|
|
PVD |
Me tamdʼel amdaj Angelina Iwanownaze, qulupbaj, tan dʼat qulupbaj, qutdär warkatdə, qajla meːkutdal.
|
|
|
|
Man tebnä kelʼlʼe taːdərau tan dʼat.
|
|
|
|
Man tʼäran: “Täp pajäpba.”
|
|
|
|
Man täbnä kessau tan mezuwi Marʼijaze apstɨzat, me tezʼe qutdär ärzawtə.
|
|
|
|
Man tebnä wes kessau.
|
|
|
|
Man qulɨpbɨzan: “Tʼotka Marʼina nagɨr nagɨrčeǯan.”
|
|
|
|
Puskaj togulǯɨmdə.
|
|
|
|
Tʼolom, Marʼina Pawlowna!
|
|
|
|
Man tekga süsögə nagɨr nagɨrčeǯan.
|
|
|
|
Kazaxsen man ass tunan.
|
|
|
|
Man ilan täpär qwačoɣɨn, Nowosibirskaɣɨn.
|
|
|
|
Qwačə iːbɨɣaj, soːdigaj.
|
|
|
|
Qwačoɣɨndə Nowosibirskat poisse čaːʒɨzan.
|
|
|
|
Poiskan čaʒəle qozɨrčezawtə.
|
|
|
|
Tajoʒnɨj stancɨɣɨn pois kuːnnɨn nɨkgɨs.
|
|
|
|
Man mannɨpɨzan i Nikinɨm qajɣɨn äss qoǯirsau.
|
|
|
|
Patom pois üːban.
|
|
|
|
Man qɨdan akoškaɣɨn mannɨpɨzan.
|
|
|
|
Jedla koːcʼin kalʼelʼlʼe čaːʒɨzattə.
|
|
|
|
Qwačɨn krajɣɨn pola, madʼila.
|
|
|
|
Krugom sər ippɨtda.
|
|
|
|
Man poisqɨn ass warɨpɨzan.
|
|
|
|
Qɨːban kogɨrɨt.
|
|
|
|
Ugon man ass paldükuzan poezlaze.
|
|
|
|
Man elan näjɣunnan, mäɣuntə na tükkutda süsöga selam nagɨrlʼe taːdərɨst.
|
|
|
|
Qwatčɨze näjɣum, na tükkɨt da Satdijedotdə süsöɣə äʒlam nagɨrle taːdɨrɨstə, tekga balʼdʼukus, tazʼe qɨːdan nagɨrčukus.
|
|
|
|
Man na näjɣunnan warkan, Nowosibʼirskan.
|
|
|
|
Täbɨn nimdə Anglʼina Iwanɨwna.
|
|
|
|
Man tebnan warkan.
|
|
|
|
Mazɨm warɨn soːn, jas qwɛdɨpɨqun.
|
|
|
|
Man oːnän melʼe taːdərəkou qaim kɨgan.
|
|
|
|
Tebnan nagur sütʼdʼe maːttə.
|
|
|
|
Maːdɨn sütʼdʼila warɣɨ.
|
|
|
|
Maːt pötpa, parawoje ataplʼenʼje.
|
|
|
|
Üt maːtqɨn jen: pärčɨtdə üt i qannəbädi üt.
|
|
|
|
Üt wes maːtqɨn jewat.
|
|
|
|
Okkɨr sütʼdʼäɣɨn uːrgoftə.
|
|
|
|
Natʼen pärčɨd üt i qannäbädi üt.
|
|
|
|
Matqɨn tütpukowtə i küzepukowtə.
|
|
|
|
Wes müzulʼǯɨlʼe qwatdəqut i qaj aptänäj tʼäkku.
|
|
|
|
Cɨpočkam nameʒalǯal, üt šoɣərlʼe qalukun.
|
|
|
|
Wes mezulʼǯulʼe meʒalgut.
|
|
|
|
Maːdla tɨtdɨn iːbɨgaj, teːttə ätaš maːdla, wes okkɨr saj maːdla.
|
|
|
|
Maːdla tüpba.
|
|
|
|
Ass qutdoqɨn pola: kəla, üdəpiːla, jolkala, sosnala, tʼeunpola, pila.
|
|
|
|
Tautʼen taɣɨn koːcʼin krɨbɨla tʼelɨmkun.
|
|
|
|
Me taɣɨn krɨbɨ taktätǯutu.
|
|
|
|
Üdɨn kocʼin jeqwattə swetoɣɨla.
|
|
|
|
Qaːn tolʼdʼizʼe paldʼättə.
|
|
|
|
Qɨbanʼäʒala salaskaze nezarnattə.
|
|
|
|
Aran pon tʼäbla wes šoltana azölʼeǯattə.
|
|
|
|
Qusaqɨn me tüzawtə Nowosibirskat, seqɨzawtə Nowosibirskaɣɨn wakzalɣɨn.
|
|
|
|
Innäj ətašqɨn seqɨzawtə.
|
|
|
|
Soblamtätte ätašxɨn qotdɨzawtə.
|
|
|
|
Mʼäɣuntu wes mewattə: matrazlam, adʼejallam, paduškalam.
|
|
|
|
Qotdəzawtə soːdʼigan.
|
|
|
|
Qula koːcʼin jezattə.
|
|
|
|
Iːbɨɣaj wakzal.
|
|
|
|
Natʼen maːɣɨlǯənnaš, jaš čannännaš.
|
|
|
|
Qarʼemɨɣɨn qwannawtə stalowajtə.
|
|
|
|
Tebla ketqwattə restoran.
|
|
|
|
Natʼen soːdigan jen, rajin sütdə.
|
|
|
|
Natʼen i aursawtə.
|
|
|
|
Menan more čaʒekan jen.
|
|
|
|
Natʼen qula qwɛlɨnʼättə sɨbɨqse.
|
|
|
|
Nɨrsala qwatqudattə i pʼedʼela.
|
|
|
|
Qɨbanädäkqa, xazʼäjkan nägat, tätkustə nɨrsan tassɨt.
|
|
|
|
Nɨrsa qattädʼipba.
|
|
|
|
Koška täbɨm apsɨt.
|
|
|
|
Mannan sət padrugau jewa.
|
|
|
|
Man teblanä palʼdʼüqwan.
|
|
|
|
I tebla mekka palʼdʼüqwattə.
|
|
|
|
Man sormeǯan poqqɨlaj.
|
|
|
|
Ola amdɨgu ass kɨgan.
|
|
|
|
A onän kɨdan qojmutčukan.
|
|
|
|
Man üdɨn Satdijedot tütǯan qwälɨsku, čobərɨm qwadəgu.
|
|
|
|
Qwače iːbɨgan jen.
|
|
|
|
Man na tünɨǯan i tekga aːdulǯeǯau qwačɨn.
|
|
|
|
Tekga na qwatčɨn tatčau.
|
|
|
|
Tan mannämeːǯal.
|
|
|
|
Tawtʼen wsʼäkij mašinalazʼe palʼdʼizan.
|
|
|
|
Perwɨj ras larɨpɨzan.
|
|
|
|
Mazɨm Valodʼä qwačoɣɨn warɨs.
|
|
|
|
Wes aːdulǯɨɣɨsɨt.
|
|
|
|
Onät də qu qwannaš, maɣɨlʼǯənnaš.
|
|
|
|
Man küssukumnan, tʼäran: “Küzugu nado.”
|
|
|
|
A Valodʼa mekga tʼärɨn: “Qu küzenaš?
|
|
|
|
Küzəpbədi mɨ tʼäkgu.
|
|
|
|
Küzəpbədi mɨla wes madɨn sütʼdʼäɣɨn jewattə.”
|
|
|
|
Pazarɣɨn jezaj.
|
|
|
|
Täp mekga tʼärɨn: “Natʼent qajno as küzəzat?”
|
|
|
|
A man ass küzɨzaːn.
|
|
|
|
Tak man tʼärpipɨzau.
|
|
|
|
Qusakɨn mašinam aːdɨzaj, man okkɨr näjɣumnä soɣutdʼan: “Qutʼen küzəpbədi maːt?”
|
|
|
|
Tep mekga aːdulǯɨt: “Tutʼetdo.”
|
|
|
|
Man kuronnan i küzan.
|
|
|
|
Man täjerbɨzan, küzeu wal waǯən.
|
|
|
|
Küzan i soːn azun.
|
|
|
|
Magazinla serkaj, iːbɨgaj magazilla.
|
|
|
|
Natʼen maɣulǯennaš.
|
|
|
|
Man nagɨrɨm ass tunou.
|
|
|
|
Oːnän ass paldʼiqwan qwatčoɣɨn, ato maɣɨlǯəǯan.
|
|
|
|
Man täpär mašinalaze paldʼän.
|
|
|
|
Ilɨzan qwatčoɣɨn ČʼornajaRečʼkaɣɨn i Taxtamɨšowaɣɨn ilɨzan.
|
|
|
|
Dunʼa tʼüs ČʼornajaRʼečʼkat.
|
|
|
|
Iːtdɨzʼe täbɨstaɣə warkaɣə.
|
|
|
|
Mikalaj Lazarɨčʼin pajagat qua.
|
|
|
|
ČʼornajaRʼečʼkaɣɨn warkɨss nätdanan.
|
|
|
|
A man qwannan qwačilam mannɨpugu.
|
|
|
|
Marina Pawlowna, qutdär man nagɨrmoː tütǯɨn, i mekga nagɨrɨm srazu nagɨrtə.
|
|
|
|
Man aːdelǯeǯan.
|
|
|
|
Wes nagɨrtə qutdär man qulau warkattə.
|
|
|
|
Kolʼän tʼät qajjamɨm üːtdətʼükal alʼ ass?
|
|
|
|
Wes mekga nagɨrɨt.
|
|
|
|
Man putʼöm aːdɨlǯəǯan.
|
|
|
|
Täɣɨtdɨltə nʼäjzʼe meqwattə alʼi mogazʼe meqwattə?
|
|
|
|
A magazʼinɣɨn qajla jetattə, wes nagɨrtə.
|
|
|
|
Ämnäl qaj iːlɨn alʼ ass?
|
|
|
|
Tʼärzattə to qwanpa.
|
|
|
|
Sinkan dʼät nagɨrət, qutdär ilɨkqun (warkɨqun).
|
|
|
|
Man täbnä nagɨrɨm nagurzan.
|
|
|
|
Täp mekga jass nagurgut.
|
|
|
|
Tetʼa Marina, perwɨj majzʼe, praznikze!
|