This visualization was generated on 15.11.2021 with Corpus Services.

TFF Eräga pajaga.
Elɨkwat wɨrkɨkwat okɨr ɛːden ara pajasɨqɨj.
Tabɨstjanan ɛːkwat iːt i neːt.
Nint nep Ketɨrna, a iːnt nep Wasska.
No kušaŋ eːlɨkwat warkɨkwat.
Araga quːa.
Kušaŋ eːlɨmpat i pajaga naj quːa.
Ketɨrna i Wasska šidäɣɨj qaːlaqɨ.
Keterna warkɨŋ orɨmna, a Wasska ešo kɨba eːja.
Nenʼakat əːtan saːstupse čwäča paqqɨnnɨt koːtʼin.
Na paqqɨlbi čwäːčont čaːjalǯimbat saːtčam.
Taoqɨnt elaqɨj i araqɨnt medaqɨj saːtč orɨmpa, našak pɨrgɨn orɨmba saːtč.
Saːtčam maːčaqɨj nʼenʼasɨqɨj.
Arat menta, kat puːǯoɣɨn nʼenʼaqat saːtčem nado qwaːtpešpugu (oldɨmbat).
Qwaːtpet wes saːtčem i swʼärmɨgu (swʼärmešpugu).
“Swʼermenǯaw Wasskane qaborg.”
Teper Wasskane qaborgɨm sʼwʼärmɨt.
Waska qaborgɨm šeːrnɨt, aːndalba.
Kuranna qoldɨt tom.
Qät paːroɣɨt kurkwä, qän ɨːloɣɨn qonǯirnɨt kɨba aːnt.
Kɨba aːntont töːwa.
Kɨba aːndom qamdalǯit.
Kɨba aːndom qotte tʼatčit, a natʼaɣɨn i lap eppa.
I Waska na kɨba annont (antont) omta i qwanna qoldont, qolden au plʼekant.
Kutʼaɣɨnto merɨk töːwa i qoltom šeːrnɨt, qaj na qolton qwäjaqɨn i Wasskam qwandɨt i okɨr qät taːbont qättɨt.
Na qät paːront kɨba antomt üːgənnɨt.
I tʼeːlɨt passä.
Čwečoqɨnt meta.
“Tau čwečet taːboɣən šaqenǯaŋ.”
Onǯa larɨmba.
Lɨpwanna.
“Poːt paront sɨɣalgu nado i natʼaɣɨn konnänǯa.”
Kušaŋ aːmdɨs, aːmdɨs.
Petʼ tʼönǯon qoldoɣɨnto ötkundo quːla čonǯilʼe qwattat.
Čonǯatɨn.
Kuten Wasʼka pot paːron aːmdas, nat pot taːbont oːmdatan.
Aːmdaːtat selʼd üːtəqol loːs.
Kaʒdɨj nʼentnant koʒakaɣɨnt solotɨj qomdä.
I selʼdimtselʼi losnan eːpa qozɨrt.
Qozɨrɨm čaːtčit, tawaj qozɨrčugu.
Kušak qozɨrtčaːdɨn, qozɨrtčaːdɨn.
Ətqondo ešo čanǯa qät paːron ärambadi loːs.
Tabɨnan koǯat warq.
Petʼ tʼönǯon (qarbi tʼönǯot) Waskat qabork petuxalʼ tʼare parklʼe qwatta.
Okɨr par petuxal tare qaborg parkwa, šitämčeːl aj parqwa qaborɣɨt.
Loːzla čeːnčat: “Qaj qarpi tʼönč taba uše.”
Araj los: “Qaj qarpi tʼönč ešo qätlun qozɨrɨm.”
Qozɨrɨm taːrnɨt ešo.
Araj loːs wes qomdäm tʼatčat qozɨrt.
Okɨr lozɨnnan koʒat tʼibeqant solotot eːja.
Qaborɣɨt aj läːra.
Loːsla aj: “Köː qarimɨt teperʼ.”
Nagur paːr lära.
Lartʼatan wes.
Wes kurannatɨn öt, patqonnat qoːldont.
Kočalatɨn nɨntɨ qaːlatɨn.
Tʼeːlɨmna.
Wasska tüa elle čwäčont.
Na kočalam kɨba andoɣont tuːɣonnɨt.
I qoldɨnt kwejont kɨba andoɣonte mannɨmba kuntaŋ.
Natʼaɣɨn čaːǯa wark wark aːnt.
Waska əːkomt udoɣɨnt tiːot, na antont maxajče onǯ pirʼaɣɨnt ökontse.
Wark aːnt meta tapne, kəːtčal i qäːtelʼǯa.
Wasskam onǯ piːregent wark andont omdɨlǯat, a kočalam tuːɣonnatɨn roponigat i kɨba andɨm naj čočaɣan warg andont.
Wark antoqɨj wark qum i Waskane soːgundʼešpa: “Kutʼtʼeɣɨj kɨba aurgont?
Qaj mešpant tau čwätč tönǯoɣɨt?”
A Wasska qadʼešpɨt: “Kɨba andont omdɨsak qoldont, qoldat saigant medan, kutʼaɣɨnto pakota meta i mašim tawtiteːlʼe tata.
A tau čwäčot tönǯoɣot šaːqan poːt paːroɣon.
Petʼ tʼonǯon ötqundo loːsla čanǯat seːlʼtʼ loːs.
Kaštɨj loːsnan qotča.
Kutʼen aːmdɨsan poːt paːroɣon na pot tapont omdeladɨn.
Okɨr loːzɨnan eppa kozɨrt.
I kwattadɨn koːzɨrčlʼe.
Tablan qomdä soːlot.”
Waska tärba…
Čaːčaden (čaːǯaden), šet tʼelɨj.
Nagur dʼel i medaːten okɨr qwatčont.
Na qwatčogɨn aːmdegonnan neːt qumba.
Na aːmdegonnan okɨr neːt i na neːt lozi pučent ezɨmpa.
Qula awešpɨndat qwatčoɣɨn.
Aːmdigo peːwɨt nilʼdʼzʼi qum štop neːmt meːku quːl čorgont.
Wasskane qaborg čeːnča: “Wasska, lʼandlʼent aːmdeqone iː äk larɨmbɨk.”
Qapork Wasskane qatešpat: “Kuːšat lʼannenanǯ aːmdiqone, neːt epenǯa qumblʼe, nunmaːtqɨn.
Qättɨ aːmdʼeqone: “Kutʼen kwezɨm meːšpatɨn?”
Kuznice štop tap pekolʼe tawimt kwäzi nop qatalazi nop eːi štop, i soloti swečkla i qarsen kwezi i saːl qwezi.
Aːmdeqo naːlam teːqa tatimt.
Tan nagur naːlam iːnǯal.
I qwannanǯ nagur nalaze.
Nunmaːt šeːrčant.
Amdeqon net qumplʼi epenǯa.
Tat šeːrčant i šoɣor paːront omnenanǯ i amdɨq.
Petʼ tʼonǯont cwetčse lagenǯa i nun maːt čweːtčse lagenǯa.
Pakota warəq töːnǯa nun maːtqɨj.
Maːdala wes nöːgəčenǯat.
I na loːs äraj töːnǯa.
Šeːrča nunmatt.
Maːdaɣɨndo šeːrča tašt qolʼdenǯa šoɣor paːron.
A tat Wasska tau swäčkɨm awešplʼel.
Na lozi äraga tanan maːdɨrčenǯa: “Tat melʼel meːkka swäčkam.”
A tat tapne melel kwezi swäčkla.
Tap awešpenǯit.
Täwɨt aza iːnǯet kwezi swäčkam.
Warək qatqɨj täwot saːpetenǯa.
I na loːzi araga moqɨt qadolgu maːdɨrčenǯa.
“Manani mogom qadolʼlʼe qäzɨwatpa.”
A tan Wasska nopantlɨl kweːzi nopont i moɣomt loːzne qaːtolʼlʼil.
Loːs warɣɨl parklʼe qwatenǯa.
Tan išo wargaŋ qatolʼešplʼel.
Patom tanando kuːnenǯ los.
Ponä čaːrenǯa, onǯe paːrkwenǯa.
Našt qarogon waʒedʼenǯa aːmdeqon neːt i na lozɨn moqont ponä čarenǯa, näj čaːrenǯa maːdoɣondo (nun maːtqɨndo).
A tan Waska šoɣor paroɣondo tabɨm metɨrlel i olot taront krepkam orallel, kweːzi qaːrsɨse qatɨlʼešplʼel kušak tat tanel i našak qattällel.
Tabɨn qop passɨdenǯa.
Tabɨnando čannenǯa čaːmǯej i šüː i töʒel čaːmǯej.”
Na aːmdeqo aj wark andond tömba.
Qulat šetkoden kwajawa peːwɨt nildʼzʼi qum.
A Waska: “Mat mol tabɨm praiwlʼeps.
Aːmdɨqo taulel qweːzi nopɨm i qatlat, qwezi qarsɨnɨm, qwezi swäčq.”
Aːmdeqoj äːǯilgwa: “Wes wes qomǯew qaj teːka nado.”
Meka aːmdeqoj čeːnča: “Taptʼel meqa qwanǯaj.
Tan mannani ennanǯ.
Mannani neːw minǯal.
Quːm tanent, našan manani neuw i mat teːkalʼe neːw teːkalʼe qummenǯaw.
Mannan okɨr neːw ilʼe elʼmadow netu.
I tan manani eːti maːdom wes teːkka menǯaw.”
Aːmdeqo əːǯelgwa: “Manani odoqaŋ wes eja.
Qaim kɨgaŋ, nam i qonǯaw.
No Waska sečas meːka qwanǯaj, tautʼelan manan warkennanǯ.”
No i qwannaɣe wasska i aːmdeqoːn.
Nu i Waska šit dʼeːl aːmdeqon maːtqɨn aːmda.
Aːmdeqo kwačoɣɨn qwajawa peːwɨt kweːzi meːʒerti quːlam.
I qombat kweːzi meːʒerti quːlam.
“Meːka meːwalɨn kwezi nop qatlat kweːzi nopoɣɨn.
Qai mat qadešpal nilʼdʼaredɨn meːwalɨn.
Kweːzi qarsɨn, kweːzi swäčk čitop qaːrdʼeːl wes tiːɣentin meːmbi.”
Aːmdeqo maːt töːkwa, a Waska soːɣondʼikwa aːmdeqom: “Qajgat kundɨŋ qwajawɨnt?”
Aːmdeqo:“ “Lʼantaw quːlan meːku qaim tan meːkka qadešpɨzaw.
Meːnǯat tijawdʼeːl.”
Waska äːʒelgwa “Tejawdʼeːl üːtimɨn qwanǯaŋ nunmaːt tan neqənt.
Wes tateːnǯal, qaj meːka nado.”
Pet menda.
Taptʼeːl aːmdeqo qaːrt qarimɨn waša qwannä.
Kundɨŋ ilʼi kaukɨŋ qwajaza, töːwa.
“Qaj meka nado, nam i taːtat: kweːsi nop, swäčk kweːzi, kweːzi qaːrs.”
Waska taptʼeːl üːdemɨn qwanǯa nunmat kutʼen aːmdeqon ne quːmple eppa.
Üːtimɨn na qwezi nopɨmt, kwezi swečkamt, kwezwi qaːrsimt koʒant paŋgɨnɨt wes i qwanna nunmaːt kutʼen eppa aːmdeɣon nʼeːt.
Nuːnmaːt šeːrna šündäɣɨnt i šoɣor paront sɨːɣenna, omda.
Aːmda.
Onǯa štop äk qondalgu swäčkam šelkaetpat.
Kundɨŋ ilʼi kaukɨŋ pet tʼönǯ medešpa.
Qatʼemele (qatʼemɨlä) naša waːrgɨŋ mergelba ponä.
Čwečse laqa.
Na mergɨze nunmaːtala wes nöːgɨdʼat.
“Qaj?
Mɨlä na äraka ütqo čʼanǯekus loːs šeːrna nunmaːtt.
Kutʼen mat pot paːrogon aːmdɨseŋ, ötkundo čanǯekuzat selʼd loːs i samaja äraj loːs tɨnd naj töːmba meːkalʼe i tölomatcʼe masse.”
“Wasska qaj mešpɨndal šoɣor paːroɣɨn?
Qaj swäčk šʼelpaiškɨndal?
Meːka melʼel swäčkam orakošaŋ.”
Waska koʒant nöːwɨt i oram swäčkam qwezi loːzi äragane mewɨt.
Äraka šelkaišpat, awešpat.
Tewɨt sappedʼi qaːtqɨj.
A kanatiː: “Qajqan qomɨm swäčkap?”
Äraga: “Waska meka moqom mannan moqom kocʼewatpa.”
Lozɨ aragan moq qäzwatpa.
Waska kočaqonto iːwat kweːzi qati nop, otoqɨnt nopandɨt.
Lozɨ äragan moqɨn tawaj äraga moqomt qatolʼešpɨku kwezi nopse kwezi qatlaze.
Loːzɨ äraga tanɨŋ äsa.
Parkwa onǯil tʼarä i ponä čarra, kuralʼešpa.
Onǯ parkwa, moɣot köʒa, kam čaːǯa.
Wes watt kauze.
Lozɨnnat topɨt soːbi qoldont meːta.
Qoldot tom meːta.
Əːt patqɨn.
A aːmdeqon neːt eledze, wašedʼa, na loːzɨn moqon kuralešpa, a Wasska moqoɣont.
Aːmdeqon neːnt olot tarwont orannɨt odontse i qwezi qaːrpɨp.
Iː qaːrpɨntse kʼakɨlʼe kwatpat qwättät kušaŋ tänɨm eppa.
I našaŋ qatälʼišpat paka qopat passedʼinǯa i našaŋ i qatälʼešpat, našaŋ qattänat, kušaŋ qopot passedʼenǯa.
Qopot passedʼe.
Natʼagɨndo, tabɨt qoboɣondo, čanǯilʼe qwattat čaːmǯela, šüːjla i töʒil čaːmǯela.
Maːdɨl čaːnǯ nʼaʒolʼešpat (kuralešpat).
“Taːʒe mašom töːtəku.
Mʼaʒanaʒɨm meːkəle puːǯokɛŋ aza sowaŋ eːza.”
Aːmdegon neːt omda tazeɣɨnt.
Aːmda, čeːnčle qwatta.
“Oj, kundɨŋ qondɨsak.”
Waska čeːnča tabnä: “Aza mat bɨ, taper bɨ qondinent quːmplʼe.
Ta üːtqon loːsse, üːtqon lozi arakaze nöːternent.
Qaj teːkale täpel eːnǯa ütɨqol loːs.
Taneːkont potčätlʼent.
Tan aːmdeqon neːnt eːnnanǯ.
Qajko tenent ərčembal ütqo loːsse nötärnant.
Quːl čorgont potčotülʼent.
Waʒilʼent, tan näːwel qatlel meːka.”
“Mannan neːwem Marfa.”
“Tawaj čaːtčelaj äzäqɨnt.”
Wasʼka Marfam otoqont orannɨt i čaːǯaqɨj äzäqɨnt.
Maːdam nöːwaqɨj.
“Miː ʒe üːtenǯant, aːmdeqoj äzäkun.”
Aːmdeqo aːntenna.
I awaga tʼurlʼe aːntalba.
I nomn omta.
A neːt maːmaqɨnt kuranna.
Awamt otontse soiːjoqont arannɨt.
Tʼuːrešpa i niːdelʼešpat aːwagamt.
Aːtʼa Waskane čeːnčešpa: “Taper tiːawdʼeːl, aːwdʼeːl örgečenǯü.
Waska nedenǯü mannani neuze.
Äraŋam ödešpenǯü.
Elɨkwenǯalʼi warkekwenǯalʼi.
Wes teka menǯaw, oneq qwatčom, oneŋ maːdom, wes teːka menǯaw.
Mat teper ärambam, aːmdeqoumbɨku aza ejaŋ, ärambaŋ.
Tat kɨba orgoŋ ejant i wes meːšplel onenǯ tanentse.”
Elɨmbat warkɨkwat, kɨba mɨlat orlʼešpat (orɨmǯešpat).
I tapertə ellat.