqonä.
|
|
|
|
Maːdaqɨnt aːmdeqon quːla nɨŋgaːt.
|
|
|
|
“Mat töːwat lʼandɨgu uːdʼzʼku aːmdeqonä.”
|
|
|
|
Na quːla soːqəndʼäːt aːmdeqonä.
|
|
|
|
“Tənt töːmba äːraga lʼandɨgu uːdʼzʼigu.
|
|
|
|
Aːmdiqo:“ “Tap wargɨŋ äramba.
|
|
|
|
Mat tabɨm lʼannenǯau, čʼopri saːdəm karaumbɨgu.”
|
|
|
|
Lʼandɨt Iːpom.
|
|
|
|
Na saːtqɨn eːja kɨba maːt (maːdokka), na maːtqɨn Iːpo eːla.
|
|
|
|
Kaʒnaj qarimɨqɨn poːnän kwajakwa na quːpi əssä pɨrsalǯešpɨkut čʼopɨrlam.
|
|
|
|
Okkɨr tʼeːl čʼanǯaːtt Jelena Prekrasnaja nʼanʼalanusä taːtku čʼopri saːtqɨnt.
|
|
|
|
Šət nʼänʼaj šət kodɛn Jelena Prekrasnaja kwajawa.
|
|
|
|
Čʼopɨrlam awešpaːtt i qondalǯeškumnaːtt.
|
|
|
|
I eːlle kuǯannaːtt qondəku i qondannaːt.
|
|
|
|
I qondalbaːt.
|
|
|
|
Našt qaːron Iːpo porqoqont aːmdeqoj naːlɣum porqoɣont koːǯaŋnɨt, tʼarbozä oːdomt, topomt saːrennɨt, kwat paːroɣont pannɨt i üːbədʼa (üːbtʼa) moːrət toːmn töːwa.
|
|
|
|
Na nʼäːbim üːdət toːmn tʼäǯit.
|
|
|
|
Nʼäːbi andulä pʼaksɨlʼdʼe.
|
|
|
|
Jelena Prekrasnajam pannɨt andoɣɨnt, onǯ andont oːmta i üːbədʼa moren au plʼekkant.
|
|
|
|
Kundɨŋ alʼi qaukkaŋ čʼaːǯisaːqij.
|
|
|
|
Jelena Prekrasnaja käːlʼdʼa.
|
|
|
|
Uːdəl topɨt saːrelba, Iːpo tabnä əːǯalgwa: “Tan kuːnaj əɣ laqək!
|
|
|
|
Andəm ək pörelǯembet.
|
|
|
|
Toto nʼannä, ət qampolʼdʼenǯaj, i ət koulä quːnǯaj.
|
|
|
|
Kunaŋ eppɨk.
|
|
|
|
Čʼwätčʼont medänǯaj i eːlɨlä qaːlenǯaj.”
|
|
|
|
Jelena Prekrasnaja mannɨmba toto nʼannä, kutʼannaj čʼwätčʼit aza adua.
|
|
|
|
Nuː šünʼdʼ da moːreqij ət.
|
|
|
|
Tapti tʼeːlʼi tʼeːlɨn, tapti tʼeːlɨt tʼeːlamba.
|
|
|
|
Jelena Prekrasnaja Iːponä čʼeːnčʼišpa: “Tat mašim kuː eːle taːdərant?”
|
|
|
|
Iːpo tabnä kadɛšpat: “Mat tašt taːdəraŋ aːmdeqonä, tat tabnä qumnä qwannanǯ.
|
|
|
|
Aːmdeqo šədəmǯeːlʼi poːt pajagalɨŋ eːla.
|
|
|
|
Pajat quːmba i mat tašt tabnä taːdərak št.”
|
|
|
|
Čʼwätčʼont meːdaqij, aːndɨm üːgənnɨt ɛnnä eːle.
|
|
|
|
Elenan uːdol tobɨmt (uːdomt i tobɨmt) toː tʼekʼkʼelǯit (tʼekʼkʼennɨt): “Medaj, wot i čʼwäːtčʼont.”
|
|
|
|
Jelena Prekrasnaja ennä waʒa.
|
|
|
|
Iːpo andɨmt qamdalǯit, and pʼaksɨlʼdʼa nʼäːbiulä.
|
|
|
|
Na nʼäːbim Iːpo iwət i qwannaqij.
|
|
|
|
Iːpo čʼeːnčʼa, Jelena Prekrasnajna: “Miː tassä qwanǯaj tʼumbunän qabi maŋgɨlǯiqant.”
|
|
|
|
Medaːqij, kuːläj kʼarr padʼaläšpadən tʼumbnän waːdʼim.
|
|
|
|
Iːpo orannɨt kəba kuːläm i kuːläj aːwot qulʼ dʼarä maːdərna: “Mannani elʼmadom üːtlel, teːkka qaj nada eːnǯa, nam i tatčʼaw.”
|
|
|
|
A Iːpo tabnä čʼeːnčʼa: “Meːkka tatläl quːpi üdəm i eːldi üːdəm.
|
|
|
|
Našan mat tan elmadomt üːdənǯaw.”
|
|
|
|
Kuːlä waššelä qwann.
|
|
|
|
Kundɨŋ ilʼi qaukkaŋ, tiːmblä kwajas i töːwa (omtʼa) omtətʼa tabɨštjan qəːnt.
|
|
|
|
Iːpo kəba kuːlänt oralblä aːmda.
|
|
|
|
Kuːlä tadəmbat eːldi üːdəm i quːbi üːdəm.
|
|
|
|
Iːponä meːwɨt, kəba kuːlämt üːtət.
|
|
|
|
Iːpo nʼäːpimt tʼumbnän pʼargent pannɨt na koptoɣont nʼäːbimt mɨgam iːwɨt šeːgam iːwɨt i sönnat nʼäːbimt onǯ koptoɣont.
|
|
|
|
Korbi pʼargɨmt nʼeːqɨnt söːnnɨt.
|
|
|
|
A onǯa quːpi i eːldi össä pɨrsalǯət tʼumbnäm, tʼumbnä (tɨː eːlɛ) ɛːlɛdʼa.
|
|
|
|
Onǯa i čʼeːnčʼa.
|
|
|
|
“Qajga mat kundɨŋ qondalbɨmbaŋ.”
|
|
|
|
Iːpo aːntanna.
|
|
|
|
Nu i tʼumbunä i äːǯalgwa Iːponä: “Mat tišti taːdərenǯak šti.
|
|
|
|
Saːimti saːrlʼi, i mat tiːšti taːdərenǯaŋ.”
|
|
|
|
Tabɨštjaq saimti saːraqij, tʼumbnät paːront šədäqij tiːle omdaqij.
|
|
|
|
Tʼumbnä tabɨštjam taːdərɨt.
|
|
|
|
Kundɨŋ ilʼi qaukkaŋ medaːtan, tabɨštjan medərɨt, na čʼwätčʼont, kutʼan eːja na aːmdəqo pajagaːlʼi.
|
|
|
|
Iːpo Jelena Prekrasnajanä čʼeːnčʼa: “Mʼeduun, kəba qajpim toː tʼeklel qwanǯaj aːmdeqonä.”
|
|
|
|
A Elena Prekrasnaja tʼuːrlä omdədʼa.
|
|
|
|
“Mat tabnä aza qwanǯaŋ.
|
|
|
|
Xotʼ mašim (kuːʒəm) ku eːle ʒim qadəbuk, a mat tabnä xotʼ quːnǯaŋ, a tabnä aza qwanǯaŋ, ärambədi amdiqonä.”
|
|
|
|
A Iːpo i čʼeːnčʼa: “A mat kuː qadɛnǯaŋ.”
|
|
|
|
A tʼumbnä laqwatčʼelä i čʼeːnčʼa tabɨštjana: “Mat ɛːztʼenǯaŋ Jelena Prekrasnajaulä i tan maššim qwannennanǯ aːmdeqonä.”
|
|
|
|
A Jelena Prekrasnaja taumɨqɨn qaːlänǯa.
|
|
|
|
A tan, Iːpo, Jelena Prekrasnajam oːnenǯ piːrʼeqɨnt qumn iːnǯal.
|
|
|
|
I tapsä nädlent i eːlennanǯ.”
|
|
|
|
Jelena Prekrasnaja aːntanna: “Iːpo ʒəm iːnǯa onǯ piːrʼaqənt.”
|
|
|
|
Jelena Prekrasnaja muːnoqɨnto onǯ lʼaqqɨmt meːwat Iːponä muːnandɨt Iːponä soloti nepsuj lʼaqqɨmt.
|
|
|
|
Tʼumbnä čʼwätčʼont qäːttedʼa i piksɨlʼdʼa Jelʼena Prekrasnaulä.
|
|
|
|
Iːpo odoont (qaːlʼitabront) orannɨt qaːlʼtʼannɨt i qwannaq (qaːlʼtʼalblä qwannaqij).
|
|
|
|
Čʼaːǯaːqi qwatčʼont.
|
|
|
|
Medešpaqi aːmdeqon maːtt.
|
|
|
|
Aːmdeqo maːtqɨndo poːnä čʼannɨmba.
|
|
|
|
Aːdəlǯa (aːdəlʒlä).
|
|
|
|
Medaːqij, aːmdəqo tabɨštjam šədäqɨndi torowačʼešpa i odoqent Jelena Prekrasnaja taːd plʼekkaj udoont qaːlʼtʼennɨt.
|
|
|
|
Šədäqɨndi tabəštjam onǯ piːrəqɨnt maːtqɨnt qwandɨt.
|
|
|
|
Naːze üːdi erlä qwattat, qaj sowa absəlantsä tabəštjam awralǯəšpat.
|
|
|
|
Tapti qaːrɨn aːmdiqo zoloti puːj šəːwɨm orannɨt aːqqalʼtʼsä, paksanɨmt pannɨt šəːwnä mewɨt kuːdälblä tatət Iːponä uːdoqɛnt, meːwɨt.
|
|
|
|
Iːpo soloti puːj šəːwɨt paːront tiːlä omta i üːbədʼa, kutʼen eːja Jelena Prekrasnaja.
|
|
|
|
Töːwa (meda) tabnä.
|
|
|
|
Jelena Prekrasnaja tabɨm aːdəlǯlä aːmda (aːdalǯa).
|
|
|
|
Jelena Prekrasnaja tabɨm omdalǯit na šəːwot paːront i onǯ omta na šəwot paːront i šədäqi tiːmblä čʼaːǯaːqij.
|
|
|
|
A tʼumbnä aːmdiqonnan qaːlamba.
|
|
|
|
Aːmdeqo kündlamt karɛtant saːrelgannat.
|
|
|
|
Qwanǯat nunmaːt, wendʼajčʼigu.
|
|
|
|
Aːmdeqo tʼumbnäzä karetaɣɨn qəːtčʼəl oːmdaqij üːbtʼät nun maːt.
|
|
|
|
Nun maːt meːdat.
|
|
|
|
Nun maːdan, maːdaqɨn tʼumbnä äːztʼe (piksɨlʼdʼa) tʼumbnäulä, aːmdeqo manʼǯedʼa qolʼdʼit, aza Jelena Prekrasnaja, a čʼaːǯa tapsä qətčʼal tʼumbnä.
|
|
|
|
Aːmdeqo kocʼcʼiwanna i lardʼa, i tʼumbunäm toː tʼoqonnɨt.
|
|
|
|
Tʼumbnä kuranna qoptɨn.
|
|
|
|
Kundɨŋ ilʼi qaukkaŋ tʼumbunä kurs, i meːtrt Iːpoštjam.
|
|
|
|
Iːponmɨq uderaqij.
|
|
|
|
Tʼumbnä laqwatčʼlä kadɛšpat tabɨštjanä: “Man aːmdeqom aːlɨŋnaw.
|
|
|
|
Aːmdiqo swadʼbantsä nun maːdan šündʼɛqɨn qaːlat.”
|
|
|
|
Tʼumbnä əːǯalgwa Iːponä: “Tan onenǯ (mašip tiːle) omnennanǯ (mekale), a Jelena Prekrasnaja kündət paːron aːmdlä čʼaːǯenǯa.”
|
|
|
|
Iːpo omda tʼumbnɛt paːront i üːbtʼat moqonä eːle.
|
|
|
|
Čʼaːǯaːt.
|
|
|
|
Medaːtan na aːmdeqon čʼwɛtčʼont, kutʼan eːŋ wašembi suːrum.
|
|
|
|
Medatɨn.
|
|
|
|
Iːpo i čʼeːnčʼa tʼumbnänä: “Taper tau šəː (öː) wɨm qwannenǯaw aːmdiqonä.”
|
|
|
|
A tʼumbunä i əːǯalgwa: “Mat tau čʼwätčʼont qätedʼenǯaŋ, pʼaksɨlʼdʼenǯaŋ šəːwi kündulä i tan mašim kuːdallä qwannennanǯ aːmdeqonä i meːnǯal aːmdeqonä.
|
|
|
|
Mat qaːlenǯaŋ aːmdeqonnan.
|
|
|
|
Tan töːnnanǯ tɨka i Jelena Prekrasnajan opti tau šəːwɨm tiːnǯalʼi i čʼaːǯəli moqonä eːle.
|
|
|
|
A mat tišti metrenǯaŋ (posqalɛj/ nʼannäj) tʼeːllan.”
|
|
|
|
Tʼumbnä čʼwätčʼont qättedʼa, peksɨlʼdʼa šəːwi kündulä.
|
|
|
|
Iːpo köːntsä sojoont saːrɨt i kuːdalä i üːbədʼaqij aːmdəqonä.
|
|
|
|
Kuːdälblä tatɨt aːmdeqonä soloti puːj šəːwɨm.
|
|
|
|
Amdeqo kweːdɛlʼdʼit tabɨm.
|
|
|
|
Iːpo mewɨt šəːwi kündəmt aːmdəqonä.
|
|
|
|
Aːmdiqo Iːpom əssä əttalǯit, i auralǯit, poːnä čʼanǯaːqij, šüdʼernan iːloqɨn, qaːdaj poːqon, poːt paːroqon wašembi suːrum pedeqɨnt aːmda.
|
|
|
|
Aːmdiqo innä čʼanǯa, toː tʼekkʼelǯət petɨm poːɣɨndo i na petsä elle tüːwa i wašembi suruj pedəmtsä mewɨt Iːponä.
|
|
|
|
Iːpo waššembi suruj pedentsä üːbədʼa kutʼen Jelena Prekrasnaja eːja, tabɨm aːdalǯit.
|
|
|
|
Iːbo meːda Jelena Prekrasnajana i pedɨm mewat Jelena Prekrasnajanä.
|
|
|
|
I omdaqij kündət paːront i üːbtʼaqij mogonä eːle.
|
|
|
|
A taw aːmdəqo tapti deːl saːrennɨt, solotɨ püːj šəːwɨm karetant.
|
|
|
|
I onǯ omda i qwatčʼoɣont čʼaːǯa.
|
|
|
|
Našak sowak taːdərɨt.
|
|
|
|
Našaŋ sowant i qoptɨt taːdɨrlä qwattɨt.
|
|
|
|
Aːmdəqo udərgu titʼalbat.
|
|
|
|
Qwaǯantse nʼaqqɨlbat onǯ piːreɣɨnt.
|
|
|
|
Na šöːwɨm qajnug taːdərɨt našaŋ taːdərɨt.
|
|
|
|
Aːmdequp poːskalla qaːɣlɨn olomt toralǯilä omda i nʼaqqəlbɨt.
|
|
|
|
Šəwam uːdərgu tʼitʼalbat.
|
|
|
|
Qwatčʼim mendɨt i na šəːw warqə poːlzant tattɨt i warq poːlzat puːǯont patqəlǯit aːmdəqo karɛtantsä.
|
|
|
|
Qajnuŋ taːdərɨt niŋ aj taːdərɨt.
|
|
|
|
Aːmdəqon karetat poːlzat puːǯon, karetamt wes panannɨt i nəǯarnɨt.
|
|
|
|
Aːmdəqonnan udət (udlat) naj nʼundʼa (nʼundʼat) na šəːwɨm oralblä, na soloti puj šəːw qajnuŋ taːdərɨt niŋ aj taːdərɨt i karetaj qaːɣlɨt naj qaːla čʼoraʒat puːǯoqɨn.
|
|
|
|
Waʒaj otom qaːla.
|
|
|
|
Qajnuŋ na šəːwi künt aːmdəqom taːdərɨt i niŋ aj taːdərɨt i aːmdeqom onǯ piːrəmt wes porɣɨmtsä pümɨntsä nɨǯira.
|
|
|
|
Katʼtʼe mɨlä tabɨm üːgolblä taːdərɨt.
|
|
|
|
Nʼajdʼe qobɨn qaːla.
|
|
|
|
Nat poːsqalä qolʼdʼit, aza soloti puːj šəːw tabɨm taːdərɨt a tʼumbnä.
|
|
|
|
Našan aːmdiqo wašamd nʼampɛdʼit i tʼumbnä qwanna.
|
|
|
|
Aːmdəqo nʼajdʼe qobɨn qaːla poːlzaqqɨn.
|
|
|
|
A tʼumbnä mʼedərɨt Iːboštjam na čʼwätčʼi tʼonǯon kutʼtʼen tʼeːɣə kundɨmt Iːpon tʼumbnä oːdassɨt Iːpot kündəm.
|
|
|
|
Na tʼeːɣi künt quːmblä eppa na mɨqɨn.
|
|
|
|
Tablam medərɨt.
|
|
|
|
Na čʼwätčʼit tʼonǯon utraːtt.
|
|
|
|
Tʼumbnä tabəštjanä aj kadɛšpat: “Man aːmdəqum nʼajdʼe qobɨn qaːltaw poːlzat puːǯoqon.”
|
|
|
|
Tʼumbnä Iːponä čʼeːnčʼa: “Taw tʼeːɣə kündəm eːlettɨgu.
|
|
|
|
Miː aːrgot omdəlun attedʼelä, kuläla waššedʼemblä töːnǯat, omnɛnǯat, tʼeɣə kündən wadʼim padʼalɨšpɨnǯatt.
|
|
|
|
Tʼumbɨnä oralǯenǯit, okkɨr kuːläm i kuläla maːdərčʼenǯaːt mannan.”
|
|
|
|
“Qaj nada miː nan i tatčʼun tɛːkka.
|
|
|
|
Üːdɨllel”, warq kuːläj kʼar waššɛlä qwannaːt, moɣunä ele wašemblä töːwat i tadaːtən eldi i quːbi üːdəm.
|
|
|
|
Na tʼumbnä aj niŋg tə pərsalǯət, quːbi kündəm künd elɛdʼa i ennä (wašedʼa) waʒa.
|
|
|
|
Nu i tʼumbunä Iːponä əǯalgwa: “Tapeːr čʼaːǯenǯaːlʼi (šədälʼi) kündsä, kündət tiːmple.”
|
|
|
|
Iːpo omda tʼeːɣa kündət paːront tiːlʼe, a Jelena Prekrasnaja – solotoj puːj šəːwat paːront i wašɛmbi suːrum pedɛntsä oralbat udoqont.
|
|
|
|
I üːbətʼaːq.
|
|
|
|
Moqɨnä eːle čʼaːǯaːq.
|
|
|
|
Kundɨŋ ilʼi qaukkaŋ čʼaːǯaːqi, meːdaqij nagur tʼäːraj wattont.
|
|
|
|
Kutʼen aːmdəs pöj salǯ nagərbədi.
|
|
|
|
I na čʼwäːtčʼit tʼonǯon lɨpwannaːqɨj šaːqqəgu udraqij i tabəštjanä medaːqij šət warq tʼemnʼatɨj i šaqänǯadɨn okkər mɨɣɨn.
|
|
|
|
Iːpo sowa šəːwi kündɨm qoːmbat i wašɛmbi suːrum i näːdəmba Jelena Prekrasnajazä, a tabəštjaq sowa qaimnä aza qoːmbaqij.
|
|
|
|
Iːpo Jelena Prekrasnajazä qondalbaːqij, a šət warq tʼemnʼassɨq aza qondaqij.
|
|
|
|
Onǯi nʼeːqɨndi čʼeːnčʼaːqij: “Miː qwallaj Iːpom.
|
|
|
|
Tan, Griška, iːnǯal wašembi suːrum, i solotij puːj šəːwɨm.
|
|
|
|
A mat iːnǯaw oneqqeŋ Jelena Prekrasnajam.”
|
|
|
|
I Iːpom qwannaqij.
|
|
|
|
A Jelʼena Prekrasnajam əːǯeraːqɨj: “Tan minani äzäːkuŋn qaimnaj, ək qadɛšpɨt.”
|
|
|
|
Tiːčʼaːqij Jelena Prekrasnajanä.
|
|
|
|
Jelena Prekrasnajam omdalǯaːqij solotɨj tüːj šət paːront i onǯi omdaqij kündlamdə tiːla i üːbədʼaːt onǯ qaːdarɣɨndɨm.
|
|
|
|
A Iːpom kumbla qaːla.
|
|
|
|
I tʼeɣə kündəmt qaːltatɨn.
|
|
|
|
Onǯən qwatčʼoɣondon meːdatən, äzäqɨnt, äzɨt andalblʼe qwädelʼdʼit šət wark iːmt Jelena Prekrasnajam.
|
|
|
|
A tawtʼen Iːbo quːmblä qaːlamba.
|
|
|
|
Tʼumbnä qoštalǯət kurlä töːwa naːgur tʼäːraj wattont, kutʼen Iːpon madla (Iːponmɨq) šaqäšpɨsaːt.
|
|
|
|
Tʼumbnä töːwa na čʼwäčʼont.
|
|
|
|
A Iːpo qumblä eppa.
|
|
|
|
A tʼeːɣə kündət, Iːpot künt, Iːpot kəːɣɨ kwajawa (nɨŋga).
|
|
|
|
Iːpom kuläla padʼallä qwattɨmbaːt.
|
|
|
|
Tʼumbənä aj orannət kulän elmadɨm.
|
|
|
|
Kuläj aːwɨt tʼumbunänä maːdɨrna: “Üːtlel mannani eːlmadom.
|
|
|
|
Qaj naːdə eːnǯa teːka, man naːm i taːtčʼaw.”
|
|
|
|
A tʼumbənä i čʼeːnčʼa kulänä: “Eldi üːdəm i quːbi üːdəm taːtčʼal, našaŋ man üːdənǯaw tannani elmadomt.”
|
|
|
|
Kulä wašɛle qwanna.
|
|
|
|
Kundɨŋ alʼi qaukaŋ qwajaza i töːwa wašemblä.
|
|
|
|
Taːtət ɛldi i quːbi üːdəm.
|
|
|
|
Tʼumbnätä našaŋ üːdət kɨba kuːlam.
|
|
|
|
Tʼümbnä ɛldi i quːbi össä pɨrsalǯit Iːpom.
|
|
|
|
Iːpo ɛledʼa, onǯa olomt qadolešpat.
|
|
|
|
“Ajgə mat kundɨk qondalbaq.”
|
|
|
|
Tʼumbnä tabnä i čʼeːnčʼa: “Aza mat tat bə okɨrlä qondalbnɛnt.
|
|
|
|
Tat šət tʼemnʼil tašt qwatpaːq i qwanbaːt onǯən onǯ eːdeqɨndɨn.
|
|
|
|
Tan Iːpo moqɨnä qwannanǯ, medännanǯ onɛnǯ qwatčʼoqent.
|
|
|
|
Äzänt maːt ək qäːdälǯik (kwatčʼin), aːrk qulanan äraga i pajaganä qäːdälǯlent, tablanan šaqqännanǯ.
|
|
|
|
Tapti tʼeːl kotaj äraga i pajaga qwanǯaːqij aːmdeqonä (swadʼbatčʼugu) swadʼba mannɨmbɨgu.
|
|
|
|
I tannaj qwannanǯ, äzent maːt šeːrčʼant.
|
|
|
|
Äzew nogalešpenʒit üːdəm quːlanä.
|
|
|
|
Aːnet tomn tɛːka medɛnǯa qalazä noɣalǯenǯit pariti üːdəm.
|
|
|
|
A tan našan i maːdɨrlent: “Man mɨl kalazä aza ətčʼaw, a ətčʼiw kwɛzi kalat tiːri üːdəm.”
|
|
|
|
Aːmdiqo moɣonä piːgelʼe soːɣonnenǯa Jelena Prekrasnajam: “To qum maːdɨrna kwɛːzi kalat tiːri pariti üːdəm ətku.”
|
|
|
|
A Elena Prekrasnaja əːǯalgwenǯa, mol qaj qum natʼan eːŋ, töːwi mat kəːqeŋ, man qonǯurgu kɨgaŋ na qum.
|
|
|
|
Tan našan medennanǯ tabnä, tabət kəːnt tabnä i torowatčʼennanǯ tabsä.
|
|
|
|
A taba qolʼdenǯit tan odoqent onǯ lʼaqɨmt iː qadälǯenǯit äzäqent: “Tau Iːpo mannani äraw.”
|
|
|
|
Äzäl qoštɛnǯa št.”
|
|
|
|
Iːpo tʼeːk kündət paːront omda i üːbədʼa onǯ qwatčʼoqont.
|
|
|
|
Onǯ qwatčʼont meːda üːdən, okɨr maːt udəra šaqqəgu.
|
|
|
|
Äraga pajagaštjaq tabɨm üːdaɣɨ šaqqɨgu.
|
|
|
|
Tapti qarimɨn ära pajassək üːbtʼešpaqɨj aːmdeqonä mannɨmbɨgu aːmdeqoːt šət iːm i Jelena Prekrasnaja.
|
|
|
|
I Iːpo tablazä, kündət paːront omda i naj qwanna äzänt maːtt.
|
|
|
|
Maːt šeːrna, aːnet tomn nɨlädʼa i nɨŋga.
|
|
|
|
Äzɨt üːdəm quːlanä noɣalešpət.
|
|
|
|
Kušan noɣalešpɨst quːlanä i meːda Iːponä.
|
|
|
|
Kalazä noːqannɨt, a Iːpo aza kɨgat ətku.
|
|
|
|
“Mat kalazä aza ətčʼaw.
|
|
|
|
Noqallel meːka kwezi kalat tiːri üːdəm.”
|
|
|
|
Aːmdəqo moɣənä piːgən Jelena Prekrasnajanä soːqondʼa: “Tau ötčʼedej qum kalazä aza kɨgɨt ətku, a kwɛːzi kalat tiːri üːdno madərn.”
|
|
|
|
Jelena Prekrasnaja əːǯalgwa: “Tap meːka mat kəːqeŋ töːla, mat kɨgaŋ qonǯurgu tabɨm.”
|
|
|
|
Iːpo töːwa qəːɣent i torowatčʼešpa tapsä.
|
|
|
|
A Jelena Prekrasnaja udoqont qolʼdʼit onǯ lʼaqɨmt i ennä waʒedʼa toboɣont.
|
|
|
|
“Tau mannani äraw Iːpo.”
|
|
|
|
I äzɨt qoštalǯət Iːpoj onǯ iːmt.
|
|
|
|
Wes kadɛnnaqij äzäqɨnt: “Tau wes mat qoːzaw, kündɨm, šəːwi kündɨm, wašembi surum (ʒarpticam) i Jelena Prekrasnajam.”
|
|
|
|
Äzɨt šət warq iːmt qwatku kuralǯit.
|
|
|
|
A Iːpom nädät i aːmdeqoj čʼwɛčʼemt Iːponä wes mewɨt.
|
|
|
|
Iːpo ɛːladɨn i warkadɨn i taperto ɛlatt.
|